Kulwañana Na Byambo Mambo ka o Kukozhañena?
“Lelo makondo ne bulwi mwi anweba bifuma pa ka?”—YAKOBA 4:1.
NEMBI wa Baibolo aye Yakoba kechi watazhizhe bubwe bwipuzho ku nzhita ya bashilikale bena Loma, yalwilenga nkondo ya kushinda pa kyokya kimye; nangwa kwamba pa nkondo ya kulukukañana bumbelambela yalwanga Bayudea ba Sicarii, nangwa boba balwanga na mapoko mu myaka kitota kitanshi C.E. ne. Yakoba watazhizhenga ku bantu bacheche nabiji babiji bejimina kapila. Mambo ka? Ke na mambo a kuba byonkatu bikala nkondo, kwitala bibi kwipayañana. Monai bino bya kumwenako bya mu Baibolo.
Baana ba mushakulu Yakoba bashikilwe nkasabo Yosefwa kya kuba’mba bamupoteshe mu buzha. (Ntendekelo 37:4-28) Palutwe, Mfumu wa Isalela aye Saulo wakebele kwipaya Davida. Mambo ka? Mambo wamubijile kichima. (1 Samwela 18:7-11; 23:14, 15) Mu myaka kitota kitanshi, banabakazhi babiji ba bwina Kilishitu ba Yodia ne Shinchike bavulañenye mutende wa mu kipwilo na mambo a kwitala bibi kwabo.—Filipai 4:2.
Mu myaka ya kunyuma kwe, banabalume bapwishanga kwishikwa kwabo na mukwabo kupichila mu kulwañana na mapoko nangwa na mata a mujilo. Javula umo bamwipayanga ku mukwabo nangwa kumulemeka. Ano moba, bantu beshikwa javula bengijisha byambo bya mwenga. Nangwa kya kuba mashi kechi echilwa ne, kwiambila mwenga kukozha muntu ku muchima ne kumutamishisha jizhina. Bantu babula mambo javula bayanjilamo kyatu mu ae “makondo.”
Monai kyamwekele myaka imo kunyuma yapitapo kimye musapwishi wa mu kipwilo kya Anglican kyo atongwelenga munwe mukwabo musapwishi amba waja mali a kipwilo. Lutobo lwabo lwasolokele ku bantu, ne kipwilo kyobajingamo kyaabene ke bibiji. Bamembela bamo inge bayuka’mba musapwishi ye bashikwa ye ujiko jo jo juba, kechi baishilengako ku kipwilo ne. Kyatamine bingi kya kuba’mba bamembala betajilengatu bibi inge baji mu kipwilo na kupwila. Pano kimye kyo bamubepejile musapwishi wapelengamo mukwabo mambo amba wauba bulalelale, kwitala bibi pakachi kabo kwabaijileko kyatama.
Mukulumpe wa basapwishi wa mu Canterbury wibasashijile bano basapwishi beshikilwe babiji, ne kutela nkondo yabo amba “kikola kya kansa” ne kuba’mba “mambo a bumvu abena kuleta mwenga pa jizhina ja Nkambo Yetu.” Mu 1997 umo waswile kuleka mwingilo wanji. Umo washajile pa kifulo byonkabya kufika ne kimye kyo afuminepo na mambo a kuba wafikile pa myaka ya kulekelapo mingilo. Pano bino, waumijilepotu popolo kufikatu ne kimye kyapeleleko kyo afwainwe kutupukapo, waleka ne mingilo pa juba ja kuvuluka kusemwa kwanji byo afikile pa jifumbi ja myaka 70, pa August 7, 2001. Pepala wa byambo wa The Church of England waambile’mba, juba jo afuminenga pa mingilo jo juba kwajinga kijiilo kya “Kinemanga” Victricius. “Kinemanga” Victricius wajinga ñanyi? Wajinga bishopu wajingako mu myaka kitota kya buna washimwinwe amba bamuzhipawile na mambo a kukana kwingila mingilo ya bushilikale. Pepala wa byambo waambile “Kinemanga” Victricius byo apusene na yewa musapwishi wafuminenga pa mingilo amba: “Mu uno musapwishi kechi mwamwekelepo kayukilo kaji konse ka kuba’mba wakaine kulwa na musapwishi mukwabo ne.”
Aba basapwishi umvwe kya kuba baumvwijile lujimuno luji mu Loma 12:17, 18, inge kechi bekozhezhenga ku muchima ne kukozha bakwabo ne. Luno lujimuno lwaamba’mba: “Kechi mushinkanye kibi na kibi kikwabo nangwa na muntu umo ne. Langulukilai jimo bintu bikawama ku meso a bantu bonse.”
Nga anweba muba byepi, inge muntu wimutamisha ne kwimutendeka’mba mutobokenga? Abya muchinuzhuka byambo bya kwishintaukila ne kumonapo mashinda mwa kwikela mutende na yewo muntu umvwe kya kuba wafuukula’mba muleke kwitala bibi nyi? Inge mwalenga mambo mukwenu, nanchi muba’mba kechi nkeba ne kumumona nenyi, ne kuketekela’mba umvwe papita kimye awo muntu ukalubakotu oo mambo o mwamulenga byonkabyo nyi? Abya mupelawizha kulomba lulekelo lwa mambo? Kikale mwalomba lulekelo lwa mambo nangwa mwalekelako mukwenu mambo, kweseka kuleta mutende na yewo muntu kukemuletela lusekelo. Byambo bya mu Baibolo bya kufundañana byakonsha kwitukwasha kupwishatu nangwa makatazho aikala myaka nobe kajo, byonka byalumbulula mutwe walondelapo.