Nanchi Muji Byonka Biji Kichi kya Lagani Auna Nyi?

KU MPUNZHA iji kwipi na muzhi mukatampe wa Port Moresby, mu Papua New Guinea, kwajingapo basapwishi babiji babwelelenga ku nzubo kufuma mu busapwishi. Byo bayilenga mu jishinda, bamwene kichi kyawama bulongo. Wakikulumpe wajingapo waambile’mba, “Akye kichi kitelwa’mba lagani auna!” Kabiji watwajijile na kubula nsongwalume ye ajinga nanji amba: “Aje jizhina jilumbulula ‘kichi kitenkuma pa mwaka pa mwaka.’ Kechi kiji byonka biji bichi bikwabo byavula ne, mambo akyo pa mwaka pa mwaka kikunta mabula kyashala kekimwekanetu nobe kyauma. Pano umvwe mvula wanokelatu panshi, mabula atendeka kusapuka ne kulala buluba, kyabwela kyafunka bulongo.”

Twakonsha kufunjilako ku kino kichi kya lagani auna. Bashayuka bamo bamba’mba, kino kichi kyo kimo pa bichi bitanu byakilamo kuwama mwaya ntanda yonse. Nangwa kya kuba kino kichi kikunta buluba ne kulakasha mabula kisalo, bino kisunga mema akyo. Mizhazhi yakyo yakosa bingi kabiji kyakonsha kumena mu mabwe. Kino kyo kilengela kuba’mba nangwa kwaiya mwela wa mutundu ka, kyubatu monka kyakosela. Mu kwipipisha twakonsha kwambatu’mba, kino kichi kitwajijila na kukoma nangwa kishupepotu byepi.

Ne atweba twakonsha kupita mu makatazho akonsha kukokesha lwitabilo lwetu. Pano ki ka kyakonsha kwitulengela kuchinchika? Byonka biji kichi kya lagani auna, ne atweba twafwainwa kutoma ne kulama mema apana bumi aji mu Mambo a Lesa. Kabiji twafwainwa kukwachisha kwi Yehoba, ‘jibwe jetu,’ ne ku jibumba janji. (2 Samwela 22:3) Ee, kichi kya lagani auna kituvululamo kuba’mba nangwatu kimye kya makatazho twakonsha kwikala bakosa ku mupashi umvwe saka twingijisha bintu bitupa Yehoba. Umvwe saka tube bibye, ‘tukaswana milaye” yo etulaya, kuvwangakotu ne mulaye wa bumi bwa myaka ne myaka.—Bahebelu 6:12; Lumwekesho 21:4.