BUTALA BWA MABUKU BWA PA INTANETI
Kyamba kya Usopa
BUTALA BWA PA INTANETI
Kikaonde
Pa kukebela
  • Bisopelo
  • BAIBOLO
  • MABUKU
  • KUPWILA
  • w07 12/15 p. 32
  • Mepuzho Kufuma Kubatanga

Vidyo ufwamo.

Yakana kushinkuka.

  • Mepuzho Kufuma Kubatanga
  • Kyamba kya Usopa—2007
  • Tumitwe tucheche
  • Bena Kilishitu Bakonsha Kubapo Byepi pa Kusonsola Nyama ne Masabi?
Kyamba kya Usopa—2007
w07 12/15 p. 32

Mepuzho Kufuma Kubatanga

Bena Kilishitu Bakonsha Kubapo Byepi pa Kusonsola Nyama ne Masabi?

Baibolo kechi ukanya kusonsola nyama ne masabi ne. (Mpitulukilo ya mu mizhilo 14:4, 5, 9, 20; Mateo 17:27; Yoano 21:6) Pano bino, bena Kilishitu baya na kusonsola nyama nangwa masabi bafwainwa kulangulukishapo bulongo pa mafunde avula atanwa mu Binembelo.

Lesa waswishishe Nowa ne ba mu kisemi kyanji kwipaya ne kuja nyama, kikulutu bakingya nyama saka bakyangye kwiija. (Ntendekelo 9:3, 4) Uno mukambizho wakoseshe kishinka kya kuba’mba bumi bwa yewa nyama bwafwainwa kunemekwa mambo bwafumine kwi Lesa. Onkao mambo, bena Kilishitu kechi bafwainwa kwipayanga banyama kya nshiji ne kubula kunemeka bumi bwa nyama ne.—Byambo bya Mana 12:10.

Twafwainwa kufunjilako kintu kikwabo kutazha ku byubilo byetu. Batumwa bafwainwa basekejile bingi pa masabi avula o bakwachile. Pano bino, kafwako byanembwa bimwesha amba betotelenga pa byo bayukile kukwata masabi nangwa kusonsola ne kwimwesha ku bakwabo amba bo baanabalume, nangwa byo basangalele pa kukwata masabi avula, ine.—Salamo 11:5; Ngalatiya 5:26.

Kampe twakonsha kwiipuzha atwe bene amba: ‘Abya ne wakumwenako wawama mu kumwesha munema pe Yehoba byo amona bumi nyi? Nanchi kimye kyonse ndangulukatu ne kwamba pa bya kusonsola nyama ne masabi nyi? Abya bwikalo bwami bumwesha amba natemwa kwipaya nyama ne masabi, nangwa bumwesha amba ne wa mwingilo wa Yehoba nyi? Nanchi kusonsola nyama ne masabi kwandengela kumvwañananga na babula kwitabila nangwa kwandengela kubula kuta maana ku kisemi kyami nyi?’—Luka 6:45.

Bamo bepaya nyama nangwa masabi a kubelela bakonsha kutesha muchima mu kwipaya nyama nangwa masabi mu kifulo kya kutesha muchima pa mingilo ya ku mupashi. Pano bino, tumwesha lwitabilo ne bukishinka bwetu kwi Lesa umvwe twabula kuswisha kintu kiji kyonse kuya palutwe kukila kyaswa muchima wanji. (Mateo 6:33) Kabiji kunungapo, bena Kilishitu bakokela mizhilo yonse ya kwa “Kesala” kutazha ku kwipaya nyama ne masabi, kikale kafulumende wibaswisha nangwa ne.—Mateo 22:21; Loma 13:1.

Pa kuba’mba bobile monka mukebela Yehoba pa mambo a kwipaya nyama ne masabi, bamo bafwainwa kupimpula ndangulukilo yabo kwesakana na mwayila mizhilo yanji. (Efisesa 4:22-24) Nangwa byonkabyo twafwainwa kunemeka milanguluko ya bakwetu yafuma panshi ya muchima. Kutazha ku bino mutumwa Paulo wapaine lujimuno lwanengela bingi amba: “Kechi twizhachishe atwe bene na bene jibiji ne: poso mupwishishe jimo kino kintu amba, Muntu nangwa umo kechi atule mu jishinda ja mulongo wanji kya kwituntulako ne.” (Loma 14:13) Kumwesha butemwe bwa uno mutundu bwabula misalululo kuleta mutende mu kipwilo kabiji kutokesha ne Mulenga wetu ku muchima, aye yenka ntendekelo ya bumi.—1 Kolinda 8:13.a

[Tubyambo twa mushi]

a Monai ne “Mepuzho Kufuma Kubatanga” mu Kyamba kya Usopa kya Kibemba kya May 15, 1990.

    Mabuku a mu Kikaonde (1992-2025)
    Shinkai
    Shinkulai
    • Kikaonde
    • Tuminaiko Bakwenu
    • Byo Mukeba
    • Copyright © 2025 Watch Tower Bible and Tract Society of Pennsylvania
    • Terms of Use
    • Privacy Policy
    • Privacy Settings
    • JW.ORG
    • Shinkulai
    Tuminaiko Bakwenu