Fundai ku Bilubo bya Bena Isalela
BENA Isalela bayukile Yehoba byo akebelenga amba bobe byo batwelele mu Ntanda ya Mulaye. Kupichila mwi Mosesa, Lesa wakambizhe’mba: “Mukebapangemo bonse bekala mu yoya ntanda, ne konauna mukonaune bilengwalengwa byabo bya mabwe pamo ne bankishi babo bo balenga na byela bya kusungulula, ne kusandapo bipandawilo byonse byo batunga patuntama.”—Bala. 33:52.
Bena Isalela kechi bafwanyijilwe kulayañana lulayañano lwa mutende na boba bangikazhi ba mu ntanda, nangwa kusongozhana nabo ne. (Mpitu. 7:2, 3) Kya kine, bantu ba Lesa basalulwilwe bebajimwine’mba: ‘Bino mujimuke kuchina’mba mwakeya kulayañana lulayañano na bantu bekala mu kyokya kyalo ko muya, kabiji lwakekala ke kakose mukachi kenu.’ (Lupu. 34:12) Bino bena Isalela bamusatukijile Lesa kabiji bafwile mu kakose. Ki ka kibalengejile kuba’mba bonaunwe? Twakonsha kufunjilako ka kwi abo?—1 Ko. 10:11.
Byo Bapwanañene Nabo Batendekele Kupopwela Bankishi
Byo bayilenga na kutambula yoya Ntanda ya Mulaye, bena Isalela bashinjile makondo atanshi o balwile na boba bangikazhi. Nangwa byonkabyo, bena Isalela bakankelwe kukokela mukambizho wa Lesa. Kechi bebapangilemo balwanyi babo ne. (Mito. 1:1–2:10) Mu kifulo kya kuba bibakambizhe Yehoba, bena Isalela byo baikajilenga na “mikoka itanu na ibiji” yo bataine mu yoya ntanda, kibalengejile kwisampa nabo bulunda. (Mpitu. 7:1) Kino kyalengejile bena Isalela kuba ka? Baibolo waamba’mba: ‘Basongwelenga baana ba bakazhi ba ino mikoka, ke bakazhi babo, kabiji bapaine baana babo ba bakazhi ku banabalume ba ino mikoka amba bebasongole; kabiji baingijilenga balesa babo. Kabiji bena Isalela baubile bintu byatama ku meso a Yehoba, ne kuvulama bamuvulamine Yehoba Lesa wabo, sa bebengijila Babaela ne Baashela.’ (Mito. 3:5-7) Bena Isalela byo bechiine kala na bantu ba mu yoya ntanda kibalengejile kwisongozhana ne kupopwela bankishi. Byo balayañene kwisongozhana, bena Isalela bakankelwe kupangamo boba bantu babulanga kupopwela Lesa mu ntanda. Mpopwelo ya kine yaonaikile, kabiji bena Isalela batendekele kupopwela balesa ba bubela.
Bangikazhi ba mu yoya Ntanda ya Mulaye byo bakijinga balwanyi ba bena Isalela batamine, mambo bakonsheshe kulwa nkondo na bena Isalela. Pano byo kyajinga kuba’mba bena Isalela baishile kwichina nabo kala, bano bangikazhi bakijilemo ne kutama mambo bena Isalela bebonawijile ndangulukilo yabo ne bulunda bwabo na Lesa. Akimonai jishinda jikwabo jaishile konaikilamo bupopweshi bwa kine.
Kwikala Banjimi Kwibalengejile Kupopwelanga Baela
Bena Isalela byo batwelele mu Ntanda ya Mulaye, balekele kwikala bakapitemo ne bavula baikele ke banjimi. Mashinda a bunjimi o baingijishenga kampe epashishe na oa a bena Kenana baikalanga mu yoya ntanda. Bena Isalela kechi balondejiletu oa mashinda kyapwa ne. Bino kupwanañena pamo na boba bantu kwibalengejile kutendeka kulondela bisho byabo byalamachile ku bunjimi.
Bena Kenana bapopwelanga Babaela bavula bingi, ko kuba’mba bano bajinga balesa bo baketekejile amba bo balengelanga kajo kumena bulongo. Kununga pa kujima ne kunowa kajo kabo, bena Isalela batendekele ne kupopwela balesa ba bena Kenana amba bo bebapelenga kajo kavula. Mu jino jishinda, bena Isalela bavula bebepekezhenga kupopwela Yehoba, bino saka bamusatukila.
Lujimuno Lwanema Bingi kwi Atweba Lelo Jino
Bena Isalela bamwekele nobe kechi bakapopwelanga Babaela ne kuba bubi kimye kitanshi kyo bajinga pamo na bantu ba mu yoya Ntanda ya Mulaye ne. Bino kupwanañena pamo na boba bantu kwibalengejile kutendeka kupopwela Baela. Ne atweba bino bintu byatama, nanchi kechi byakonsha kwitumwekela umvwe ke twichine kala na boba bakonsha kwikala balunda netu bino saka babula kulondela mafunde a bwina Kilishitu nenyi? Kya kine kuba’mba twakonsha kwikala pamo na boba bo twabula nabo mu lwitabilo lumo kimye kyo tuji ku nkito, ku sukulu, kampetu ne ku nzubo. Nangwa byonkabyo, byapichilemo bena Isalela bitujimunako ne atweba kuba’mba umvwe twisampa bulunda na bano bantu, ko kuba’mba tubena kwiapwila makala pa mutwe. Baibolo waamba kino kishinka kuba’mba: ‘Kwendañana na babi ko kuvulañanya bisela byawama.’—1 Ko. 15:33.
Lelo jino, tupita mu makatazho avula bingi aji byonka byajinga apichilemo bena Isalela. Ano moba mu ntanda muji bintu ne bantu bavula bingi bo bapopwela ku bantu bakwabo nobe tubalesa. Bino bintu byavwangamo mali, kutamba bantu baya nkuwa, kutota bantu bapama mpila baya nkuwa, bamulwila ntanda, bantangi bamo ba bupopweshi, ne ba mu kisemi. Bino bintu byakonsha kwitulengela kutapo muchima mu bwikalo bwetu. Kwichina kala na boba babula kutemwa Yehoba kwakonsha kwitulengela konauna bulunda bwetu na Lesa.
Kwilaala kwabula kwitabizhiwa mu mizhilo ko kwakijilemo kubiwa mu mpopwelo ya kwa Baela, kabiji kino kyalengejile bena Isalela bavula kufwa mu kakose. Tuno tonka tukose tubena kongola bantu ba Lesa lelo jino. Kya kumwenako, kutamba bipikichala bya bantu bajitu mulekese pa Intaneti kupichila mu kwingijisha kompyuta muntu yo abika kwabengakana mu nzubo yanji kwakonsha kumulengela konauna jiwi janji ja mu muchima jawama. Byo kyakonsha kutama umvwe mwina Kilishitu waongolwa na kutamba bipikichala bya bantu baji mulekese pa Intaneti!
“Bo Bene ba Lusekelo Bonka Balama Milaye Yanji”
Muntu mwine ye uji na lūsa lwa kwifuukwilapo kukokela Yehoba nangwa kubula kumukokela kupichila mu kusala balunda. (Mpitu. 30:19, 20) Onkao mambo, twafwainwa kwiipuzha atwe bene amba: ‘Nanchi bañanyi bo nechina nabo kala kimye kyo tubena kukaya? Mizhilo ya Lesa beimona byepi? Nanchi bapopwela Yehoba nyi? Abya kupwanañena nabo pamo kwakonsha kundengela kwikala mwina Kilishitu wawama nyi?’
Nyimbi wa masalamo waimbile’mba: “Bo bene ba lusekelo bonka balumbuluka mu jishinda, Bonka benda mwayila buku wa mizhilo wa Yehoba. Bo bene ba lusekelo bonka balama milaye yanji, Bonka bamukebesha na muchima yense.” (Sala. 119:1, 2) Ee, “bo bene ba lusekelo bonse baakamwa Yehoba, Bonka benda mu mashinda anji.” (Sala. 128:1) Pa kusala balunda, twayai tufunjilenga ku bilubo bya bena Isalela ne kukokela Yehoba na muchima wetu yense.—Mana. 13:20
[Kipikichala pa peja 26]
Kwichina kala na boba babula kutemwa Yehoba kwakonsha kwitulengela kupopwela bankishi