Fwenyai Kwipi ne Lesa
Mutonyi Uba Byaoloka Kimye Kyonse
BUCHIBAMAMBO bwaoloka. Kuba byawama. Kubula kutala ku kilungi. Nanchi kechi mukomoka bino byubilo nenyi? Atweba bantu tukeba bingi kwitubila byawama. Kya bulandatu ke kya kuba’mba, kuchiba mambo mo aolokela javula kechi kubiwa mu ino ntanda ne. Pano bino, kuji Mutonyi ye twafwainwa kuketekela, aye Yehoba Lesa. Kimye kyonse, aye uba byaoloka. Kino kyamwekejile mu mwisambo wajinga pakachi ka Yehoba ne Abalahama, wanembwa mu Ntendekelo 18:22-32.a
Yehoba byo aambijile Abalahama pa byo afuukwile kupempula muzhi wa Sodoma ne Gomola, Abalahama wachiine na mambo a bantu baoloka bajingamo, kubikakotu ne mwipwa wanji, aye Lota. Abalahama wamusashijile Yehoba amba: ‘Kine mukonauna baoloka pamo na babi nyi? Inge mu muzhi muji bantu baoloka makumi atanu, ke mukamuleka na mambo a boba bantu makumi atanu baoloka nenyi?’ (Byepelo 23, 24) Lesa waambile’mba kechi ukonauna yoya mizhi umvwe mwatanwa bantu baoloka 50 ne. Abalahama wamusashijile Yehoba bimye bikwabo bitanu kufikatu ne ku kibelengelo kicheche kya bantu jikumi. Pa kimye pa kimye, Lesa waambilenga’mba kechi ukonauna yoya mizhi umvwe muji bantu bavula baoloka ne.
Nanchi Abalahama wipachikilenga ne Lesa nyi? Ine! Kino kyakonsheshe kumwesha bwitote. Jishinda jo aambijilemo Abalahama jamwesheshe mushingi ne kwipelula. Witongwele mwine amba wajinga muntutu wa “lukungu ne buto.” Waambile na mushingi bimye bibiji amba “mwane.” (Byepelo 27, 30-32) Kabiji byambo byaambile Abalahama byamwesheshe luketekelo lwanji mwi Yehoba byo oba byawama. Pa mambo a mulanguluko wa kuba’mba Lesa ukonauna baoloka pamo na babi, Abalahama waambile bimye bibiji amba, “akyo ne, mwane.” Mushakulu wakishinka waambile luketekelo lwanji amba, ‘Aye Mutonyi uchiba mambo a ba pano pa ntanda ponse, ukoba kyaoloka.’——Kyepelo 25.
Nanchi Abalahama waambile kine nyi? Ee, nangwa ine. Walubankenye byo alangulukile’mba mu Sodoma ne Gomola mwajinga bantu baoloka jikumi. Bino waambile kine’mba Lesa kechi ‘ukepaya baoloka pamo na babi ne.’ Lesa byo aonawine yoya mizhi ibi, muntu waoloka Lota ne baana banji babakazhi babiji bapulukile na bukwasho bwa bamalaika.—2 Petelo 2:7-9.
Jino jishimikila jitufunjishapo ka pe Yehoba? Byo aambijile Abalahama pa byo afuukwile kupempula yoya mizhi, kyamwesheshe’mba Yehoba wakebele Abalahama kwamba byajinga ku muchima wanji. Kepo atelekelenga kimye mulunda nanji Abalahama kyo aambilenga bintu byajinga ku muchima wanji. (Isaya 41:8) Kino kitufunjisha kuba’mba Yehoba ke Lesa wipelula, unemeka bakalume banji panopantanda! Kya kine, tuji na bishinka byafwainwa kwitulengela kuketekela mwi Yehoba, Mutonyi uba byaoloka kimye kyonse.
[Tubyambo twa mushi]
a Pa kyokya kimye, Yehoba bamwimenejileko kwi malaika wamwambijilengako. Kabiji monai ne kya kumwenako kikwabo mu Ntendekelo 16:7-11, 13.
[Kipikichala pa peja 20]
Abalahama wasashijile Yehoba pa mambo a Sodoma ne Gomola