Nanchi Lesa Utambwila Mpopwelo Yonse Nyi?
Bantu javula bakumbula’mba:
▪ “Mabupopweshi onse ke mashinda a kuyilamo kwi Lesa.”
▪ “Kechi mambo kwitabila mu kintu kyonse kyo ukeba ne, kikulutu wi wakishinka.”
Nga Yesu waambilepo’mba ka?
▪ “Twelai pa kibelo kyakepa: mambo kibelo kyabaya ne jishinda japela kwendamo biya ku lonaiko, ne batwelamo bo bavula. Mambo kibelo kyakepa ne jishinda jakatazha biya ku bumi, kabiji bebimona bo bacheche.” (Mateo 7:13, 14) Yesu kechi waitabijile’mba mabupopweshi onse atangijila bantu kwi Lesa ne.
▪ “Mu aja juba bavula bakañambila’mba, Nkambo! Nkambo! Kechi twaawilenga na mupashi mu jizhina jenu nenyi? ne mu jizhina jenu kechi twapangijilengamo bademona nenyi? kabiji kechi twaubijilengamo mingilo ya bulume yavula mu jizhina jenu nenyi? Ponkapo nkebambila namba, kechi nemuyukilepo ne: mfumai anweba ba kuba bibi.” (Mateo 7:22, 23) Yesu kechi utambwila bonse betela’mba bamulondela ne.
BANTU bavula ba mu mabupopweshi banemeka bingi bintu byo baitabilamo ne bisho. Pano, ki ka kyubiwa umvwe ano mafunjisho kechi ayilamo na byaamba Mambo a Lesa, Baibolo ne? Yesu wamwesheshe kizumba kiji mu kulondela bisho bya bantu byo aambijile bantangi ba mu mabupopweshi mu oa moba anji’mba: “Mwazhilulula mukambizho wa Lesa na mizhilo yenu.” Kabiji wapitulukile ne mu byambo byaambile Lesa bya kuba’mba: “Bano bantu bannemekatu amiwa na bya tunwa byabo; Pakuba michima yabo iji kwalepa ne amiwa. Byatu byo bampopwela byo bafunjisha mafunjisho a mikambizho ya bantu.”—Mateo 15:1-9; Isaya 29:13.
Kwitabila mu bintu kukebewa kwikala na byubilo byawama. Baibolo waamba pa boba betela’mba bamupopwela Lesa amba: “Abo bamba’mba, Lesa twamuyuka, nanchi mu mingilo yabo bamukana.” (Titusa 1:16) Kabiji Baibolo waamba ne pa boba babena kwikala mu ano moba etu’mba: “Ba kutemwa bya lusangajiko, ne kutemwa Lesa ne; kasa baji na kipashañanotu kya munema wa kunemeka Lesa, kabiji bulume bwa ao munema bebukana: kabiji bano nabo wibavundamine.”—2 Timoti 3:4, 5.
Bukishinka bukebewa bingi, pano bino mwavwangwa byavula. Mambo ka? Mambo muntu wakonsha kwikala na bukishinka pano bino saka abula kulumbuluka: Onkao mambo, kyanema bingi kwikala na maana alumbuluka pe Lesa. (Loma 10:2, 3) Kufunda ano maana ne kuba bintu kwesakana na byaamba Baibolo kuketukwasha kwikala bakutokesha Lesa pa muchima. (Mateo 7:21) Onkao mambo, bupopweshi bwawama bwavwangamo kwikala na mulanguluko wawama, kwitabila mu bintu bya kine ne kwikala na byubilo byawama. Kabiji kwikala na byubilo byawama kulumbulula kuba kyaswa muchima wa Lesa pa juba pa juba!—1 Yoano 2:17.
Umvwe mukeba kuyukilapo byavula pa mambo a bitubula Baibolo pe Lesa, monai Bakamonyi ba kwa Yehoba kuba’mba mukafundenga nabo lufunjisho lwa Baibolo kwa kubula kwimulipilisha.
[Mabulañano pa peja 9]
Bupopweshi bwawama bwavwangamo kwikala na mulanguluko wawama, kwitabila mu bintu bya kine, ne kwikala na byubilo byawama