Nkalata Kufuma ku Kyalo kya United States

Lwendo Lwitubwezhezhe ku Myaka ya Kala

Akifwanyikizhai byo kyakonsha kuwama umvwe mwaya na kumona bantu bekala byaikalanga bashakulu benu. Atweba twakashilepo lwendo lumo lwa uno mutundu. Twafumine ku Switzerland kuya ku United States of America. Bavula balanguluka’mba bantu bonse ba mu kyalo kya United States bekala bwikalo bwa ano moba, bino lwendo lwetu lwitulengejile kumona bantu bakikala byaikalanga bashakulu papita ne myaka bitota bibiji. Twayai twimubule byo kyajinga.

Betutumine kuya na kwingijila mu kyalo kya Indiana pa bañondo basatu mambo twayuka mulaka wa Swiss German. Kikatampe kyo twaendejile ke kusapwila mambo awama a Bufumu bwa Lesa ku bisemi bya bena Amish bamba mulaka wa bashakulu babo. Bisemi byavula bya bano bantu bikala mu Indiana.

Bena Amish ke kisaka kya bantu bajingako mu kitota kya myaka kya bu 17 bakaine kwitabila mu lubatizhilo lwa baana babacheche. Jizhina jo batelwa jafuma ku ntangi wabo aye Jacob Amman waikalanga mu Switzerland. Kutanga Baibolo kwalengejile bano bantu bakamwa Lesa kuyuka’mba kubatiza twana twa lukeke ne mwingilo wa bushilikale kechi byafwainwe ne. Kafulumende watendekele kwibamanyika na mambo a lwitabilo lwabo. Luno lwitabilo lwabo lwalengejile bamo kwibepaya. Kwibamanyika byo kwaswezhezhe, bavula banyemejile ku mapunzha akwabo a mu Switzerland ne mu France. Mu myaka kitota kya bu 19, bavula popo banyemejile ku United States. Bakatwajijile kwikela mwayila kisho kyabo ne kwamba mulaka wabo wa Swiss German.

Byo twafwakashijile bano bantu bamichima yawama, bakuminye mambo twaambilenga mulaka wabo. Akifwanyikizhai byo kyajinga.

Baipwizhe mu mulaka wa Swiss German amba: “Nga uno mulaka mwamufunjile pi?”

Twakumbwile’mba: “Mambo twafuma ku Switzerland.”

Bakumya’mba: “Pano bino kechi mwi bena Amish ne!”

Bavula betutambwijilenga kabiji twimwenejile bwikalo bwa kala bwa bashakulu. Bengijisha malampi, kechi malaichi ne. Benda pa bambili ne makalaki, kechi mu myotoka ne. Mema batoma mu mishima kabiji kechi bateleka ku mawaileshi ne, bembatu mukanwa.

Kyo twatemenwe mu bantu bo twafwakashijile ke kwikepesha ne kubula kukizhamo mu kuba bintu. Bena Amish batanga Baibolo pa juba pa juba kabiji batemwa bingi kwisamba pa Baibolo. Kino kitulengejile kwisamba na bantu pa nkebelo ya Lesa ku bantu ne ntanda.

Mu nyaunda byo bayukile’mba muji benyi bafuma ku Switzerland, bavula bakebelenge’mba tufwakashishe balongo babo. Twatemenwe bingi ne kuba byonka byo bakebelenga. Kwitwita kufwakashisha sukulu wa bena Amish kwituletejile bingi lusekelo kabiji twatengejilenga jo jo juba. Ñanyi bintu byo twatengejilenga?

Byo twafikile pa sukulu twakonkosheshe ku kibelo. Mufunjishi washinkwileko ne kwitutwezha mwajinga baana basukulu 38 bonse betutajilenga. Mabumba a baana basukulu atanu na asatu kutatwila pa baji na myaka 7 kufika ku baji na myaka 15 bakonkene mu kibamba kimo. Bansongwakazhi bavwajile mayunifomu a kifufya ne tubisote tutoka kabiji bansongwalume bavwajile mitanganyika ifita ne malaya a kifufya. Mu bibamba mwajinga palafu. Bibumba bapenteleko penchi wa kifufya kabiji kulutwe kwajinga kipabi. Kubwipi na kipabi kwajinga mapu a kizhingu a ntanda ne mamapu akwabo o bavungavunga. Mufungwa mwajinga kitofu.

Byo twaikele kulutwe, baana basukulu benengezhe kuteleka. Baana ba sukulu bebechilenga kulutwe kutebulu na kwibepuzho pa byo bebapele juba jafumineko bya kwingijila ku nzubo. Twakuminye mufunjishi byo aipwizhenga baana basukulu pa mitumba ya Switzerland. Mufunjishi waipwizhe umvwe Switzerland yajinga byonka mabuku byo alumbulula mambo mabuku abo ajinga a kala. Nanchi bañombe bakibatwala ku mitumba mu mayoo nyi? Nanchi ku mitumba kukyuba sino nyi? Byo twamumwesheshe bipikichala byetu bya mitumba yo bazhika ku sino byamwekelenga bulongo kukila byajinga mu buku, watemenwe bingi.

Mukazhanji mufunjishi, mo bengijila waipwizhe bwipuzho bwipuzhapo bavula amba: “Nenuwa mwayuka kuleula jiwi pa kwimba nyi?” Kechi twayuka ne. Bino byo twayukile kuba’mba bena Amish bayuka kwimba ne kuleula mawi bulongo, twibambijile kwitwimbila lwimbo. Baswile, twalekaminetu na kuteleka byaimbelenga banyimbi 40. Mufunjishi waambijile banyike kulupuka pangye na kukaya pa kakimye kacheche.

Mukazhanji mufunjishi witwambijile kwibembila lwimbo. Twaswile mambo twayukile nyimbo imo ya bena Swiss German. Banyike byo baumwine ku kibanza kobajinga babwelele mu kibamba. Kwimana kulutwe ya baana basukulu kwitulengejile kutako muchima ne kwimba bulongo.

Betwichile kuya na kuja kajo ka pachaile ku kisemi kya bena Amish kyajinga na bantu 12. Pa tebulu pajinga kajo kawama kapusana pasana—ntamba ya kukanda, nyama ya nkumba, mataba, bishu, shinkwa, bimpampe, kibele ne bya kuja bikwabo. Saka tukyangye kutendeka kuja twalombele kishinshi pa muntu pa muntu. Banyike banongotelenga ne kuseka ne byo tupwisha kuja. Bonse inge bapwisha kuja, kwikala kulomba jibiji. Panyuma ya luno lulombelo banyike po po bakonsha kufuma ku tebulu bino kechi kuya na kukaya ne. Mwanyike yense uji na mwingilo wa kuwamisha tebulu ne kovwa masanyi, ko kuba’mba patanshi bafwainwa kutapula mema ne kwiakabisha.

Banyike byo baovwelenga bipe, bansemi betwichile mu kibamba mwa kwikala. Kechi mwajinga bipona byanekena ne, mwajinga bya mapulanga. Batolele Baibolo wa kala wa mu mulaka wa mu German mu kabachi. Monka mwayila muteeto wa bena Amish, twatatwile kwisamba pa bintu bya ku mupashi. Nkebelo ka ya Yehoba Lesa ku ntanda ne bantu? Yesu watazhizhe mwepi byo aambile’mba bakimote bakaswana ntanda? Nanchi Lesa ukeba kumanyika bantu mu mujilo wa helo myaka ne myaka nyi? Bañanyi babena kulondela mukambizho wa kwa Yesu wa kusapwila mambo awama panopantanda ponse? Kwisamba ano onse mepuzho ne mepuzhotu akwabo na bantu batemwa bintu bya ku mupashi baji na Baibolo kwitusangajikile bingi.

Luno lwendo lwawama lwitulengejile kumona bya ikalanga bashakulu, ne bintu byawama byo tukivuluka. Tubena kulomba ne kuketekela kuba’mba luno lwendo kechi lwalengelatu bena Swiss German kwitutambwilanga ne, bino ne bukine bwa Mambo a Lesa kufika bantu bavula pa michima.