Kitango 6

Mufunjishi Wayukisha Waingijilanga Bantu

NANCHI umvwa bulongo inge bakubilapo kintu kimo kyawama nyi?— Bantu bavula nabo bomvwa bingi bulongo umvwe bebobilapo kintu kimo kyawama. Bonsetu tumvwa bulongo. Mufunjishi Wayukisha wayukile kino, kabiji kimye kyonse waubilanga bantu bintu byawama. Waambile’mba: ‘Kechi naishile’mba, bañingijile ne, poso amba ne bengijile.’—Mateo 20:28.

Umvwe tukeba kwikala byonka byajinga Mufunjishi Wayukisha, twafwainwa kuba ka?— Twafwainwa kwingijilanga bakwetu. Twafwainwa kwibobilanga bintu byawama. Pano bino bantu bavula kechi byo byo boba ne. Bakeba bingi bakwabo kwibengijila. Kimye kimo baana ba bwanga ba kwa Yesu nabo byo byo bakebelenga. Bonse bakebelenga bingi bukulumpe.

Juba jimo Yesu wailenga na baana banji ba bwanga. Byo bafikile mu muzhi wa Kapenama, pepi na Kizhiba kya Ngalilea, batwelele mu nzubo. Byo baikajile mu nzubo, Yesu wibepwizhe’mba: “I ki ka kyo mwajikupachikanga anwe bene na bene mu jishinda?” Bazhindaminetu nzo mambo mu jishinda bepachikilenga abo bene na bene amba, mukulumpe wetu ñanyi.—Mako 9:33, 34.

Yesu wayukile’mba kyatama umo pa baana banji ba bwanga kulanguluka’mba ye mukulumpe. Byonka byo twafunjile mu kitango kitanshi kya uno buku, waletele mwana mucheche mukachi kabo ne kwibambila’mba bafwainwa kwipelula nobe mwana mucheche. Pano bino kafwapo nangwa kyo baumvwinepo ne. Onkao mambo, Yesu saka akyangye kufwa ne, wibafunjishe lufunjisho lo bakonsheshe kubula kulubamo ne. Waubilepo ka?—

Byo bajiilenga kijiilo, Yesu waimene ne kuvula bivwalo byanji bya peulu. Washikwile nsalu ya kwishimunako mema ne kwiikasa mu kifuka. Kabiji waitulwijile mema mu nsanyi. Baana banji ba bwanga bafwainwa bamutajilengatu’mba bamone kyo asa kuba.

Byo bamutajilenga, Yesu waovwele maulu a baana banji ba bwanga bonse ne kwibashimuna na nsalu ya kushimunako mema. Akikilangulukepotu kino! Wakonsha kuba byepi umvwe wajinga ponka? Wakonsha kwiumvwa byepi?—

Baana banji ba bwanga balangulukile’mba kechi kyawama Mufunjishi Wayukisha kwibengijila ne. Baumvwine bumvu. Petelo wakainenga’mba kechi kyafwainwa Yesu kovwa maulu anji ne. Bino Yesu waambile’mba wafwainwa kwingila uno mwingilo.

Ano moba kechi tovwa maulu a bakwetu ne. Uno mwingilo wakovwa maulu waingijiwanga kimye Yesu kyo ajinga panopantanda. Wayuka kyalengelanga kuba bino nyi?— Mu kyalo mwaikalanga Yesu ne baana banji ba bwanga, bantu bavwalanga makwabilo. Onkao mambo, kimye kyo baendanga mu mikwakwa, maulu abo aubanga bingi lukungu. Kovwa maulu a mwenyi waiya ku nzubo kyajinga kintu kyawama bingi.

Bino kafwapotu nangwa mwana wa bwanga wa kwa Yesu umo wipaine kuba’mba ovweko maulu a bakwabo ne. O ene mambo Yesu o aubijile kino. Yesu byo aingijile uno mwingilo wafunjishe baana banji ba bwanga lufunjisho lwanema bingi. Bafwainwe kufunda luno lufunjisho. Kabiji ne atweba ano moba twafwainwa kufunda luno lufunjisho.

Nanchi wiluyuka luno lufunjisho nyi?— Yesu byo avwajile bivwalo byanji bya peulu wabwelele waikala jibiji ku tebulu, ne kwamba’mba: “Mwayuka kyo ne mubila nyi? Anweba muntela amiwa amba, Mufunjishi, kabiji’mba, Nkambo: mwaamba bulongo; mambo byo byo nji. Kabiji inge amiwa, Nkambo yenu ne Mufunjishi wenu, nemovwa maulu enu, ne anweba nenuwa mwafwainwa kwiovwa ku maulu enu anwe bene na bene.”—Yoano 13:2-14.

Mufunjishi Wayukisha wafunjishishenga’mba baana banji ba bwanga bafwainwa kwingijilanga bakwabo. Kechi wakebelenga muntu kwitemwatu aye mwine ne. Kechi wakebelenga baana banji ba bwanga kulanguluka’mba banema bingi ne kuba’mba bafwainwa kwibengijilatu ne. Wakebelenga abo kwingijila bakwabo.

Nanchi luno lufunjisho kechi lwawama nenyi?— Nanchi ne obewa wafwainwa kwikala nobe Mufunjishi Wayukisha ne kwingijila bantu nyi?— Atweba bonse twakonsha kwibengijila bakwetu. Kino kikebaletela bingi lusekelo. Kabiji kyakilapo kuwama, kiletela Yesu ne Shanji lusekelo.

Kwingijila bantu kechi kyashupa ne. Kuji bintu byavula bingi byo wakonsha kwibobila bakwenu. Nga bintu ka byo wakonsha kwibakwashako bainobe? Bakubila bintu byavula bingi kabiji bobila ne bonsetu ba mu kisemi kyobe. Nanchi wafwainwa kwibakwashako nyi?— Bepuzhe.

Wakonsha kunengezha tebulu pa kujiila. Nangwa wakonsha kutola michiba panyuma ya kupwisha kuja. Banyike bamo bapyanga mu nzubo moba onse. Umvwe kewingile mingilo ijitu yonse ko kuba’mba ubena kwingijila bakwenu mambo ne Yesu naye byo byo aubilenga.

Nanchi uji na bankasobe nyi? Yesu Mufunjishi Wayukisha waingijilanga baana banji ba bwanga. Umvwe kewingijile bankasobe ko kuba’mba ubena kulonda Yesu. Bintu ka byo wakonsha kwibobila?— Wakonsha kwibakwashako kubwezha tubintu twabo twakukaisha mo twikala panyuma ya kupwisha kukaisha. Nangwa wakonsha kwibavwikako. Kabiji wakonsha kwibanshikilako mwanya. Nanchi kujipo bintu bikwabo byo wakonsha kwibobila nyi?— Bakakutemwa bingi umvwe ke wibengijile, byonka baana ba bwanga byo bamutemenwe Yesu.

Ne ku sukulu nako wakonsha kwingijila bakwenu. Wakonsha kwingijila bakwenu baana basukulu nangwa bafunjishi bobe. Umvwe mukwenu waponesha mabuku, kyawama bingi kumutolelako. Wakonsha kukwashako mufunjishi obe kufuta pa kipabi mu sukulu nangwa kumukwashatu mu mingilo ikwabo. Nangwatu kushinkwilako mukwenu kinzhilo ke kintu kyawama bingi.

Kimye kimo, bantu kechi bakonsha nangwa kwitusanchilatu pa bintu byo twibobila ne. Nanchi kino kyakonsha kwitulengela kuleka kuba bintu byawama nyi?— Ine! Bantu bavula kechi bamusanchijile Yesu pa bintu byawama byo aubile ne. Pano bino, kino kechi kyamulengejile kuleka kuba byawama ne.

Onkao mambo, kechi twafwainwa kwikileka kwingijila bakwetu ne. Kimye kyonse twafwainwa kuvulukanga ne kulonda kya kumwenako kya kwa Yesu, Mufunjishi Wayukisha.

Tanga bino binembelo bikwabo byaamba pa kukwasha bantu, Byambo bya Mana 3:27, 28; Loma 15:1, 2; ne Ngalatiya 6:2.

[Kipikichala pa jipa 37]

Baana ba bwanga ba kwa Yesu bepachikilenga pa ka?

[Kipikichala pa jipa 39]

Lufunjisho ka Yesu lo afunjishishenga baana banji ba bwanga?

[Bipikichala pa jipa 40, 41]

Bintu ka byo wakonsha kwibakwashako bakwenu?