Kitango 20

Nanchi Kimye Kyonse Ukeba Kwikala Mutanshi Nyi?

NANCHI wayukapo muntu umo ukebatu kimye kyonse kwikala mutanshi nyi?— Wakonsha ne kushinjika mukwabo pa kuba’mba ekale mutanshi pa munongo. Wakimonapo kala kino na kubiwa nyi?— Mufunjishi Wayukisha naye wamwene bakulumpe bakebelenga kwikala batanshi, nangwa kwikala pa bifulo bya buneme. Kino kechi wikitemenwe ne. Leka tumone byo kyajinga.

Baibolo witubula’mba Yesu bamwichile ku kijiilo kikatampe ku nzubo ya Mufaliseo, mukulumpe wa bupopweshi. Byo afikile, wamwenenga benyi bakwabo nabo kasa batwela ne kwisajila abo bene bipona bya buneme. Onkao mambo wibashimikizhepo jishimikila aba baichilwe ku kijiilo. Ukeba nkubule nyi?—

Yesu waambile’mba: ‘Umvwe muntu wa kwita ku kijiilo kya masongola, kange wikale mu kipona kya buneme ne.’ Nanchi wayuka Yesu kyo aambijile bino nyi?— Waambile’mba mambo muntu wa buneme naye bakonsha kumwita. Byonka byo ubena kumona pa kikye kipikichala, mwina kijiilo wakonsha kwamba’mba: ‘Fumaipo pekale babe, anweba yainga popa.’ Nga awa mwenyi wakonsha kumvwa byepi?— Wakonsha kumvwa bumvu mambo bakwabo bonse bakonsha kumwimbwilatu meso pa kutuntulukila pa kipona kyapela.

Yesu wibabujilenga amba kechi kyawama kukeba bipona bya buneme ne. Waambile’mba: ‘Kabiji inge bakwita ku kijiilo kya masongola, yanga wikale pa kipona kyapela. Kabiji aye mwine wa kwita wakonsha kwiya ne kukwambila’mba: “Mukwetu, tuntulukila ku kyanema.” Abyo ukamona buneme ku meso a bakwenu bonse bo waikala nabo na kuja, pa kutuntulukila pa kipona kya buneme.’—Luka 14:1, 7-11.

Nanchi wayuka kishinka kyaambilengapo Yesu nyi?— Leka twisambe pa kya kumwenako. Twambe’mba uji pa munongo wa bantu babena kupatama mu sakya. Nanchi wafwainwa kunyema ne kuya na kwikala pa kipona waleka mukulumpe kasa aimanatu nyi?— Umvwe wauba bino, nanchi Yesu wakonsha kumvwa bulongo nyi?—

Muntu umo wakonsha kwamba’mba Yesu kechi utakotu nangwa muchima ku bintu byo tuba ne. Nanchi ibyo nyi?— Yesu byo ajinga pa kijiilo kikatampe ku nzubo ya Mufaliseo, wamwenenga bantu saka besajila bene bipona pa kwikala. Nanchi ne ano moba kechi byo byo oba nenyi?— Yesu byo aji mwiulu, kyapela bingi kwitumona.

Umvwe muntu keakebe kwikala mutanshi, kyakonsha kuleta bingi makatazho. Javula pekala lutobo, kabiji bantu bazhingila bingi. Kimye kimo kino kimweka umvwe baana baji pa lwendo na sakya. Aku bashinkulatu binzhilo bya sakya, banyike bakebatu kwikala batanshi. Bakeba bipona byawama, abya biji pepi na mabenkele. Ki ka kyakonsha kumweka?— Ee, bakonsha kwizhingijisha.

Kukeba kwikala mutanshi kwakonsha kuleta bingi makatazho. Kwaletejile batumwa ba kwa Yesu makatazho. Byonka byo twafunjile mu Kitango 6 kya uno buku, bepachikilenga abo bene amba mukulumpe wabo ñanyi. Nga Yesu waubilepo byepi?— Ibyo, wibakwashishe. Palutwe kacheche, batendekele kwipachika jibiji. Twaya tumone byo kyajinga.

Batumwa ne bantutu bakwabo bayilenga ne Yesu ku Yelusalema kimye kyapeleleko. Yesu wibabujilenga pa Bufumu bwanji, onkao mambo ba Yakoba ne Yoano balangulukilenga bya kulama nanji mu bufumu. Nabo babujileko ne inabo aye Salome. (Mateo 27:56; Mako 15:40) Byo bayilenga ku Yelusalema, Salome waishile kwi Yesu ne kufukama, kabiji waambile’mba bamukwasheko.

Yesu wamwipwizhe’mba “Usaka ka?” Salome waambile’mba ukeba baana banji bakekale ne Yesu mu Bufumu bwanji, umo ku kilujo kyanji ne mukwabo naye ku kipiko. Nga batumwa bakwabo jikumi byo baumvwine kintu kyalombele bainanji Yakoba ne Yoano, walanguluka’mba baumvwine byepi ku muchima?—

Ee, bebazhingijishe bingi kwi ba Yakoba ne Yoano. Onkao mambo Yesu wibajimwineko batumwa banji bonse. Yesu wibambijile’mba bandamakyalo ba panopantanda bakeba bukulumpe ne munema. Bakeba kwikala pa bifulo bikatampe kuba’mba bantu bonse bebanemekenga. Bino Yesu wabujilenga baana banji ba bwanga amba kechi byo byo bafwainwa kwikala ne. Waambile’mba: “Aye usaka kwikala mutanshi mwi anweba, ekale muzha wenu.” Aki kilangulukepotu kino!—Mateo 20:20-28.

Nanchi wayuka mwingilo wa muzha nyi?— Wingijila bakwabo kwakubula aye kuketekela kumwingijila ne. Wikala pa kifulo kyakepa kechi kikatampe ne. Wimwesha amba wakepa kukila bakwabo. Kabiji Yesu waambile’mba awa usaka kwikala mutanshi wafwainwa kwingijila bakwabo.

Nga kino kilumbulula ka kwi atweba?— Nanchi muzha wakonsha kwipachika na nkambo yanji pa wafwainwa kwikala pa kipona kya buneme nyi? Nangwa kwipachika pa ye bakonsha kutendekelapo kupa bya kuja nyi?— Yesu walondolwele’mba muzha patanshi ukyuba bintu bya nkambo yanji.—Luka 17:7-10.

Onkao mambo, mu kifulo kya kukebanga kwikala batanshi, nanchi twafwainwa kuba ka?— Ee, twafwainwa kwingijilanga bakwetu. Ko kuba’mba kimye kyonse kubanga byo bakeba. Kino kimwesha’mba twibanemeka. Ñanyi mashinda o wakonsha kubilangamo bintu bikeba bakwenu?— Mona pa peja 40 ne 41, paambiwa mashinda amo a kwibengijilamo bakwenu.

Vuluka kuba’mba Mufunjishi Wayukisha waingijilanga bakwabo. Juba japeleleko jo ajinga na batumwa banji, wafukamine panshi ne kovwa maulu abo. Umvwe ke twibengijile bakwetu, tukamutokeshanga ku muchima Mufunjishi Wayukisha ne Shanji, aye Yehoba Lesa.

Twaya tutange Binembelo bikwabo byaamba’mba twafwainwa kwingijilanga bakwetu: Luka 9:48; Loma 12:3; ne Filipai 2:3, 4.

[Kipikichala pa jipa 107]

Wakimonapo kala bantu bakeba kwikala batanshi nyi?

[Bipikichala pa jipa 108, 109]

Lufunjisho ka Yesu lo afunjishenga kimye kyo aambile pa boba bakeba kwikala batanshi nangwa pa bipona bya buneme?

[Kipikichala pa jipa 110]

Salome wakebelenga ka kwi Yesu, kabiji ki ka kyafuminemo?