Funjishainga Baana Benu

Batelwanga Amba “Baana Batatauka Nobe Mvula”

INGE mvula wa kinkunkwila keanoke, mwakonsha kumvwa byo abena kutatauka. Abya wakyumvwapo kala moyo nyi?—a Yesu watelele baana banji ba bwanga babiji amba “Baana Batatauka Nobe Mvula.” Twayai tuyuke kyalengejile kwibatela bino.

Bano baana ba bwanga babiji bakwa Yesu ke ba Yakoba ne Yoano. Bajinga bankasa ne kolo, baana ba balume ba kwa Zebede ne mukazhanji Salome. Salome wajinga nkasa kwi inanji Yesu aye Maliya. Onkao mambo, Yesu, Yakoba ne Yoano bajinga bankasa ne kolo kabiji betemenwe bingi byo bakomejilenga pamo.

Zebede, Yakoba ne Yoano bakwatanga masabi. Yakoba ne Yoano bo bajinga pa boba batanshi bo basajile kwi Yesu kwikala baana banji ba bwanga. Byo ebechile, ponkapo bashile mwingilo wabo wa kukwata masabi ne kumulondela. Palutwe kacheche, Yesu wasajile baana ba bwanga 12 kwikala batumwa banji. Yakoba ne Yoano bajinga pa bano batumwa.

Byo kwashajile bañondo bacheche kuba’mba Yesu bamwipaye, aye ne batumwa banji bayilenga ku ntanda ya mitumba ya Samaliya. Bwaijile kabiji bonse bakokele. Bino bena Samaliya baambile’mba kechi bakebelenga Yesu ne batumwa banji kulajila mu yewa muzhi wabo ne. Nanchi wayuka kyalengejile nyi?— Twaya tumone.

Yesu ne batumwa banji bajinga Bayudea, kabiji Bayudea bavula beshikilwe na bena Samaliya. Pano bino Yesu aye kechi wibashikilwe ne. Wibatele muchima, kabiji Yakoba ne Yoano nabo byo bafwainwe kuba. Bino bano baana ba bwanga babiji bazhingijile pa byaambilenga bena Samaliya bakaine kwibatambwila, kabiji kino kibalengejile kwipuzha Yesu amba: ‘Nkambo, nanchi mubena kukeba amba twambile mujilo afume mwiulu ne kwibepaya nyi?’ Walanguluka amba Yesu waambile’mba ka?— Wibambijile amba batamishe pa kwamba bino byambo byatama. Yakoba ne Yoano bakebewenga kufunda bya kumwesha lusa.

Lukatazho lukwabo lwajinga na Yakoba ne Yoano ke lwa kukeba kwikala batanshi ne kwimona nobe banema kukila bakwabo. Byo kwashajiletu kimye kicheche kuba’mba Yesu afwe, baambijile bainabo kuya kwi Yesu na kumwambila amba: “Ambilai bano baana bami babalume babiji bakekale umo ku kilujo kyenu, mukwabo ku kipiko kyenu mu Bufumu bwenu.” Pano batumwa bakwabo jikumi byo baumvwine byaubile Yakoba ne Yoano, bazhingijile. Nanchi ne obewa wakonsha kuzhingila nyi?—

Wakonsha kuzhingila. Kechi tumvwa bulongo inge bakwetu bakeba kwikala batanshi ne kwimona nobe banema kukila bakwabo ne. Palutwe kacheche, Yakoba ne Yoano bayukile amba batamishe pa byo baubile ne pa kubula kumwesha lusa, kabiji bapimpwile byubilo byabo. Baikele batumwa bajinga bingi na butemwe ne lusa. Twakonsha kufunjilako ka ku kino?—

Kyo twakonsha kufunjilako kwi Yesu ke kya kuba’mba ne atweba twafwainwa kwiubilanga lusa. Yesu waubanga byawama ku bantu, ko kuba’mba ku banabalume, banabakazhi ne baana. Nanchi ne obewa wibikangako kumwena kwi aye ne kuba byo aubanga nyi?—

Tangai mu Baibolo Wenu

Mako 3:17

Mateo 27:55, 56; Mako 15:40, 41

Mateo 4:18-22

Yoano 4:4-15, 21-26; Luka 9:51-55

Mateo 20:20-24; Mako 10:35-37, 41

[Tubyambo twa mushi]