Banabalume Banembele pa Bwikalo bwa kwa Yesu

Wibamona banabalume baji pa kipikichala nyi?— Bano banabalume ke ba Mateo, Mako, Luka, Yoano, Petelo, Yakoba, Yuda ne Paulo. Bano banabalume bonse bajingako kimye Yesu kyo ajinga pano pa ntanda, kabiji banembele pa bwikalo bwa kwa Yesu. Twaya tufunde byavula pa bano bantu.

Basatu bajinga batumwa basapwijilenga ne Yesu. Wibayuka bano banabalume basatu nyi?— Mateo, Yoano ne Petelo. Mutumwa Mateo ne mutumwa Yoano bamuyukile bingi bulongo Yesu, kabiji bonse babiji banembele pa bwikalo bwa kwa Yesu. Mutumwa Yoano wanembele ne buku mukwabo utelwa’mba Lumwekesho ne makalata asatu atelwa’mba, Nkalata Itanshi ya kwa Yoano, Nkalata ya Bubiji ya kwa Yoano, ne Nkalata ya Busatu ya kwa Yoano. Mutumwa Petelo wanembele makalata abiji aji mu Baibolo. Ano makalata atelwa’mba, Nkalata Itanshi ya kwa Petelo ne Nkalata ya Bubiji ya kwa Petelo. Mu nkalata yanji ya bubiji, Petelo wanembele pa kimye Yehoba kyo aambile kufuma mwiulu ne kwamba pe Yesu amba: ‘Uno ye mwanami. Namutemwa, kabiji mo mo mwena lusekelo.’

Banabalume bakwabo baji pa kipikichala nabo betufunjisha pe Yesu mu mabuku o banembele. Umo pa bano ke Mako. Kyamweka nobe Mako wajingapo kimye Yesu kyo bamukwachile kabiji wamwene ne byonse byaubiwenga. Mukwabo wajinga Luka. Luka wajinga dokotala kabiji kampe waikele mwina Kilishitu kimye Yesu kyo afwile.

Bakwabo banabalume banembele mabuku a mu Baibolo bo ubena kumona pa kipikichala bajinga bankasanji Yesu. Wibayuka mazhina abo nyi?— Mazhina abo ke Yakoba ne Yuda. Patanshi, kechi baitabijile mwi Yesu ne. Balangulukilenga ne kuba’mba Yesu wakonya. Pano bino, mu kuya kwa kimye baikele bena Kilishitu.

Muntu wapelako wanembele mabuku a mu Baibolo ye ubena kumona pa kipikichala ke Paulo. Saka akyangye kwikala mwina kilishitu, watelwanga’mba Saulo. Wapachile bingi bena Kilishitu kabiji wibamanyikilenga. Wayuka kyalengejile Paulo kwikala mwina Kilishitu nyi?— Juba jimo, Paulo wayilenga ku Damasakasa, kabiji ponkapotu waumvwine jiwi ja muntu jibena kumwita kufuma mwiulu. Yesu ye wamwichilenga. Yesu wamwipwizhe Paulo amba: ‘Mambo ka o ubena kuyanjisha bantu bangitabila?’ Panyuma ya bino, Paulo waalukile ne kwikala ke mwina Kilishitu. Paulo wanembele mabuku a mu Baibolo 14, kutendekela pa buku wa Loma kufika ku buku wa Bahebelu.

Tutanga Baibolo pa juba pa juba, ke ibyo nenyi?— Tufunda byavula pe Yesu kupichila mu kutanga Baibolo. Abya ukeba kufunda byavula pe Yesu nyi?—