Kitango 30

Bintu Byakonsha Kwitukwasha Kushinda Moyo

NANCHI kyapela kwingijila Yehoba nyi?— Mufunjishi Wayukisha kechi waambile’mba kyapela ne. Yesu saka bakyangye kumwipaya, waambijile batumwa banji amba: “Inge ba panopantanda bemushikwa, mwayuka’mba, babangijile kunshikwa amiwa.”—Yoano 15:18.

Petelo witotele amba kechi ukamusha Yesu ne, bino Yesu waambile’mba Petelo ukamukana jisatu amba kechi wamuyuka ne. Kabiji Petelo byo byo aishile kuba! (Mateo 26:31-35, 69-75) Nga kintu kya uno mutundu kyaubijiwe ka?— Kyaubiwe mambo Petelo waumvwine moyo byonka byaubile ne batumwa bakwabo.

Nanchi wayuka kyalengejile batumwa kumvwa moyo nyi?— Bakankelwe kuba kintu kimo kyanema bingi. Umvwe twayuka kino kintu, kyakonsha kwitulengela kwingijila Yehoba nangwa pekale kya byepi nangwa byepi. Patanshi twafwainwa kukipituluka mu byamwekele pa juba japeleleko ja bumi bwa kwa Yesu byo ajinga na batumwa banji.

Patanshi bakijiile kijiilo kya lupitailo. Kino kyajinga kijiilo kyo bajanga pa mwaka pa mwaka mu kuvululako bantu ba Lesa byo bapokolwelwe mu buzha ku Ijipita. Kabiji Yesu watendekeshe ne kijiilo kikwabo kyo ajiile na batumwa banji. Tukesambapo pa kino kijiilo mu kitango kiji kulutwe ne kumona byo kitulengela kumuvuluka Yesu. Panyuma ya kijiilo ne kwamba byambo bya kukosesha batumwa banji, Yesu wibatangijile ku bujimi bwa Ngesemani. Ino yajinga mpunzha yawama bingi ko bayanga kimye kyonse.

Byo bafikile mu bujimi, Yesu waendeleko pacheche ne kutendeka kulomba. Waambijile ne ba Petelo, Yakoba, ne Yoano kuba’mba balombenga. Bino abo balajile. Bimye bisatu Yesu byoaile na kulomba ne kubwela, watainenga Petelo ne bakwabo kasa balaala! (Mateo 26:36-47) Nanchi wayuka ene mambo o bafwanyijilwe kulabilanga ne kulomba nyi?— Akitwaya twisambepo pa kino.

Yudasa Isakaliota naye wajinga pamo ne Yesu ne batumwa bakwabo kimye kya kijiilo kya Lupitailo. Inge ukivuluka, Yudasa waalukile ke ngivi. Kabiji ye wamusolwele Yesu. Wayukile mpunzha Yesu po apwilanga na batumwa banji mu bujimi bwa Ngesemani. Yudasa wakasendele bashilikale kuba’mba bamukwate. Byo bafikile, Yesu wibepwizhe amba: “I ñanyi ye mukeba?”

Bashilikale bakumbwile’mba: “Yesu.” Yesu kechi waumvwine moyo ne, onkao mambo wibakumbwile’mba: “Amiwa bano.” Bashilikale bakuminye bingi pa kumona Yesu byo achinchikile kabiji pa kubwela lunyuma baponene panshi. Yesu wibambijile amba: ‘Inge mubena kunkeba amiwa, muleke batumwa bami bakiye.’—Yoano 18:1-9.

Bashilikale byo bamukwachile Yesu ne kumukasa maboko, batumwa baumvwine bingi moyo ne kunyema banyemene. Pano bino ba Petelo ne Yoano bakebelenga kuyuka kibena kubiwa, onkao mambo balondejilenga katwezhimina. Yesu bakamufikizhizhe ku kipango kya Kaifasa, ñanga mukatampe. Mambo a kuba’mba Yoano bamuyukile kwi ñanga mukatampe, bakalama bamutwezhezhe mu kipango ne Petelo pamo.

Bañanga bapwijile mu kipango kya kwa Kaifasa ne kwikala kije. Bakebelenga’mba Yesu bamwipaye. Onkao mambo baletele batumonyi bakumushiina bya bubela. Bantu bamupuminenga binkonyi ne makapila. Bino byonse byo byaubiwenga, Petelo naye saka ajitu kipikipi.

Ba Petelo ne Yoano byo batwelele, awa kamwale walaminenga kibelo wamuyukile Petelo. Waambile’mba: “Ne anweba mwaji na Yesu!” Bino Petelo wakaine amba kechi wamuyuka Yesu ne. Byo papichiletu ka kimye kacheche, kamwale mukwabo wamumwene Petelo ne kwambila aba baimene kipikipi amba: “Uno naye wajinga na Yesu.” Napotu Petelo wakaine amba kechi wamuyuka ne. Kabiji pa kupitapo kimye kicheche, aba baimene ponka bamumwene Petelo ne kumwambila amba: “Kine anweba mwi wa kwabo.” Petelo wakaine ja busatu ne kwamba’mba: “Amiwa kechi na muyuka ao muntu ne!” Petelo wachipile ne kuchipa amba ubena kwamba kya kine, kabiji Yesu waalulukile ne kumutala.—Mateo 26:57-75; Luka 22:54-62; Yoano 18:15-27.

Nanchi wayuka kyamulengejile Petelo kubepa nyi?— Ee, mambo waumvwine moyo. Ki ka kyamulengejile kumvwa moyo? Ki ka kyo akankelwe kuba kyafwainwe kukosesha lwitabilo lwanji? Akimona byaubile Yesu. Pa kuba’mba achinchike, waubile ka?— Walombele kwi Lesa, kabiji Lesa wamukwashishe kuba’mba achinchike. Kabiji vuluka kuba’mba Yesu waambijile Petelo jisatu amba alombenga ne kulaba ne kukenkenta. Pano ki ka kyamwekele?—

Petelo walajilengatu kimye kyonse. Kechi walombelenga nangwa kulaba ne. Onkao mambo bamubazhimwinetu kimye kyo bakwachile Yesu. Petelo waumvwine bingi moyo byo bamutotolwesheshenga Yesu ne kwamba’mba bamwipaye. Nangwa byonkabyo, panyuma kacheche Yesu waambijile batumwa banji kuketekela ka?— Yesu wibabujile’mba byonkatu ba panopantanda byo bamupata, nabo bakebapata.

Pano twaya twisambe byakonsha kwitumwekela byonka byo kyajinga kwi Petelo. Twambe amba uji mu sukulu kabiji bakwenu batendeka kwamba bintu byatama bya kunena bantu babula kupana mushingi ku mbandela nangwa babula kusekelela kiminshiminshi. Umvwe bakwipuzha amba: “Nanchi kya kine kuba’mba kechi upana mushingi ku mbandela nenyi? Nangwa bakonsha kwamba’mba: “Obewa kechi usekelela kiminshiminshi ne!” Nanchi wafwainwa kumvwa moyo pa kwibabula bukine nyi?— Nanchi wakonsha kubepa byonka byaubile Petelo nyi?—

Palutwe kacheche, Petelo waumvwine bingi kutama ku muchima amba wamukana Yesu. Byo avulukile kyo aubile, waile pangye na kujila. Ee, wabwelele jibiji kwi Yesu. (Luka 22:32) Pano akilangulukapo pa kino. Ki ka kyakonsha kwitukwasha kubula kumvwa moyo ne kwamba bintu nabiji byaambilepo Petelo?— Petelo wakankelwe kulomba ne kulaba. Onkao mambo twafwainwa kuba byepi pa kuba’mba twikale baana ba bwanga ba Mufunjishi Wayukisha?—

Twafwainwa kulombanga bukwasho bwa Yehoba. Yesu byo alombele, nanchi wayuka Lesa kyo amubijile nyi?— Watumine malaika mu kumukosesha. (Luka 22:43) Nanchi bamalaika ba Lesa bakonsha kwitukwasha nyi?— Baibolo waamba’mba: “Malaika wa Yehoba, nobe nsakwa, wibazhokoloka bamwakamwa, ne kwibapokolola.” (Salamo 34:7) Pa kuba’mba Lesa etukwashe, twafwainwa ne kuba bintu bikwabo kechi kulombatu ne. Nanchi wayuka bintu bikwabo byo twafwainwa kuba nyi?— Yesu waambijile baana banji ba bwanga amba labainga mukenkentenga. Pa kuba’mba tube bino, ki ka kyakonsha kwitukwasha?—

Kyakonsha kwitukwasha ke kutelekesha kubibena kwambiwa kimye kya kupwila kwetu kwa bwina Kilishitu ne kumvwisha byo tutanga mu Baibolo. Kabiji twafwainwa ne kulombanga kwi Yehoba kimye kyonse kuba’mba etukwashe tumwingijilenga. Umvwe ke tube bino, uketukwasha kushinda moyo. Kabiji kiketuletelanga bingi lusekelo umvwe ke tufunjisheko bakwetu biji Mufunjishi Wayukisha ne Shanji.

Byo tukeba kuba byawama, bino binembelo byakonsha kwitukwasha kubula kwikala na moyo wa kuchina bantu: Byambo bya Mana 29:25; Yelemiya 26:12-15, 20-24; ne Yoano 12:42, 43.

[Kipikichala pa jipa 159]

Mambo ka ba Petelo, Yakoba, ne Yoano o bafwainwe kulabilanga?

[Kipikichala pa jipa 160]

Mambo ka Petelo kyo aumvwijile moyo kya kuba wakana ne kukana amba kechi wamuyuka Yesu ne?

[Kipikichala pa jipa 160]

Ne obewa wakonsha kupita byepi mu lukatazho nobe lwapichilemo Petelo?