Mwipwa wa kwa Paulo Kechi Wajinga na Moyo Ne

Twaya tufunde pa mwanyike wamulume wapulwishe ba mwisho wanji. Bamwisho wanji bo apulwishe ke mutumwa Paulo. Nangwa kya kuba kechi twayuka jizhina ja uno mwanyike ne, pano bino, twayuka kuba’mba waubile kintu kimo kimwesha’mba kechi wajinga na moyo ne. Ubena kukeba kuyuka kyo aubile nyi?—

Paulo wajinga mu kaleya mu Yelusalema. Bamukashile na mambo a kusapwila pe Yesu. Banabalume bamo batama michima kechi bamutemenwe Paulo ne, onkao mambo, balangulukilepo jishinda jimo ja kumwipayilamo. Baambile amba: ‘Twayai twambile mukulumpe wa bashilikale kuba amba ambile bashilikale bakatwale Paulo ku kije. Kabiji atweba tukamubelamina Paulo, pa kuba’mba kimye kyo akapitanga tukamwipaye.’

Mwipwa wa kwa Paulo waumvwine byo bakebelenga kuba bano bantu batama michima. Waubile byepi? Wayile ku kaleya na kubuula Paulo kino kintu. Ponkapotu Paulo wamutumine kuya na kubuula mukulumpe wa bashilikale kino kintu kyatama kya kebelenga kuba bano bantu. Ubena kulanguluka’mba kyamupelejile uno mwipwa wa kwa Paulo kuya na kwisamba na mukulumpe wa bashilikale nyi?— Ine, kechi kyapelele ne, mambo mukulumpe wa bashilikale wajinga muntu ye banemekele bingi. Bino mwipwa wa kwa Paulo kechi waubile moyo ne, wayile na kwisamba na uno mukulumpe wa bashilikale.

Uno mukulumpe wa bashilikale wafuukwilepo bya kuba. Watumine bashilikale nobe 500 kuya na kuzhikijila Paulo. Kabiji wibambijile kutwala Paulo ku Kesalea bufuku. Nanchi Paulo wapulukile nyi?— Ee, bantu bakebelenga kumwipaya kechi bamwipayile ne.

Wakonsha kufunjilako ka ku jino jishimikila?— Ne obewa kechi wakonsha kuba moyo ne, byonka byaubile mwipwa wa kwa Paulo. Kechi twafwainwa kuba moyo pa kusapwila byambo bya Yehoba ne. Abya usakutwajijila na kusapwila bantu byambo bya Yehoba kwa kubula moyo nyi?— Inge wauba bino, wakonsha kupulusha bantu.