Kitango 113

Wibafunjishe Kwipelula pa Kijiilo kya Lupitailo Kyapeleleko

BA PETELO ne Yoano byo balondejile mikambizho ibapele Yesu, bafikile mu Yelusalema na kunengezha kwa kujiila Kijiilo kya Lupitailo. Kyamweka Yesu pamo na batumwa jikumi bafikile mabanga. Juba byo jayilenga na kuzhika, Yesu ne batumwa banji bafuminenga ku Mutumba wa Olebeta. Jino jo juba japeleleko mute Yesu jo amwene yewa muzhi byo ajinga ku uno mutumba poso byo asangwilwe.

Ponkapo Yesu ne bo ajinga nabo bafikile mu muzhi ne kuya ku nzubo ko bajiijile Kijiilo kya Lupitailo. Bayile mu kibamba kya peulu mo bataine byonse banengezha kala mwa kujiila Kijiilo kya Lupitailo. Yesu wakebeshe bingi kutanwa ku kino kijiilo byonka byo aambile’mba: “Nakebesha bingi kuja kino Kijiilo kya Lupitailo ne anweba saka nkyangye kumanama.”

Mwayijile kisho, bantu batanwanga ku Kijiilo kya Lupitailo batomanga tutomeno tuna twa binyu. Yesu byo atambwile katomeno ka busatu, walombele ne kwamba’mba: “Tambulai kano katomeno mushilañane, mambo nemwambila namba: Kufuma lelo, kechi nkatoma nenu bino binyu ne, poso Bufumu bwa Lesa bukafike.”

Kimye kyo bajiilenga, Yesu waimene ne kuvuula bivwalo byanji bya peulu kabiji washikwile kisapi kya kwishimunako ne kwikitumpika mu mema. Muntu watambwila mwenyi ye waovwanga ku maulu a mwenyi ye atambwila. Pano bino, byo kyajinga kuba’mba pa joja juba kafwako wamutambwijile ne, Yesu ye waingijile yewa mwingilo. Umo wa mu batumwa wafwainwe kwingila uno mwingilo; pano bino, kampe na mambo a kukeba bukulumpe pakachi kabo, kafwako nangwa umo waubile kino ne. Baumvwine bingi bumvu Yesu byo atatwile kwibovwa ku maulu.

Yesu byo afikile pajinga Petelo, Petelo wakaine amba: “Kechi musakungovwa ku maulu ne.”

Yesu wamwambijile amba: “Umvwe mbule ku kovwa, kechi usakwikala ne amiwa ne.”

Petelo waambile’mba: “Nkambo, kechi mungovwetu ku maulu konka ne, mungovwe ne ku maboko ne ku mutwe pamo.”

Yesu wamubujile amba: “Awa waowa kala kechi ukebewa kowa jibiji ne, poso ku maulu anji konka, mambo mubiji yense watoka. Ne anweba mwatoka, bino kechi bonsetu ne.” Waambile bino mambo wayukile’mba Yudasa Isakaliota ubena kulanguluka kumusolola.

Yesu byo apwishishe kovwa batumwa banji 12 ku maulu kuvwangakotu ne maulu a yewa wamusolwele, aye Yudasa, wavwajile bivwalo byanji bya peulu ne kwikala jibiji ku tebulu. Kepo ebashikishe amba: “Nanchi mwakwatakanya kintu kyo nemubila nyi? Anweba muntela amba, ‘Mufunjishi,’ ne, ‘Nkambo,’ mwamba kine, mambo yami iye. Onkao mambo, umvwe amiwa byo nji Nkambo ne Mufunjishi, nemovwa ku maulu, ne anweba mwafwainwa kwiovwanga ku maulu anwe bene na bene. Mambo nemushila mwakulondela, byonka byo nauba kwi anweba, ne anweba mwafwainwa kubanga byonka bino. Kine nemwambila namba, Muzha kechi wakila nkambo yanji ne, nangwatu yewa ye batuma kechi wakila yewa wamutuma ne. Umvwe anweba mwibiyuka bino bintu, mwatokwa umvwe mwibyuba.”

Kine luno ke lufunjisho lwanema bingi pa mambo a kwingila mwingilo wa kwipelula! Batumwa kechi bafwainwe kukebanga bifulo bitanshi ne kulanguluka amba banema kabiji amba bakwabo bo bafwainwe kwibengijilanga ne. Bafwainwe kulondela byaubile Yesu. Kino kechi kyajinga kisho kya kowa ku maulu ne. Bino wajinga mwingilo wa kwipana kwingijila bakwabo kwa kubula misalululo nangwa kya kuba awo mwingilo wamwekelenga nobe kechi wanema ne. Mateo 26:20, 21; Mako 14:17, 18; Luka 22:14-18; 7:44; Yoano 13:1-17.

▪ Yesu wamwene byepi Yelusalema byo atwelelenga mu muzhi na kutanwa ku Kijiilo kya Lupitailo?

▪ Kimye kya Kijiilo kya Lupitailo, ñanyi katomeno ko apele batumwa banji 12 panyuma ya kulomba?

▪ Ñanyi mwingilo muntu watambwila benyi ye aingilanga kimye Yesu kyo ajinga pano pa ntanda, kabiji mambo ka uno mwingilo kyo babujile kumwingila pa Kijiilo kya Lupitailo kyavulukilenga Yesu ne batumwa banji?

▪ Mambo ka Yesu o aingijile yewa mwingilo wamwekelenga kubula kunema wa kovwa batumwa banji ku maulu?