Kijiilo Kya Lupitailo Kya Kwa Yesu Kyapeleleko Kyafwenyenye Pepi

Yesu wapwishishe kufunjisha batumwa banji bana pa Mutumba wa Maolivi, ne kukumbula mepuzho abo pa kiyukilo kya kwikalapo kwanji ne mpelo ya buno bwikalo.

Yesu wapayankene bingi pa jije juba ja Nisanyi 11. Kampe kimye kyo abwelele ku Betani bufuku, Yesu po po abuujile batumwa banji amba: “Mwayuka’mba kwashalatu moba abiji kwikala na Kijiilo kya Lupitailo, kabiji Mwana muntu bakamupana’mba bakamwipayile pa kichi.”—Mateo 26:2.

Kyamweka pa juba jalondejilepo ja pa Kisatu Yesu waikele na batumwa banji kwazhindama. Pa Kibiji, Yesu wakajipijile bantangi ba bupopweshi ne kusolola bubi bwabo patoka. Bano bantu bakebelenga kumwipaya. Onkao mambo, pa Nisanyi 12 kechi wamwekele ku bantu ne, mambo kechi wakebele kumulengela kubula kusekelela bulongo Kijiilo kya Lupitailo na batumwa banji pa juba jalondejilepo mabanga ku ntendekelo ya juba ja Nisanyi 14 ne.

Bino bañanga bakatampe ne bakulumpe kechi baikeletu na kupembela Kijiilo kya Lupitailo ne. Bakonkene pamo mu kipango kya ñanga mwine mukatampe aye Kaifasa. Mambo ka? Bazhingijile mambo Yesu wasolwele bubi bwabo patoka. Pano, baumvwañene’mba “bakwate Yesu mu bujimuku ne kumwipaya.” Bakonsheshe kuba byepi bino, kabiji ñanyi kimye? Baambile’mba: “Kechi twafwainwa kumukwata pa juba ja kijiilo ne, pa kuba’mba bantu bakabule kuleta kiwowo.” (Mateo 26:4, 5) Bachiine mambo Yesu bamutemenwe ku bantu bavula.

Bantangi ba bupopweshi byo bakilangulukilenga byatama bya kwipaya Yesu, batambwijile mwenyi. Uno mwenyi wajinga umo wa mu batumwa ba kwa Yesu, aye Yudasa Isakaliota ye babikilemo milanguluko yatama kwi Satana ya kusolola Nkambo yanji! Yudasa wibashikishe’mba: “Musakumpa ka umvwe nemusolweleye.” (Mateo 26:15) Abo basekejile bingi kabiji bamwambijile “kumupa mali a siliva.” (Luka 22:5) Mali anga? Baumvwañene kumupa mali a siliva 30. Mashekele a siliva 30 o mali o bapotelangapo muzha. (Kulupuka 21:32) Pa kupana ano mali acheche, bantangi ba bupopweshi bamwesheshe’mba kechi banemekele Yesu ne. Ponkapo Yudasa “watendekele kukeba jishinda jawama ja kumusolwelamo kwi abo kwabula jibumba.”—Luka 22:6.

Juba ja Nisanyi 13 jatatwile pa Kisatu pa kuzhika juba, kabiji jino jo jajinga juba ja butanu na jimo kabiji japeleleko Yesu kwikala mu Betani. Juba jalondejilepo, batwajijile na kunengezha Kijiilo kya Lupitailo. Bakebele mwana mukooko ne kumwipaya kabiji bamosheletu yense juba ja Nisanyi 14 byo jatendekele. Kwepi ko bafwainwe kujiila kino kijiilo kabiji bañanyi bafwainwe kwikinengezha? Yesu kechi wakibabuujile byonse ne. Onkao mambo, Yudasa wakankelwe bya kuya na kubuula bañanga bakatampe.

Kyamweka pa Kina mute Yesu watumine Petelo ne Yoano kufuma ku Betani ne kwibambila’mba: “Yainga mukanengezhe ko tusakujiila Kijiilo kya Lupitailo.” Abo bamwipwizhe’mba: “Kwepi ko mubena kukeba’mba twikinengezhezhe?” Yesu wibakumbwile’mba: “Byo musakutwela mu muzhi, muntu wasenda mulondo wa mema usakwimusambakana. Mumulondele mu nzubo yo asakutwelamo. Kabiji mwambile mwina nzubo amba, ‘Mufunjishi waamba’mba: “Kwepi kuji kibamba kya benyi ko nsakujiila Kijiilo kya Lupitailo na baana bami ba bwanga?”’ Kabiji uno muntu usakwimumwesha kibamba kikatampe kya peulu kyo banengezha bulongo. Mo mo musakwikinengezhezha.”—Luka 22:8-12.

Kwa kubula nangwa kuzhinaukatu ne, awa mwina nzubo wajinga mwana wa bwanga wa kwa Yesu. Kyamweka watengejilenga Yesu kumulomba’mba bengijishe nzubo yanji kwikelamo na kino kijiilo. Bano batumwa babiji byo bafikile mu Yelusalema, bataaine bintu bebinengezha kala monka Yesu mo ebabuujile. Onkao mambo, bano babiji banengezhezhe mwana mukooko ne kumona’mba bintu bikwabo byonse bebinengezha bya kwingijisha aba bonse 13 batainwe ku Kijiilo kya Lupitailo, ko kuba’mba Yesu ne batumwa banji 12.