Kitango 112

Kijiilo kya Lupitailo kya kwa Yesu Kyapeleleko Kyafwenyenye Pepi

JUBA ja pa Kibiji Nisanyi 11 byo jajinga pepi kupwa, Yesu wapwishishe kufunjisha batumwa banji pa Mutumba wa Olebeta. Kine, aje juba wapayankene bingi! Kampe kimye kyo abwelele ku Betani bufuku wabujile batumwa banji amba: “Mwayuka amba kwashalatu moba abiji kwikala na Kijiilo kya Lupitailo, kabiji ne Mwana muntu bakamupana amba bamupope pa kichi.”

Kyamweka pa juba jalondejilepo pa Kisatu Nisanyi 12, Yesu waikele na batumwa banji kwazhindama. Pa juba jafumineko, wakajipijile patoka bantangi ba bupopweshi kabiji wayukile’mba bakeba kumwipaya. Onkao mambo, pa Kisatu kechi wamwekele ku bantu ne, mambo kechi wakebele kumulengela kubula kusekelela bulongo Kijiilo kya Lupitailo na batumwa banji pa juba jalondejilepo mabanga ne.

Pa kikye kimye, bañanga bakatampe ne bakulumpe bakonkene mu kipango kya ñanga mwine mukatampe aye Kaifasa. Byo bazhingijile na byambo bibambijile Yesu juba jafumineko, baumvwañene amba bamukwate mu bujimuku ne kumwipaya. Pano bino, baambañenenga bene amba: “Kechi twafwainwa kumukwata pa juba ja kijiilo ne, bantu bakaleta kiwowo.” Bachiinenga bantu, batemenwe Yesu.

Bantangi ba bupopweshi byo bakilangulukilenga byatama bya kwipaya Yesu, batambwijile mwenyi. Uno mwenyi wajinga umo wa mu batumwa ba kwa Yesu aye Yudasa Isakaliota ye babikilemo milanguluko yatama kwi Satana ya kusolola Nkambo yanji! Basekejile bingi Yudasa byo ebashikishe amba: “Musakumpa ka umvwe nemusolweleye?” Abo bamwambijile’mba basakumupa mali a siliva 30, mutengo ye bapotelangapo muzha kwesakana na lulayañano lwa Mizhilo ya Mosesa. Kufumatu joja juba, Yudasa wakebelenga jishinda ja kusolwelamo Yesu kwa kubula bantu kuyuka.

Nisanyi 13 yatatwile pa Kisatu pa kuzhika juba. Yesu wafumine ku Yeliko pa Kitanu, ko kuba’mba jino jajinga juba ja butanu na jimo kabiji japeleleko kwikala mu Betani. Juba jalondejilepo pa Kina, banengezhezhenga Kijiilo kya Lupitailo kyapeleleko kyatatwile pa kuzhika juba. Po po baipayile mwana mukooko wa Kijiilo kya Lupitailo ne kumoshatu yense. Kwepi ko bafwainwe kujiila kino kijiilo kabiji bañanyi bafwainwe kwikinengezha?

Yesu wajinga saka akyangye kwibabula bya kuba kampe wachiinenga Yudasa amba wakabula bañanga bakatampe kuba’mba bakakwate Yesu pa Kijiilo kya Lupitailo. Kyamweka pa Kina mute Yesu watumine ba Petelo ne Yoano kufuma ku Betani ne kwibambila’mba: “Yainga mukanengezhe kotusakujiila Kijiilo kya Lupitailo.”

Abo bamushikishe’mba: “Kwepi ko mubena kukeba amba twikinengezhezhe?”

Yesu walumbulwile’mba: “Byo musakutwela mu muzhi, basakwimusambakana ku muntu wasenda mulondo wa mema. Mumulondele mu nzubo yo asakutwelamo. Kabiji mwafwainwa kumwambila mwina nzubo amba, ‘Mufunjishi washikisha amba: “Kwepi kuji kibamba kya benyi konsakujiila Kijiilo kya Lupitailo na baana bami ba bwanga?”’ Uno muntu usakwimumwesha kibamba kikatampe kya peulu kyo banengezha bulongo. Mo mo musakwikinengezhezha.”

Kwa kubula nangwa kuzhinaukatu ne, awa mwina nzubo wajinga mwana wa bwanga wa kwa Yesu kampe watengejilenga Yesu kumulomba amba bengijishe aya nzubo yanji kwikelamo na kino kijiilo. Ba Petelo ne Yoano byo bafikile mu Yelusalema, bataine bintu bebinengezha kala monka Yesu mo ebabujile. Onkao mambo, bano babiji banengezhezhe mwana mukooko ne kumona’mba bintu bikwabo byonse bebinengezha bya kwingijisha aba bonse 13 batainwe ku Kijiilo kya Lupitailo, ko kuba’mba Yesu ne batumwa banji 12. Mateo 26:1-5, 14-19; Mako 14:1, 2, 10-16; Luka 22:1-13; Kulupuka 21:32.

▪ Ñanyi kintu Yesu kyo aubile pa Kisatu kabiji mambo ka?

▪ Ñanyi mwisambo ye besambilenga ku nzubo ya ñanga mwine mukatampe kabiji mambo ka Yudasa o ayijile ku bantangi ba bupopweshi?

▪ Bañanyi Yesu bo atumine ku Yelusalema pa Kina, kabiji wibatumijile ka?

▪ Ñanyi bintu byo bataine aba bo batumine byasolwele bulume bwa kwa Yesu bwa kuba bya kukumya?