Nanchi Mukivuluka Nyi?

Nanchi mwamwenamo mu kutanga Kyamba kya Usopa kyakatataka nyi? Monai inge mwakonsha kukumbula ano mepuzho:

• Lufunjisho ka lo tufunjilako kwi Yesu byo apulwishe Petelo kimye kyo atendekele kwibila pa mema? (Mat. 14: 28- 31)

Umvwe twamona amba mulongo wakepelwa lwitabilo, twakonsha kumukwata ku kuboko mu bukifwanyikizho ne kumukwasha kwikala na lwitabilo lukatampe. —9/15, peja 8.

• Yehoba waubilepo ka pa kwitupokolola?

Yehoba wachinchikile Mwananji byo bamumanyikilenga ne kumwendeleka. Kabiji byonka byo kyamwekejile ku muchima wa kwipana wajinga ne Abalahama wa kupana mwananji, Yehoba wachinchikile Mwananji byo bamwipayile nobe kapondo. —9/15, mapeja 28-29.

• Byambo biji mu Byambo bya Mana 24:27 bitufunjishapo ka pa mambo a ‘kushimika nzubo’?

Mwanamulume ukeba kusongola wafwainwa kwinengezhezha jimo kusenda mitembo ya masongola. Kino kyavwangamo kwinengezhezha jimo kumwena ba mu kisemi bya ku mubiji ne kwibatangijila ku mupashi. —10/15, peja 12.

• Yehoba ne Yesu baikala byepi bakumwenako kwi atweba mu kumwesha mushingi?

Nangwa kya kuba Yehoba ye mwine wakila, ubila bantu lusa ne kwibanemeka. Byo aambilenga kwi Abalahama ne Mosesa, Yehoba waingijishe kyambo kya mu Kihebelu kyatuntululwa amba ‘mwane.’ (Nte. 13: 14, NW; Lupu. 4: 6) Kabiji Yehoba uteleka ku bantu. (Nte. 18: 23-32) Yesu naye byo byo aubanga, kabiji winengezhezhe ne kwipana kukwasha bantu baiyanga ko aji, javula wibatelanga pa mazhina abo. —11/15, peja 25.