“Kankwasha Bingi Kufika Bantu pa Michima”

MUZHI wa Porto Alegre waikela ku kabeta ka ku bulenge bwa kyalo kya Brazil, myaka ya kunyumakwe mo mwakonkenejile bantu kufuma mwaya ntanda yonse na kwisamba pa mitwe yalamata bwikalo bwa bantu. Bantu bavula bafumine mu byalo 135 bo batainweko ku kuno kukonkana. Kimye kya pachaile, jibumba ja Bakamonyi kufuma mu muzhi wa Porto Alegre jaishile na kumona boba bantu bakonkene pa kuba’mba besambe nabo mambo a mu Baibolo aamba pa Bufumu. Pano besambile byepi?

Painiya wa jizhina ja Elizabete washimikizha amba: “Twaingijishe kabuku ka Good News for People of All Nations (Mambo Awama a ku Bantu ba Mikoka Yonse) Uno painiya wanungilepo amba: “Bantu bavula bakonkene kechi bebasapwijilepo kala mambo awama a Bufumu ne, bino batemenwe bingi pa kumvwa byo twibasapwijilenga. Twisambile na bantu bafumine ku Bolivia, China, France, India, Israel, ne ku Nigeria. Bamo twajinga ne na mabuku a mu milaka yabo alumbulula Baibolo, o batambwile na lusekelo.”

Mu Mexico, painiya wa jizhina ja Raúl naye wingijisha kano kabuku ka Good News for People of All Nations (Mambo Awama a ku Bantu ba Mikoka Yonse) kabiji ukwasha bingi bantu. Kunyumakwe, wayile ku mwanamulume umo mwina Alabya wa myaka ya kusemwa 80 wafwishishe mukazhanji. Uno mwanamulume byo atangile mu kano kabuku pa jipa panembwa mambo awama a Bufumu mu mulaka wa Alabya, wajijile mipolo ya lusekelo. Mambo ka? Mambo mulaye wa Lesa wa kuba amba lufu kechi lukekalako jibiji ne, byonka byo aambiwapo mu Lumwekesho 21:3, 4, wamufikile bingi pa muchima byo amutangile mu mulaka wanji. Kimye kikwabo kyo asapwijilenga busapwishi bwa kushukilwa, Raúl wasambakene mwanamulume waambilenga mulaka wa ki Portuguese. Uno mwanamulume naye wafwishishe mwananji wamulume. Raúl wamupele kano kabuku ka mu mulaka wa ki Portuguese kuba’mba atange. Uno mwanamulume byo atangile, waambile amba ukeba kufunda byavula pa mambo a Baibolo kabiji waswile kufunda Baibolo.

Raúl wingijisha kabuku ka Good News for People of All Nations (Mambo Awama a ku Bantu ba Mikoka Yonse) kusapwila ku boba bamba mulaka wa ki Armenia, Chinese, Kizungu, French, German, Hindi, Korea, Mixe, Persia, Russia, ne wa Zapotec. Waamba’mba: “Namona byo kyanema kwingijisha kano kabuku mu mwingilo wami wa mu bujimi. Kankwasha bingi kufika bantu pa michima nangwa kya kuba kechi ñamba milaka yabo ne.”

Bantu bavula byo benda ne kwikala mu byalo bingi, tuji na mashuko avula bingi a kumonañana na boba bamba milaka ingi. Tukakonsha kwisamba nabo mambo a Bufumu kupichila mu kwingijisha kabuku ka Good News for People of All Nations (Mambo Awama a ku Bantu ba Mikoka Yonse). Nanchi musenda kano kabuku nyi?

[Bipikichala pa peja 32]

Raúl na kabuku kamukwasha kufika bantu pa michima