Kutendeka Kusapwila Bantu Bamba Mulaka Ungi
1. Bantu ka bakwabo bo tutana kimye kyo tuya na kusapwila mu nyaunda yetu?
1 Yesu Kilishitu waambijile jimo amba mambo awama akasapwilwa ntanda yonse “mwa kwibashimwina ba mu mikoka yonse ya bantu.” Bonse bengila mwingilo wa kusapwila ne kufunjisha bayuka buneme bwa bino byambo. (Mat. 24:14; 28:19, 20) Byo tuya na kusapwila ne kulenga baana ba bwanga twakonsha kutana bantu ba mu byalo bingi bamba mulaka wa pusana na wetu. Bano nabo bafwainwa kumvwa mambo a Bufumu ne kukoselamo mu bukine juba jikatampe ja Yehoba jilengesha moyo saka jikyangye kufika. (Mala. 3:18) Twakonsha kutendeka byepi kusapwila bantu bamba mulaka ungi baji mu nyaunda yetu?
2. Twakonsha kulonda byepi Yehoba kimye kyo twamba ku bantu bamba mulaka ungi?
2 Monainga Bamba Mulaka Ungi Byonka Bibamona Yehoba: Pa kuba’mba tumweshenga butemwe bujipo ne Yehoba bwakubula misalululo twafwainwa kwikala na muchima wa kukebesha kukwasha bantu bonse ba mu nyaunda yetu nangwa bamba mulaka ungi kuyuka bukine pe Lesa wa kine Yehoba. (Sala. 83:18; Byu. 10:34, 35) Nangwa kya kuba javula tuta muchima ku bamba mulaka wa kipwilo kyo tujimo, twafwainwa ne kuta muchima bamba mulaka ungi ne kumonapo mashinda mwa kwisambila nabo mambo a Bufumu bwa Lesa. Kubula kusapwila bamba mulaka ungi kechi kuswañana na nkebelo ya Yehoba ya kushimuna bukine ku bantu ba mu mikoka yonse ne. Pano twakonsha kukwasha byepi bantu bamba mulaka ungi?
3. Kingijisho ka kyawama kyo betupa, kabiji twakonsha kwinengezha byepi kwikingijisha?
3 Ingijishainga Kabuku ka Good News for People of All Nations: Kano kabuku ko ko twingijisha pa kwisamba na bamba mulaka ungi. Sendainga kano kabuku kimye kyonse, yukai bulongo mbaji yapusana pusana ijimo kabiji inengezhai kwikengijishanga. Pa kuba’mba mukonshenga kumonapo bukiji paji mulaka, bikaipo tuyukilo pa milaka iji mu nyaunda yenu. Inge mabuku ko aji mu ino milaka, kyawama kwikalapo na amo a kushila bantu panyuma ya kwingijisha byambo biji mu kabuku.
4. Twakonsha kwingijisha byepi kabuku ka Nations mu mwingilo wetu?
4 Mu mwingilo umvwe mwatana muntu ye mwabula kuyuka mulaka ye amba mumweshai patanshi byambo biji pa nkupiko ya kano kabuku. Zhikulai paji mapu a ntanda yonse ne kusonta pa kyalo mo mwikala ne kumumwesha’mba mukeba kuyuka kyalo ko afuma ne mulaka ye engijisha. Umvwe mwayuka mulaka, talai pa mutanchi wa bijimo ne kuzhikula pa peja, mumweshai’mba atange mukuku wa byambo byafichisha biji peulu ya peja ne kumumwesha’mba mukeba atange ne kibaba. Inge mwapwisha, mushilai talakiti ya mu yeo mulaka nangwa ku musontela amba atange mukuku uji po bapenta musombelo wafituluka waamba’mba mu bena kukeba kumuletela buku wa mu mulaka wanji. Sontai panembwa’mba “jizhina jami” mu byambo byafichisha ne kutela bulongo jizhina. Kabiji sontai panembwa’mba “jizhina jenu” mu byambo byafichisha ne kumupembela kwitela jizhina janji. Nengezhai bulongo kubwelako.
5. Twakonsha kuba byepi na bantu bamba mulaka ungi bakeba kufunda?
5 Monai uno Muntu: Twafwainwa kwibikako kubwelako ku bakeba kufunda mambo a Bufumu nangwa kya kuba bamba mulaka ungi. Inge twamona’mba wateshako muchima kwi Lesa ne Baibolo Mambo anji, twafwainwa kunemba kapepala ka Mwane Monai Uno Muntu (S-43) ne kwikapana bukiji ku munembeshi mu kipwilo ukekatuma ku ofweshi wa musampi pa kuba’mba ukeba kufunda bakamufwakeshe ku muntu wayuka yeo mulaka. Ofweshi wa musampi ukatuma kano kapepala ku jibumba jingijisha uno mulaka. Inge batambula, bakamufwakashisha bukiji. Munembeshi ukapa kalama wa mwingilo kapepala kamo ka kuyukilako bibena kwingila jibumba ja yeo mulaka. Kano kapepala mwafwainwa kwikengijishatu na muntu ukebesha kufunda.
6. Mwakonsha kuba byepi umvwe mwatana muntu wamba mulaka ungi?
6 Pakonsha kupita kimye kufuma po batumina kapepala pa kuba’mba musapwishi wamba uno mulaka akafwakashishe ukeba kufunda. Onka o mambo pa kuba’mba atwajijile kwikala na mujojo, musapwishi wapaine S-43 wafwainwa kumufwakashishanga poso musapwishi wayuka yeo mulaka wamweka. Mwakonsha ne kutendekako lufunjisho lwa Baibolo na uno muntu. Mu kimye kyo mu bena kupembelela musapwishi wayuka uno mulaka, mwakonsha kutana byepi mabuku akupa muntu ukeba kufunda?
7. Ñanyi lunengezho lo twakonsha kwikelamo na mabuku a kwingijisha ku bantu bamba mulaka ungi?
7 Mabuku a mu Milaka Ingi: Bipwilo kechi byafwainwa kwikala na mabuku avula a mu milaka ingi ne. Bino umvwe kalama wa mwingilo wamona kuba’mba bantu bamba mulaka ungi bakeba kufunda bukine batendeka kuvula, wakonsha kufuukulapo kwikala na mabuku aesakana akwingijisha basapwishi mu mulaka ungi. Kipwilo kyafwainwa kuoda umvwe kifwao ano mabuku. Pakonsha kupita kimye pa kuba’mba mabuku a mu mulaka ungi afike pa kipwilo. Onkao mambo kuji lunengezho lwa kupulinta byambo kufuma mu mabuku pa intaneti kwingijisha keyala wa www.watchtower.org. Mabuku avula bingi a mu milaka ingi basapwishi ne bantu bakeba kufunda bukine o bakonsha kutana bukiji pa intaneti. Kwakubula nangwa kuzhinaukatu ne, luno lunengezho lwawama bingi kukwashishamo bamba mulaka ungi bakeba kufunda bukine.
8. Mwingilo ka uji na kipwilo pa kukwasha bamba mulaka ungi kutwajijila kwikala na mujojo?
8 Mwingilo wa Kipwilo: Mu mapunzha amo muji bantu bamba mulaka ungi kechi mwakonsha kwikala kipwilo kingijisha yeo mulaka ne. Onkao mambo bamba mulaka ungi bakeba kufunda bakonsha kwibeta amba batanwe ku kupwila kwenu. Kwibatambwila bulongo ne kwibata muchima kwakonsha kwibatundaika kutanwangako javula. Patanshitu kwakonsha kwikala mikika na mambo a mulaka ne kisho, bino butemwe bwa bena Kilishitu bakine ba mu bwanabwankazhi bwa ntanda yonse bwa Bakamonyi ba kwa Yehoba bupwisha misalululo. (Zefwa. 3:9; Yoa. 13:35) Nanchi mwayukapo mulaka mukwabo nyi? Umvwe mwayukapo umo kabiji mubena kukeba kumona bakeba kufunda ba mu yeo mulaka, bulai munembeshi mu kipwilo atume uno sawakya ku ofweshi wa musampi. Kuba bino kwakonsha kukwashako ofweshi wa musampi umvwe babena kukeba muntu wa kuya na kumona ukeba kufunda.
9. Kimye ka kyakonsha kutendeka basapwishi kufunda mulaka, kabiji kikala byepi pa kuba’mba batendeke?
9 Kufunda Mulaka: Umvwe muji na bamba mulaka ungi, kyawama kwibatundaika kuya na kupwila ku kipwilo kingijisha mulaka wabo inge bakonsha. Umvwe kechi bakonsha ne, basapwishi bamo bakonsha kufuukulapo kutendeka kufunda yeo mulaka pa kuba’mba bakonshe kukwasha bakeba kufunda. Inge kafwako kipwilo mu yeo mulaka pepi, ofweshi wa musampi ukafuukulapo kutendeka kumufunda inge bamwamba bavula. Umvwe kyaikala bino ofweshi wa musampi ukabula kipwilo kiji pepi na bano bantu kubijika kutendeka kufunda uno mulaka. Babena kukeba kutendeka kufunda mulaka bafwainwa kwikala na mulanguluko wa kuviluka na kukwasha jino jibumba nangwa kipwilo kya yeo mulaka kukoma.
10. Kimye ka kyo mwakonsha kulenga jibumba ja mulaka ungi, kabiji bikebwa ka bya kufikizha?
10 Kulenga Jibumba: Kuji bintu bina bikebwa pa kulenge jibumba ja mulaka ungi. (1) Bantu bamba yeo mulaka umvwe bakeba kufunda. (2) Kwafwainwa kwikala basapwishi babambakana bayuka uno mulaka nangwa babena kumufunda. (3) Kwafwainwa kwikala mukulumpe mu kipwilo nangwa nkwasho wa kutangijila kupwila nangwatu kumo mu yeo mulaka. (4) Jibumba ja bakulumpe jafwainwa kwinengezha kukwasha jino jibumba. Umvwe bafikizha bino bikebwa bakulumpe mu kipwilo bakabula musampi mu nkalata biji jino jibumba ne kwipuzha kwibaswisha kwikala kipwilo kibena kukwasha jibumba ja mulaka ungi. (Monai buku wa Bakwatankana pa peja 106-107.) Mukulumpe mu kipwilo nangwa nkwasho ubena kutangijila ukekala “kalama wa jibumba” nangwa “kalume wa jibumba” ukatwikwa mutembo wa kulama bulongo jibumba.
11. Mambo ka o kyanemena kutendeka kusapwila bantu bamba mulaka ungi baji mu nyaunda ya kipwilo kyetu?
11 Kutendeka kusapwila bantu bamba mulaka ungi baji mu nyaunda yetu kwanema bingi mu mwingilo wa ntanda yonse watendekele Yesu wa Kumwenako wetu. Twayai twingile mwingilo wetu ne kwimwena Yehoba byo atwajijila na kusunkenya ba mu mikoka ya bantu ne kuleta bya buneme kwi aye. (Hagai 2:7) Kwingilako uno mwingilo mu luno lubaji kwituletela bingi lusekelo! Yehoba apeshe kwibikako kwetu kwa kusapwila bantu bamba mulaka ungi baji mu manyaunda etu byo twayuka’mba Lesa ye wiikomesha nangwa paji mikika pa milaka.—1 1 Ko. 3:6-9.