Kuwamishako Busendwe Bwetu bwa Kusapwila—Kusapwila ku Muntu Wamba Mulaka Ungi

Ene Mambo o Kwanemena: Yehoba ukeba bantu ba mu “bisaka byonse” kufunda bukine. (Byu. 10:34, 35) Onkao mambo, Yesu waambile’mba mambo awama bakeasapwila “pano pa ntanda ponse” ne “ku bisaka byonse bya bantu.” (Mat. 24:14) Zekaliya waambijile jimo kuba’mba bantu “bafuma mu milaka yonse ya bisaka bya bantu” bakeomvwa. (Zeka. 8:23) Kwesakana na kimwesho kyamwene mutumwa Yoano, pa boba bakapuluka malwa akatampe pakekala ne bantu bakafuma “mu bisaka byonse, mu mikoka yonse, mu mitundu yonse ya bantu ne mu njimi [milaka, tubyambo twa panshi] yonse.” (Lum. 7:9, 13, 14) Na mambo a bino, umvwe twataana muntu wamba mulaka ungi mu nyaunda yetu, twafwainwa kumusapwila.

Byo Twafwainwa Kuba:

Inengezhezhai jimo. Mu kyola kyenu kya mu busapwishi bikaimo ne buloshuwa wa kuba’mba Good News for People of All Nations. Yukai bulongo mikambizho iji mu ka mutwe ka kuba’mba “How to Help Those Who Speak Another Language,” kaji ku ntendekelo ya uno buloshuwa. Langulukai pa milaka yo mwakonsha kutaana mu mwingilo, ne kukopolwela jimo mavidyo nangwa mabuku mu yewo mulaka pa jw.org ne kubika pa ka kiñambañamba kenu ka kwenda nako inge mwakonsha. Mwakonsha ne kwingijisha JW Language app pa kuba’mba mufundeko byambo bicheche mu yewo mulaka. Inge kya kuba bipwilo byamba milaka yapusana pusana bisapwila mu nyaunda imo, mwafwainwa kusendatu mabuku a mu mulaka wamba kipwilo kyenu pa kuya ku nzubo ku nzubo. Inge mubena kwingila busapwishi bwa ku mvula bantu mu mapunzha mo bamba milaka yavula, sendai mabuku a mu milaka ya bantu bo mwakonsha kutaana.
Inge mwataana muntu wabula kuyuka mulaka wenu, esekeshai kwisamba nanji “pa mingilo ikatampe ya Lesa” mu mulaka wanji. (Byu. 2:11) Mwambilai kuya pa jw.org pa kuba’mba ataane byavula mu mulaka wanji. Inge wamwesha lusekelo, ponkapo nembai kapepala ka kuba’mba Mwane Monai Uno Muntu (S-43) ne kupa munembeshi. Twajijilai kufwakesha muntu wamwesha lusekelo kufikatu ne byo kukamweka musapwishi wayuka mulaka wanji.

Esekai Kuba Bino Uno Ñondo:

a Kupopwela kwa Kisemi kukalondelapo, mukamweshe byo mwafwainwa kusapwila ku muntu wabula kuyuka mulaka wenu.