Umvwe Mwina Nzubo Wamba Mulaka Ungi
1. Mambo ka bipwilo o byafwainwa kukwatankena pamo pa kwingijila mu nyaunda?
1 Pa kimye ne pa kimye, basapwishi ba Bufumu kuzhokoloka mwaya ntanda yonse batana bantu bamwesha lusekelo bamba mulaka ubula kwingijisha kipwilo kyo bajimo. Pa kuba’mba bantu ba uno mutundu bakwashiwe ku mupashi, misampi yavula yalenga mabumba ne bipwilo byayuka kwamba yoyo milaka. Milaka ya yenkao mutundu yakonsha kwambiwa mu mpunzhatu imo, kabiji bipwilo byavula bingijisha milaka yapusana pusana byakonsha kusapwila mu nyaunda imotu. Nga bipwilo byakonsha kukwatankana byepi pa kuba’mba mwingilo wa kusapwila engijiwenga bulongo?—1 Ko. 14:33.
2. Pa kusapwila ku nzubo ne nzubo, twakonsha kukwatankana byepi pamo na jibumba nangwa kipwilo kingijisha mulaka ungi mu mpunzha yetu?
2 Kukwatankana: Pa kusapwila busapwishi bwa mu mukwakwa nangwa bwa kushikilwa, musapwishi wafwainwa kusolomoka muntu yense, kubikakotu ne boba bamba mulaka ungi, kabiji ne kumushila buku mu mulaka ye atanga. Nangwa byonkabyo, pa kuya ku nzubo ne nzubo mu manyaunda mwingijila mabumba nangwa bipwilo bya milaka ikwabo, musapwishi wafwainwa kutesha muchima pa nzubo paji bantu bamba mulaka wingijisha kipwilo moaji. Umvwe bipwilo byapusana pusana bingijila mu nyaunda ituntu imo, kyanema bingi kwikala na mapepala anembwa bulongo. Batangijila mwingilo bafwainwa kwisamba bulongo na bakwabo kabiji ne kunengezha bintu mu jishinda jawamina bonse. (Mana. 11:14) Pano bino, mu mwingilo wa ku nzubo ne nzubo umvwe mwatana muntu wamba mulaka mukwabo kabiji kechi kujipo kipwilo pepi kingijisha yewo mulaka ne, musapwishi wafwainwa kumusapwila awo muntu ne kutwajijila kumukwasha.
3. Twakonsha kuba byepi umvwe twatana basapwishi bafuma ku jibumba nangwa ku kipwilo kingijisha mulaka ungi saka babena kwingijila mu nyaunda yonka yo tubena kwingijilamo?
3 Twingila Mwingilo Umotu: Pano nga bintu byafwainwa kwikala byepi umvwe kya kuba basapwishi bafuma mu bipwilo byapusana pusana kyatanyiwa kuba’mba babena kusapwila mu nyaunda intutu imo pa juba jimotu? Butemwe bwa bwina Kilishitu bo bwafwainwa kutangijila musapwishi yense kabiji ne kutesha muchima pa kukwasha bantu baji mu nyaunda. (Yoa. 13:34, 35) Onkao mambo, aba bonse babena kutangijila bakamwesha kukoka muchima ne butemwe kupichila mu kufuukulapo kuba’mba jibumba jimo jiye na kwingijila mu nyaunda ikwabo pa kakimye kacheche.—Yako. 3:17, 18.
4. Ñanyi bungauzhi bubena kufikizhiwa lelo jino?
4 Baibolo waambijile jimo kuba’mba bantu banjimi yapusana pusana bakateleka ku mambo awama. (Lum. 14:6, 7) Kupichila mu kukwatankena pamo bulongo, tukakepeshako kuyanga bonse pa mazubo antutu amo, kabiji kuba kino kukalengela bavula bakatataka kumvwa mambo awama, kuvwangakotu ne boba bamba mulaka ungi.—Efi. 4:16.