Bya Kwingijila Pamo Bulongo mu Nyaunda mo Bamba Milaka Yavula

Bantu batako bingi muchima inge baumvwa mambo a Bufumu mu mulaka wabo. Kyamweka o ene mambo pa Pentekosita wa mu 33 C.E., Yehoba o alengejile kuba’mba “bayudea baakamwanga Lesa bafumine mu byalo byonse” bomvwe mambo awama “awu mu mulaka wanji, awu mu mulaka wanji,” nangwa kya kuba bayukile kwamba Kihebelu ne Kingiliki. (By 2:5, 8) Lelo jino, kuji mapunzha muji milaka yavula, mwingijila bipwilo bingijisha milaka yapusana pusana. Pano basapwishi bakonsha kwingila byepi bulongo mu mapunzha muji milaka yavula kwa kubula kupita pa mazubo papita kala bakwabo, pa kuba’mba babule kufichisha ku muchima bantu bo tusapwilako?

• 

  Isambainga (Man 15:22): Bakalama ba mwingilo bafwainwa kwisamba pa kuba’mba bayuke byo bafwainwa kwingila bulongo mwingilo wa kusampanya mambo awama mu yoyo nyaunda yonse. Bipwilo bingijisha milaka ikwabo byakonsha kukeba’mba pa kusapwila mushengapo mazubo po bamba mulaka ye bengijisha. Bino inge kya kuba nyaunda yabaya bingi, kabiji babena kukankalwa kwiipwisha yonse, bakonsha kuswa kuba’mba musapwilenga pa mazubo onsetu, bino mwibabuulenga inge mwatana muntu wamba mulaka wabo watako muchima. (od 93 jifu. 37) Kimo kimye bakonsha kwimulomba kwibakwashako kukeba bantu bamba mulaka wa kipwilo kyabo, kuba’mba babajile mazubo abo ku nyaunda yabo. (km 7/12 5, kakitenguluzha) Kabiji vulukai kuba’mba mu nzubo imo mwakonsha kwikala bantu bamba milaka yavula. Mwafwainwa kulondela mizhilo ya kyalo izhikijila bantu pa kunengezha bya kusapwila.

• 

  Kwatankanai (Ef 4:16): Londelainga bimubuula kalama wa mwingilo pa kusapwila. Nanchi mubena kufunjisha muntu wamba mulaka ye mubula kwingijisha mu kipwilo mo muji nyi? Ye mufunjisha Baibolo wakonsha kuyilako palutwe bukiji inge mwamupana ku musapwishi wa mu kipwilo nangwa jibumba jingijisha mulaka wanji.

• 

  Inengezhainga (Man 15:28; 16:1): Inge mwatana muntu wamba mulaka ungi kimye kyo mubena kusapwila mambo awama, mwafwainwa kumusapwila. Mwafwainwa kwinengezha kusapwila mu milaka yamba bantu mu yoyo nyaunda. Kopolwelai jimo Baibolo mu yoyo milaka ne mavidyo pa kiñambañamba kyenu. Kabiji mwakonsha ne kwingijisha JW Language app pa kufunda bya kwimuna mu yoyo milaka