Mepuzho Kufuma Kubatanga

Yesu waambijile bantu bamutelekelenga amba: “Mwikale balumbuluka, byonka byo alumbuluka Shenu wa mwiulu.” Nga bantu lelo jino bakonsha kwikala byepi “balumbuluka”?—Mat.5:48.

Pa kuba’mba tukumbule buno bwipuzho twafwainwa kukiyuka byambo bya kuba’mba “kulumbuluka” ne “bulumbuluke” byo bebingijisha mu Baibolo. Kechi byonse byatelwa mu Binembelo amba ‘byalumbuluka’ bikala byalumbulukishatu ne. Pano Yehoba aye walumbulukishatu. Bantu nangwa bintu byakonsha kwikala byalumbulukako. Kyambo kya Kihebelu ne kya Kingiliki kyatuntululwa amba “kulumbuluka” javula kilumbulula “kukwana,” “kufikapo” nangwa “kubula kaneneno” kwesakana na bipimo byabikako boba baji mu buntangi. Kino kyambo bantu bavula batemwa kwikingijisha mu ñambilo ya pa juba pa juba. Kyakumwenako, batemwa kwamba amba “byambo byalumbuluka.”

Ba Adama ne Evwa balengelwe balumbuluka mu byubilo, ku mupashi ne ku mubiji. Balumbulukile kwesakana na bipimo byabikileko Mulenga wabo. Na mambo a kubula lukokelo bakankelwe kulondela bino bipimo, ne kyafuminemo balekele kwikala balumbuluka pamo ne baana babo. Onkao mambo mwi Adama mo mwaishijile bundengamambo, bumbulwa kulumbuluka ne lufu ku bantu.—Loma 5:12.

Nangwa byonkabyo, byonka byalumbulwile Yesu mu Jashi ja pa Mutumba, nangwatu bantu bambulwa kulumbuluka bakonsha kwikala balumbulukako. Mu jino jashi wabikileko bipimo byaambile pa kulumbuluka nangwa amba kukwana, ne butemwe. Buno butemwe ke bobwa bumweshapo Lesa ku bantu. Yesu waambile amba: ‘Sa mwibatemwa balwanyi benu ne kwibalombela bemupata; namba mwikale baana ba Shenu wa mwiulu: mambo aye uselesha juba janji ku babi ne ku bawama pamo; ne kunokesha mvula pa baoloka ne pa babula koloka pamo.’ (Mat. 5:44, 45) Kupichila mu kumwesha butemwe bwa uno mutundu, baana ba bwanga ba kwa Yesu bakonsha kulondela kyakumwenako kya kwa Lesa kyalumbuluka.

Ne lelo jino, Bakamonyi ba kwa Yehoba ntanda yonse bebikishako kumwesha buno butemwe bukatampe ku bantu. Bakebesha bingi kufunjisha maana alumbuluka a bukine bwa mu Baibolo ku bantu bafuma mu nkomeno, mishobo ne bupopweshi bwapusana pusana. Mu byalo 236, pa kino kimye Bakamonyi ba bena kufunjisha mafunjisho a Baibolo kukila pa 7,000,000 ku bantu bakeba kufunda Baibolo.

Yesu waipwizhe amba: ‘Umvwe mwibatemwa bemutemwa, mumwenamo ñanyi mfweto? Basonkeshi nabo kechi boba byonkabyo nenyi? Kabiji umvwe mwibemuna balongo benu bonka, po mwakijila bakwabo po pa ka? Bangetila nabo kechi boba byonkabyo nenyi?’ (Mat. 5:46, 47) Bena Kilishitu bakine kechi baji na misalululo ku bantu na mambo a byafunda muntu sukulu nangwa bisho ko afuma ne, nangwa kumweshatu butemwe ku boba bakonsha kwibatemwa ne. Pakuba bakwasha bayanji ne bakolwa, banyike ne bakulumpe. Mu ano mashinda, bena Kilishitu bakonsha kulondela butemwe bumweshapo Yehoba ne mu jino jishinda bekala balumbulukako.

Nanchi tukakonsha kwikala balumbuluka byonka byajinga Adama nyi? Kya kine, kupichila mu kwikala na lwitabilo mu kitapisho kya bukuzhi bwa kwa Yesu, bantu balukokelo bakalumbulukisha mu Bukalama bwa kwa Kilishitu bwa Myaka Kiumbi Kimo, kimye ‘Mwana Lesa kyo akonauna mingilo ya Diabola.’—1 Yoa. 3:8.