‘Byubilo Byanji bya Mulondela’

MULONGO Theodore Jaracz, wa mu Jibumba Jitangijila ja Bakamonyi ba kwa Yehoba wapwishishe mwingilo wanji pano pa ntanda pa Kisatu lukelo, pa 9 June, 2010. Wajinga na myaka ya kusemwa 84 kabiji washa bakazhi banji ba Melita bo aikele nabo mu masongola pa myaka 53. Kabiji washa bakolojanji babakazhi, ne bepwa banji, wa mulume umo ne babakazhi babiji.

Mulongo Jaracz wasemekelwe pa 28 September, 1925, mu Pike County, Kentucky, ku U.S.A., kabiji wipaine kwi Yehoba saka aji na myaka ya kusemwa 15, pa 10 August, 1941. Byo papichile myaka ibiji, byo ajinga na myaka ya kusemwa 17, watendekele mwingilo wa bupainiya, kabiji waingijile pepi myaka 67 mu mwingilo wa kimye kyonse.

Mu 1946, byo afikizhe myaka ya kusemwa 20, Mulongo Jaracz watainwe ku Sukulu wa Gileada wa butanu na bubiji. Panyuma ya kupwisha sukulu, Mulongo Jaracz bamutumine kwikala kalama wa mwanzo ku mpunzha ya Cleveland, Ohio, ku United States. Mu 1951, bamupele mwingilo wa kukwatankanya mingilo ya pa musampi wa ku Australia. Buku wa 1983 Yearbook of Jehovah’s Witnesses waambile amba Mulongo Jaracz “watundaikile bingi balongo mu kyokya kyalo kyonse na kizaku kyo ajinga nakyo kya kwingila bulongo mingilo ya Lesa ne kutangijila bulongo mu mwingilo wa mu bujimi.”

Mulongo Jaracz byo abwelele ku United States wasongwele Melita Lasko pa 10 December, 1956. Batendekele kwingijila pamo mwingilo wa kwenda na kukwasha bipwilo mu myanzo ne mu bibunji bikatampe bya mu United States. Ku mpelo ya 1974, Mulongo Jaracz bamwichile kwikala wa mu Jibumba Jitangijila ja Bakamonyi ba kwa Yehoba.

Mulongo Jaracz ukavulukwanga bingi na mambo a kwipana kwanji ne bukishinka bwanji kwi Yehoba, ne byo aingilanga mingilo ya Lesa na muchima wanji yense. Watemenwe bingi mukazhanji ne kumuta muchima kabiji wakosele bingi ku mupashi ne kutangizhako bintu bya bakwabo. (1 Ko. 13:4, 5) Wamwesheshe amba watele bakwabo muchima kupichila mu kumona kuba amba bonse bebobila bintu mu kwesakanya ne na lusa. Kabiji kutemwa bantu ne kwibata muchima kwamwekejile mu byo ajinga na kizaku mu mwingilo wa mu bujimi.

Nangwa kya kuba tuji bingi na bulanda na mambo a kufwa kwa wa mu kisemi kya Betele kabiji wa mu bulongo bwa ntanda yonse awo waingilanga bingi na ngovu, tuji na lusekelo pa mwingilo wa bukishinka kwi Yehoba waingijile Mulongo Jaracz pa myaka yavula. Twayukishatu kuba’mba ‘wakosele mu lwitabilo kufika ne ku lufu kabiji watambwila munchinya wa bumi.’ (Lum. 2:10) Kabiji twayuka ne kuba’mba ‘byubilo byanji bya mulondela.’—Lum. 14:13.