Makatazho Alengela Bantu Kwikala na Luketekelo
“Mu moba akapelako kukeya bimye byakatazha”—2 TIMOTI 3:1.
NANCHI mwakyumvwapo nangwa kumonapo bintu bya bulanda nabiji byatongolwa pano nyi?
● Kikola kipayañana kyaipaya bantu bavula bingi.
● Kipowe kya nzala kyaipaya bitota bya bantu.
● Kitentanshi kyaipaya biumbi bya bantu ne kusha bavula kwakubula mazubo.
Pa mapa alondelapo musakutanga bishinka bimo byaamba pa bino bintu. Kabiji musakumona ne kuba’mba Baibolo waambijile jimo amba bino bintu bikamwekanga mu kimye kitelwa’mba ‘moba apelako.’a
Pano bino nkebelo ya bino bibaba kechi ya kwimulengela kuswa amba tubena kwikala mu ntanda muji makatazho ne. Mambo ne anweba bene mubena kwimwena ano makatazho. Pakuba byanembelwa kwimukwasha kwikala na luketekelo. Bisakumwesha kuba’mba kufikizhiwa kwa bungauzhi butanu na bumo kubena kulumbulula’mba ‘moba apelako’ katatakatu akapwe. Kabiji bino bibaba bisakwamba ne pa bintu bimo byamba bantu bakana bino bishiino ne kwitubula ene mambo o twafwainwa kuketekela’mba kulutwe kuji bintu byawama.
[Tubyambo twa mushi]
a Pa kuba’mba muyuke ene mambo Lesa o aswishisha bintu byatama kubiwa, monai kibaba kya kuba’mba: “Mambo ka Lesa o Aswishisha Bubi ne Buyanji?” pa mapa 16 ne 17 a kino kyamba.