Kiyukilo kya “Moba a Kupelako,” Nangwa’mba “Bimye bya ku Mpelo” kyo ki ka?

Mukumbu wa mu Baibolo

Baibolo waambile pa bintu bikamweshanga kufika kwa kimye kya “mpelo ya buno [bonka] bwikalo” nangwa’mba “mpelo ya ino ntanda.” (Mateo 24:3) Baibolo utela kino kimye amba “moba a kupelako” ne “kimye kya ku mpelo,” nangwa’mba “bimye bya ku mpelo.”—2 Timoti 3:1; Danyela 8:19.

Ñanyi bungauzhi bumo bwa mu Baibolo bwaamba pa “moba a kupelako”?

Baibolo waambijile jimo bintu byavula bingi bikekala ke “biyukilo” bimwesha’mba tuji mu moba a kupelako. (Luka 21:7) Akimonai bino biyukilo bimo:

Makondo akavula bingi. Yesu waambile’mba: “Kisaka kikalukuka kisaka kikwabo ne bufumu bukalukuka bufumu bukwabo.” (Mateo 24:7) Kabiji pa Lumwekesho 6:4 paambijile jimo mwanamulume wenda pa bambili wimenako nkondo ikalengela “kufumyapo mutende pano pa ntanda.”

Bipowe bya nzala. Yesu waambijile jimo amba: “Kukekala bipowe bya nzala.” (Mateo 24:7) Buku wa Lumwekesho naye waambapo pa wenda pa bambili mu kifwanyikizho amba ukaleta nzala pano pa ntanda ponsetu.—Lumwekesho 6:5, 6.

Bitentanshi bikatampe. Yesu waambile’mba kukekala “bitentanshi kuku ne kuku.” (Mateo 24:7; Luka 21:11) Abino bitentanshi bikatampe bibena kumweka mwaya ntanda kabiji bantu babena kuyanda bingi ne kufwa.

Bikola. Kwesakana na byaambile Yesu, kukekala bikola nangwa myalo yapusana pusana.—Luka 21:11.

Bumbanzhi. Nangwa kya kuba bumbanzhi bwatendekele kala kene, Yesu waambilepo’mba mu moba a kupelako kukekala “kuvujilako kwa bubi.”—Mateo 24:12.

Konauna ntanda. Pa Lumwekesho 11:18 paambijile jimo amba bantu “bakonauna ntanda.” Babena konauna ntanda mu mashinda avula bingi kechi bumbanzhitu ne mazhikakanwa ne, bino ne kwiyonauna na bya kulengalenga.

Byubilo bya bantu byatama bingi: Baibolo waambijile jimo pa 2 Timoti 3:1-4 amba bantu bakekala “babula kusanta, babula bukishinka, . . . babula kukeba kumvwañana, ba luntepentepe, babula kwikanya, bashinta, babula kutemwa kyawama, basolola bakwabo, babula kumvwa, betota.” Abinobyubilo bikakilamo bingi kutama ko kuba’mba kyayilamo kutela ano moba amba “bimye byakatazha.”

Makatazho mu bisemi. Baibolo waambijile jimo kala pa 2 Timoti 3:2, 3 amba bantu bavula ‘bakabula kutemwa’ bisemi byabo kabiji baana kechi ‘bakakookelanga bansemi” ne.

Butemwe bwa kutemwa Lesa bwakepa mu bantu. Yesu waambijile jimo amba: “Butemwe bwa bavula bukakepa.” (Mateo 24:12) Yesu byo aambile bino, walumbulwilenga’mba bantu bavula kechi bakamutemwa Lesa ne. O ene mambo ne pa 2 Timoti 3:4 o paambile’mba mu moba a kupelako, bantu ‘bakatemwa bya kisangajimbwe mu kifulo kya kutemwa Lesa.’

Bukamfutumfutu bwa bupopweshi. Baibolo pa 2 Timoti 3:5 waambijile jimo amba bantu bakamwekanga nobe babena kupopwela Lesa bino kechi bakalondelanga mafunde a Lesa mu bwikalo bwabo ne.

Kumvwisha bungauzhi bwa mu Baibolo. Buku wa Danyela waambijile jimo kala kuba’mba mu “kimye kya ku mpelo,” bantu bavula bakomvwisha bukine bwa mu Baibolo kuvwangakotu ne kukwatakanya mwatala buno bungauzhi.—Danyela 12:4, tubyambo twa munshi.

Mwingilo wa kusapwila ntanda yonse. Yesu waambijile jimo kuba’mba: “Ano mambo awama a Bufumu bakeasapwila pano pa ntanda ponse.”—Mateo 24:14.

Milengulwila ne mwenga. Yesu waambijile jimo kuba’mba bantu bavula bakalengululanga biyukilo bikamweshanga’mba mpelo ijitu pepi. (Mateo 24:37-39;) Kunungapo, pa 2 Petelo 3:3, 4 paamba’mba bantu bamo bakalengululanga biyukilo, bakatomenapo ne mema kukana bino biyukilo.

Bungauzhi bonse bwafika kala. Yesu waambile’mba moba a kupelako mukeayukila ku kufika kwa buno bungauzhi bonse kechi kufikatu kwa bungauzhi bucheche ne.—Mateo 24:33.

Nanchi tubena kwikala mu “moba a kupelako” nyi?

Ee tubena kwikala mu moba a kupelako. Bintu bibena kumweka mu ntanda ne ndonda ibena kufikilamo bungauzhi bwa mu Baibolo bibena kumwesha’mba moba a kupelako atendekele mu 1914. Mu uno yenka mwaka mo mwatendekele Nkondo Itanshi ya Ntanda Yonse. Pa kuba’mba mushiinwe kuba’mba bintu bibena kumweka mu ntanda bibena kumwesha’mba tubena kwikala mu moba a kupelako, tambai uno vidyo:

Mu 1914, Bufumu bwa Lesa bwatendekele kulama mwiulu. Kabiji kintu kitanshi kyo bwatendekejilepo kuba ke kupanga Satana Diabola ne bandemona banji mwiulu ne kwibataya pano pa ntanda. (Lumwekesho 12:7-12) Satana ye ubena kulengela bantu kwikala na byubilo byatama ne kuba bintu byatama. Kabiji akino kyalengela moba a kupelako kwikala “bimye byakatazha.”—2 Timoti 3:1.

Bantu bavula babena kuyanda bingi na mambo a ano moba akatazha. Baakamwa bingi mambo bantu bakilamo kuba bintu byatama. Bamo baakamwa ne bikamwekela bantu kulutwe.

Nangwa byonkabyo, bamo bo kibena kukola bingi ku muchima na mambo a bintu bibena kumweka mu ntanda, bayuka’mba kulutwe bintu bikawama bingi. Bashiinwa’mba Bufumu bwa Lesa katatakatu bufumyepo makatazho onse aji pano pa ntanda. (Danyela 2:44; Lumwekesho 21:3, 4) Babena kutalatu kwi Lesa kufikizha milaye yanji kabiji byambo byaambile Yesu bibena kwibatekenesha bingi. Abino byambo byaamba’mba: “Awa ukachinchika kufika ne ku mpelo, ye ukapuluka.”—Mateo 24:13; Mika 7:7.