Nkalata Kufuma ku Congo (Kinshasa)

Mu Kimfutele kya Mutumba wa Mujilo

JUBA PA kusela mu muzhi wa Goma, jiulu jimweka kuchiluluka. Moba onse lukelo tumona Mutumba wa Nyiragongo wawama bingi, pa mitumba yonse iji mu ntanda uno ke mutumba wakilamo kutubika mujilo. Bwishi butwajijilatu na kufutumuka kufuma patubika. Bufuku lubebe lumweka kuchila, byonka bimweka mabwe apyana aji nobe makoko.

Mu Kiswahili, uno mutumba bamutela’mba Mulima ya Moto—Mutumba wa Mujilo. Mu 2002 kyo kyajinga kimye kyapeleleko kyo atubikile kyabaya bingi. Bavula ba mu kinkalankulo ne balunda netu ba mu Goma bintu byabo byonse byaonaikile. Mu mapunzha amo aji kipi kipi mo twayanga na kusapwila na bamwata wami, twaendanga pa jibwe jalengwa na bimakoko byakosa bifuma mu mutumba inge watubika, kabiji nafwanyikizhanga nobe mbena kwenda pa ñondo. Bantu bajiko bawama bingi michima. Baji bingi na lusekelo kabiji batambwila na muchima yense mambo awama o twibasapwila. Bino bintu bilengela kwingijila mu ino mpunzha ya kimfutele kya Mutumba wa Mujilo kuwama bingi!

Pa Kibelushi lukelo, natengejilenga bintu byawama. Bamwata wami ne amiwa ne balunda netu bamishonale baishile na kufwakasha, twinengezhezhenga kuya na kusapwila mu nkambi ya bipuluka ku Mugunga, ku muzhika wa yewa muzhi. Bavula baji mu uno muzhi banyema malwañano mu mizhi yabo.

Twalongele mabuku alumbulula Baibolo mu kimbayambaya, a mu Kifrench, Kiswahili, ne mu Kinyarwanda. Kepo twanyamukile. Byo twaendelenga mu mukwakwa watama wa Route Sake, muzhi watendekele kumweka. Bansongwalume bashinjikilenga bisendwa byabo byanema byo batela’mba ma chukudu (bya kusendelapo bipe byo balenga bya mapulanga). Babakazhi bavwajile ma shikechi a kunyinga aji na misombelo yakema baendelenga kipale kunsa ya mukwakwa saka basenda bivunda pa mitwe. Myotoka yapayankene bingi na kutwala bantu ku nkito ne ku kisankanyi. Mpunzha yonse yayujiletu mazubo a bichi o bapenta musombelo wafituluka ne kunshi musombelo wa kifufya.

Byo twafikile pa Nzubo ya Bufumu ya mu Ndosho twataine bakwetu Bakamonyi ba kwa Yehoba baishile kwivwanga kwi atweba ne kusapwila pamo nabo mu nkambi. Naumvwine bingi bulongo kumona bakyanyike, banabakazhi bafwilwa, baana bakishale ne balemana. Bavula bapita mu buyanji bukatampe pano bino bawamisha bwikalo bwabo kupichila mu kusalapo kulondela mafunde a mu Baibolo. Luketekelo lwa mu Baibolo lwatokesha michima yabo kabiji bakebesha kubulako bakwabo. Panyuma ya kusambakana kwa kuya mu mwingilo kwa ka kimye kacheche ne kwitupa mashinda a mu byepelo bya mu Baibolo akonsha kutundaika bantu, atweba bonse twajinga 130 twakanjijile masakya acheche atanu ne kimbayambaya kimo.

Byo papichile maminiti 30, twafikile mu nkambi. Mwajinga matente avula atoka acheache o bafiika pa jibwe jalengwa na bimakoko byakosa bifuma mu mutumba inge watubika. Pakachi ka nkambi pajinga byolonyi bya butooto ne byakuchapilamo bivwalo bya kwingijisha bantu bonse. Pa mpunzha yonse pajinga bantu, bachapilenga bivwalo, kuteka kajo, kutotola nkunde ne kupyanga pa bibelo bya matente abo.

Twataine mwanamulume ye batela’mba Papa Jacques, utala pa lubaji lumo lwa ino nkambi. Wajinga bingi na kijikila kya kukomesha baana banji mu ano moba akatazha. Uno shetu waumvwine bingi bulongo byo twamushijile buku wa Questions Young People Ask—Answers That Work kabiji waambile’mba usakumutanga ne kwita bantu mu mabumba acheache kuba’mba akesambe nabo byo afunda.

Byo twaendelekotu pacheche, twasambakene mwanamukazhi ye batela’mba Mama Beatrice. Witwipwizhe ene mambo Lesa o aswishisha buyanji. Walangulukilenga amba kampe Lesa ye ubena kumumanyika. Bamwata wanji bafwijile mu nkondo, mwananji wamukazhi nsemi uji bunke wayanjilenga pa kukomesha mwana mu nkambi kabiji mwananji wamulume bamubombwele mu bañondo bacheche bapichilepo. Kechi wayukile kwajinga mwananji ne.

Jishimikila ja kwa Mama Beatrice jandengejile kuvuluka byaumvwine Yoba kimye kyo aumvwine mbila ya bulanda. Twamubujile ene mambo o tuyanjila ne kumubula kuba’mba buyanji bo abena kupitamo kechi Lesa ubena kumumanyika ne. (Yoba 34:10-12; Yakoba 1:14, 15) Twamulumbulwijile ne kuba’mba katatakatu Lesa akalete lupimpu ku ino ntanda kupichila mu Bufumu bwanji. Watendekele kumwemwesela ne kwamba’mba ubena kukebesha kutwajijila kufunda Baibolo ne kulomba bukwasho kwi Lesa.

Bonse twasangalele bingi pa jino juba kabiji bonse twayukile’mba Yehoba kine witukwasha kubula bantu byambo bya luketekelo ne kwibatundaika. Byo twafuminenga mu nkambi, bangikazhi bavula basuntwile matalakiti, magazini ne mabuku pa kwitusokona amba kafikaipo!

Lwendo lwa kubwela ku nzubo lwitulengejile kwikala na kimye kya kulanguluka pa byo twaingijile. Nasangalele bingi pa byaubiwe joja juba. Mvuluka Papa Jacques byo amwesheshe lusanchilo, Mama Beatrice byo akepesheko binyenge ne shikoma wangimwine mwanamukazhi mukote saka amwemwesela. Kabiji mvuluka bakyanyike baipwizhenga mepuzho awama amwesheshenga amba baji na mana nobe bakulumpe. Natemenwe bingi byubilo bya bantu bamwemweselenga ne kuseka nangwa kya kuba bajinga na makatazho avula.

Ku ino mpunzha, twamwene bantu bavula ba michima yawama babena kweseka kukwasha bayanda. Lelo jino, ke mwingilo wawama bingi wa kwingijisha Baibolo kukwasha bantu kuyuka makatazho abo byo akapwa. Ñumvwa bingi bulongo kwingilako mwingilo mukatampe wa ku mupashi wa kukwasha bantu ye bayuka bantu bonse mwaya ntanda.