‘Nkasapwilanga Byepi?’

Mu mapunzha avula mwaya ntanda, muji balongo ne banyenga bakishinka babena kusapwila nangwa kya kuba baji na bikola bikatampe. Byonka biji ba Dalia bekala mu muzhi mukatampe wa Vilnius mu kyalo kya Lithuania.

Ba Dalia ke banyenga baji mu myaka ya mu ma 30. Kufumatu kimye kyo basemenwe bakolwa kikola kya kinkanku. Kino kikola kibalengela maulu ne maboko kupaapa ne kubula kwamba byumvwanyika. Onkao mambo, balongo babo bo bakonshatu kumvwa byo bamba. Ba Dalia bekala na bainabo ba Galina bebata bingi muchima. Nangwa kya kuba bwikalo bwa ba Dalia bwibalengela kwikala na binyenge ne bulanda, bino kechi bendatu na kwinyengaika ne. Mambo ka?

Ba Galina baambile’mba: “Mu 1999, muvyala wami Apolonija waishile na kwitupempula. Apolonija, Kamonyi wa kwa Yehoba, kabiji twamwene kuba’mba wayukile bingi Baibolo. Kino kyalengejile Dalia kutendeka kumwipuzha mepuzho avula bingi. Kechi papichile moba avula ne, Dalia batendekele kumufunjisha Baibolo. Bimye bimo naikalangapo inge babena kufunda pa kuba’mba ndumbululenga byaambanga Dalia. Namwene kuba’mba byo afunjilenga byamukwashishe bingi. Kino kyandengejile ne amiwa kutendeka kufunda Baibolo.”

Ba Dalia byo batendekele kumvwisha bukine bwa mu Baibolo, bwipuzho bumo bwatendekele kwibakatazha bingi mu muchima. Mu kuya kwa moba, baipwizhe ba Apolonija amba: “Muntu walemana byonka byonji, wakonsha kusapwila byepi?” (Mat. 28:19, 20) Ba Apolonija bebakumbwile na kifyele amba: “Kwakamwa ne Yehoba ukakukwasha.” Ne kya kine, Yehoba wibakwasha.

Pano ba Dalia basapwila byepi? Bengijisha mashinda apusana pusana. Banyenga ba mu kipwilo bebakwashako kunemba makalata a byambo bya mu Baibolo. Ba Dalia babula banyenga bya kunemba. Nabo banemba mu nkalata byonka byo bebabula. Kabiji ba Dalia basapwila kupichila ne mu kutumina bantu byambo kwingijisha foni. Kabiji inge bwakya bulongo, ba mu kipwilo baya nabo pangye pa kuba’mba besambenga na bantu baikala mu mapunzha mo bawamisha mukokolokela bantu ne mu mikwakwa.

Ba Dalia ne bainabo babena kunungulukilako mu kuyuka bukine. Bonse babiji bepaine kwi Yehoba kabiji babatizhiwe mu November mu 2004. Mu September 2008, mu Vilnius mwalengelwe jibumba ja mulaka wa Kipolishi. Ba Dalia ne bainabo baile mu jino jibumba mambo mwajinga basapwishi ba Bufumu bachechetu. Ba Dalia baambile’mba: “Bañondo bamo ngakamwa bingi inge kechi nasapwilapo ne. Bino inge nalombapo, muntu wa kuya nanji mu mwingilo umwekana, twaumvwañana ne juba ja kuya.” Pano nga uno nyenga yetu wiumvwa byepi pa byo aji? Baambile’mba: “Kikola kyandengela maulu ne maboko kupaapa, bino kechi kyantamisha bongo ne. Nji bingi na lusekelo mambo mbulako bakwetu pe Yehoba!”