Basapwilanga Mambo a Lesa na Kuchinchika!

Kuchinchika ne kukosa kwanema bingi mu bimye bya lumanamo. Bena Kilishitu bamwesha bino byubilo byonka byaamba mashimikila aji mu buku wa Ukulabila Sana pa Bufumu bwa kwa Lesa ne Jehovah’s Witnesses—Proclaimers of God’s Kingdom. Byonka byajinga bakwetu bena Kilishitu batanshi, tulomba mupashi wa Yehoba kwitukwasha kwamba na kuchinchika.—Byu. 4:23-31.

Mulongo umo waambile pa mwingilo wetu wa kusapwila kimye kyajingako nkondo itanshi ya ntanda yonse amba: “Bapopweshi ba Lesa basampenye buku wa Studies in the Scriptures, wajinga na mutwe wa kuba’mba The Finished Mystery, volyumu 7. Uno buku bamupotele ku bantu bavula bingi kukila mabuku akwabo. Mbila ya Bufumu nambala 1 yalupwilwe mu 1918. Palondejile Mbila ya Bufumu nambala 2 yalumbulwile ene mambo kafulumende o akainye buku wa The Finished Mystery. Palondejile Mbila ya Bufumu nambala 3. Jibumba ja bashingwa bo basampenye ano matalakiti kya kine kine. Kyakebewenga kuchinchika ne lwitabilo lwakosa pa kusampanya Mbila ya Bufumu.”

Lelo jino basapwishi ba Bufumu bakatataka bebafunjisha bya kwingila mu mwingilo, bino kala kechi byo byo kyajinga ne. Mulongo umo wa ku Poland uvuluka kyamwekele kimye kitanshi kyo ayile mu mwingilo mu United States mu 1922. Wanembele’mba: “Kwa kubula kuyuka bya kusha mabuku kabiji naambilengatu Kizungu kyakumpampaila, nakonkonsheshe ku kinzhilo kya Dokotala. Manase washinkwileko. Kechi nkalubamo kyamwekele pa joja juba ne, naumvwine bingi moyo. Byo naubile namba nshinkule kyola, mabuku onse aponejile panshi ku maulu a manase. Kechi mvuluka byo naambile ne, bino namushijilepo mabuku amo. Byo nailenga neumvwinenga’mba nachinchika kabiji Yehoba wampesha bingi. Pa jonka jino juba nashijile bantu bavula mabuku mu mukwakwa.”

Nyenga umo waambile’mba: “Mu 1933, balongo bavula baingijishanga myotoka yajinga na bya kwambilamo pa kusampanya mambo a Bufumu.” Juba jimo uno nyenga wayile na kusapwila pamo na bamulume ne mukazhi Bakamonyi ku mpunzha ya mitumba mu California, ku U.S.A. Uno nyenga uvuluka’mba: “Mulongo wasendele motoka wajinga na bya kwambilamo peulu pene pa mutumba, atweba twashajile mu muzhi wajinga munshi ya mutumba. Byo atendekele kujizha kijimba byambo byaumvwanyikilenga nobe bibena kufuma mwiulu. Bangikazhi ba mu uno muzhi bafumpijile uno mulongo bino kechi bamutaine ne. Selechi byo apwile, twayile ku bantu ne kutendeka kwibasapwila. Kabiji naingijilepo ne na myotoka ibiji yajinga na bya kwambilamo, mbena kwimubula ajo juba nangwa kya kuba bantu bakainenga, bino byambo bebyumvwinenga byo byaitulukilenga kuya mwaya muzhi. Kimye kyonse twimwenanga Yehoba byo anengezhanga jishinda ja kusapwilamo pa kimye kyafwainwa. Kusapwila kwingijisha jino jishinda kwakebewanga kuchinchika, bino kimye kyonse mwafumanga byawama kabiji jizhina ja Yehoba jatumbijikwanga.”

Mu myaka ya mu ma 1930 ne ya kuntendekelo ya 1940 baingijishanga bijimba kujizha majashi a Baibolo mu mwingilo. Nyenga umo mwina Kilishitu uvuluka’mba: “Nyenga wakyanyike wasapwijilenga ku nzubo ku nzubo na kijimba. Byo atendekele kujizha selechi wa majashi, mwanamulume mwina nzubo wazhingijile ne kupanta kibaka mu kijimba. Kafwako selechi walajikile ne. Banabalume basatu bajilenga kajo mu kimbayambaya kyo baimikile pepi bibye bamwene byaubiwenga, baichile uno nyenga amba ajizhe selechi batelekeko, kabiji batambwile ne mabuku. Kino kyamutekeneshe bingi.” Kuchinchika ko kwa mukwashishe mu meseko a uno mutundu.

Uno yenka nyenga wanungilepo amba: “Mvuluka kyamwekele mu 1940 kimye kyo twatendekele kushila bantu magazini mu mukwakwa. Patanshi twaendangatu mu bujibumba. Balongo ne banyenga baendanga mu munongo kwapela mukwakwa saka bekobeka bipabi panembwa’mba, ‘Bupopweshi Kitewa Kabiji Kajilo’ ne kuba’mba ‘Ingijilainga Lesa ne Kilishitu Mfumu.’ Kabiji twasampanyanga matalakiti atutu ku bantu. Kwingilako busapwishi bwa uno mutundu kwakebewanga kuchinchika, bino kwakwashanga bantu kuyuka jizhina ja Yehoba ne bantu banji.”

Nyenga umo waambile’mba: “Kyakatazhanga bingi kushila bantu magazini mu mizhi icheche. Kino kyo kimye Bakamonyi kyo bebamanyikanga bingi. . . . Kyakebewanga kuchinchika kya kine kine pa kuba’mba wimane mu mukwakwa na magazini na kwamba byambo bicheche byo twaambanga pa kusha ano magazini. Javula pa Kibelushi twayanga na kusapwila. Kimye kimo kechi betumanyikanga ne. Bino pa moba amo bantu bepwizhanga pamo amba betulukuke, jimo jimo twanyemanga kuchina kwitumanyika.”

Nangwa kya kuba kimye kya Nkondo ya Bubiji ya Ntanda Yonse bebamanyikanga bingi, Bakamonyi ba kwa Yehoba bachinchikile ne kwingila mwingilo wabo. Mu mukwekele wa moba 43 watendekele pa 1 December, mu 1940, kufika pa 12 January mu 1941, basapwishi pepi na 50,000 mu United States basampenye mabuku 8 milyonyi mu kimye kyo batelelenga’mba, kya Kushimuna Bukamonyi na “Kuchinchika.”

Bakikulumpe bavula mu jibumba ja Lesa bakivuluka makatazho o bapitangamo kala akebewanga kuchinchika. Bamo bavuluka byo bachinchikile pa myaka yavula pa kwamba byambo byo baambanga pa kusapwila bya kuba’mba, Lwainga nkondo kufika ne ku mpelo! Kukekala mashinda akwabo o tukengijishanga pa kusapwila mambo a Lesa mpelo ya buno bwikalo bubi saka ikyangye kufika. Mu bukwasho bwa Lesa, tukatwajijila kusapwila mambo a Yehoba na lwitabilo ne na kuchinchika.

[Mabulañano pa peja 9]

Kuchinchika kukebewa kimye kyonse mu mwingilo wa kusapwila Bufumu