Mepuzho Afuma Ku Batanga
Ñanyi kimye Bufumu bwa Ntanda Yonse bwa Anglo-America kyo bwaikele bufumu bwa ntanda yonse bwa butanu na bubiji bwa mu bungauzhi bwa mu Baibolo?
▪ Lukipashañano mukatampe wa kyela wamwene Mfumu Nebukaneza kechi wimenako bufumu bonse bwa ntanda yonse ne. (Da. 2:31-45) Wimenakotu bufumu butanu bwalaminenga kutendeka kimye kya kwa Danyela kuya kulutwe, bwamanyikilenga bantu ba Lesa.
Ndumbulwilo ya kwa Danyela ya lukipashañano wa kyela, yamwesheshenga’mba Bufumu bwa Ntanda Yonse bwa Anglo-America bukafuma mu bufumu bwa bena Loma, kechi amba bukashinda bena Loma ne. Danyela wamwene uno lukipashañano uji na mikupa yalengelwe na kyela kya kapotwe kyafikile ku maulu ne ku mana. (Ku maulu ne ku mana, kyela kya kapotwe kyapatakana na buchimba.)a Ino ndumbulwilo imwesha kuba’mba Bufumu bwa Ntanda Yonse bwa Anglo-America bukafuma ku mikupa ya kyela kya kapotwe, ko kuba’mba bufumu bwa bena Loma. Mpito imwesha kuba’mba ino ndumbulwilo ya kine. Kyalo kya Britain, kyajinga lubaji lucheche lwa Bufumu bwa bena Loma, pano bino, ku mpelo ya myaka ya mu ma 1700, kyatendekele kwikala na bulume bukatampe. Mu kuya kwa kimye, kyalo kya America nakyo kyaikele na bulume bukatampe. Nangwa byonkabyo, pa kikye kimye, byalo bya Britain ne America kechi byakikele bufumu bwa ntanda yonse bwa butanu na bubiji bwa mu bungauzhi bwa mu Baibolo ne. Mambo ka? Mambo bino byalo kechi byakikwatankene ne kutendeka kwingijila pamo ne. Byaishile kukwatankana kimye kya Nkondo Itanshi ya Ntanda Yonse.
Pa kyokya kimye, “baana ba mu bufumu” babambakene na kusapwila kikatakata mu United States, na lutangijilo lwa Ofweshi wabo mukatampe wajinga mu Brooklyn, New York. (Mat. 13:36-43) Ba mu jibumba ja kalume bapayankene bingi na kusapwila mu byalo byo balaminenga ku Bufumu bwa Britain. Kimye kya Nkondo Itanshi ya Ntanda Yonse, byalo bya Britain ne America byakwatankene mu kulwisha balwanyi babo mu bya bumulwila ntanda. Na mambo a kuba nkondo yalengejile byalo bya Britain ne America kutendeka kwitota, bino byalo byatendekele kumanyika boba ba mu lukunwa wa “mwanamukazhi” wa Lesa, kukanya mabuku abo ne kutaya pa kazhima boba batangijilenga mwingilo wa kusapwila.—Lum. 12:17.
Kwesakana na bungauzhi bwa mu Baibolo, twafunda kuba’mba bufumu bwa ntanda yonse bwa butanu na bubiji, kechi bwatendekele ku mpelo ya myaka ya mu ma 1700 kimye kyalo kya Britain byo kyatendekele kwikala na bulume ne. Buno bufumu bwamwekele ku ntendekelo ya juba ja Nkambo.b
[Tubyambo twa mushi]
a Buchimba bwapatakana na kyela kya kapotwe, bwimenako bantu baji mu byalo bitangijilwa na Bufumu bwa Ntanda Yonse bwa Anglo-America buji nobe kyela kya kapotwe. Pa myaka yavula yapitapo, buno buchimba bwalengela buno bufumu kukankalwa kwikala na bulume kwesakana na mo bukebela.
b Ino ke ndumbulwilo ya katataka ya byambo biji pa jipa 57, jifuka 24 mu buku wa Kibemba wa Ukusesema kwa kwa Daniele ne bipikichala ne byambo biji pa mapa 56 ne 139 mu yenka uno buku.
[Kipikichala pa peja 19]
Balongo batanu na basatu bajinga pa ofweshi mukatampe wa Watchtower bebataile pa kazhima mu June 1918