Lusa Lufwomona Bukaji

MWANAMUKAZHI wakikulumpe wazhingijile bingi kimye Bakamonyi babiji ba George ne Manon kyo bamusolomokele amba bamusapwile mambo awama a Bufumu. Baishile kuyuka’mba uno mwanamukazhi wafwijilwe jibiji ne mwananji wamulume naye wafwile kabiji wakolelwenga kikola kya kuvimba mu byako. Nangwa kya kuba kimye kya mwisambo wamwekelenga nobe kechi wazhingila ne, bino wazhingijile.

Nangwa byonkabyo, George, waambijile Manon amba pa kubwelako bakasendele uno mwanamukazhi maluba mambo wamwekelenga kwikala na binyenge ne bukaji. Byo baubile bino, uno inetu, aye Rie wakuminye bingi ne kusekela. Nangwa byonkabyo, pa kikye kimye wapayankene, onkao mambo, wibambijile kukabwelako kimye kikwabo. George ne Manon byo babweleleko pa kimye kyo baumvwañene, kechi bamutainepo ne. Baesekele kubwelako pa bimye byapusana pusana, pano bino, bapulwijilemotu mabula. Batendekele ne kulanguluka’mba kampe ubena kwibanyema.

Juba jimo, George wataine uno mwanamukazhi pa nzubo. Uno mwanamukazhi walombele lulekelo lwa mambo pa kubula kumutanapo kimye kyo baumvwañene, ne kulondolola kuba’mba wajinga mu kipatela. Waambile’mba: “Byo mwafuminekotu joja juba, natendekele kutanga Baibolo.” Mwisambo wawamine bingi kabiji ne lufunjisho lwa Baibolo lwatendekele.

Rie byo afunjilenga Baibolo, walekele kuzhingilazhingila ne kwikala muntu wa lusekelo ne kifyele. Nangwa kya kuba kechi waendanga kuya palepa ne, kechi pabanjile ne, watendekele kubulako bakwabo baiyanga na kumufwakesha bintu byo afunjilenga. Na mambo a kukolwakolwa, kechi watanwanga bimye byavula ku kupwila ne, pano bino, waumvwanga bingi bulongo inge balongo ne banyenga baiya na kumufwakesha. Pa juba joafikizhe myaka ya kusemwa 82, watainwe ku kubuñana kwa mwanzo kabiji wamwesheshe kwipana kwanji kwi Lesa kupichila mu kubatizhiwa.

Byo papichiletu bañondo bacheche panyuma ya lufu lwanji, batulukile lwimbo ye anembele. Mu uno lwimbo, walumbulwile binyenge bikala na muntu umvwe kaikale bunke saka akota kabiji waambile ne pa buneme bwa kumwesha lusa. Manon waambile’mba: “Bino byambo byo ne bitangile, byamfikile pa muchima, kabiji natemwa bingi kuba’mba Yehoba witukwashishe kubila lusa uno mwananamukazhi.”

Ee kine, kulondela byuba Yehoba kwitulengela kutemwa bakwetu ne kwibobila lusa. (Efi. 5:1, 2) Mu mwingilo wetu mukafuma bintu byawama umvwe kasa “tumwesha amba twi bamingilo ba Lesa kupichila . . . mu kumwesha . . . lusa.”—2 Ko. 6:4, 6.