“Kintu kyo Nakebeshenga Kyaubiwa”

Myaka 15 yapitapo, Emeliya waingijilenga bupainiya bwa kimye kyonse. Nangwa byonkabyo, mu kuya kwa kimye walekele kwingila uno mwingilo. Mu myaka ya kulutwe kuno, ulangulukapo bingi pa kino kimye kyamuletejile lusekelo lukatampe mu bwikalo bwanji, kabiji wakebelenga kwingilako jikwabo pakatampe mu mwingilo wa kusapwila.

Pano bino, nkito ya kwa Emeliya yamutailanga kimye kyabaya kabiji kino kyamulengelanga kubula kwikala na lusekelo. Juba jimo, saka aji na bakwabo mobengijila, wajijile ne kwamba’mba: “Nanchi inge ñingilatu kimye kicheche!” Mukulumpe wanji wa nkito waumvwine byo aambile kabiji wamusolomokele ne kumwipuzha inge waambilenga kine. Emeliya wamubujile’mba ibyo. Nangwa byonkabyo, pa kuba’mba bamuswishe kwingilanga kimye kicheche, kyakebewenga kutambula lūsa ku mukulumpe wa kampanyi mambo muzhilo wa kampanyi wajinga wa kuba’mba ba mingilo bonse bafwainwa kwingila kwesakana na kimye kyatongolwa. Nyenga yetu winengezhezhe kumonañana na mukulumpe wa kampanyi kabiji walombele kwi Lesa kuba’mba akose.

Kimye kya mwisambo, Emeliya waambile na kuchinchika kabiji mu jishinda jawama kuba’mba bamukepeshesheko kimye kya kwingila nkito. Walumbulwile amba wingijisha ka kimye kashalako inge wakotoka kuya na kukwasha bakwabo. Waambile amba: “Amiwa nne Kamonyi wa kwa Yehoba, kabiji nkwasha bantu kwikala na bulunda bwawama na Lesa. Ano moba byubilo bya bantu bavula bibena kutaminakotu. Bantu babena kukebewa mizhilo ne mafunde awama, kabiji nesamba nabo maana anema a mu Baibolo. Nkatwajijila kwingilanga na ngovu pa uno kampanyi, pano bino, mbena kukeba kwikala na kimye kyabaya kya kukwasha bantu. O ene mambo o mbena kukebela’mba bankepeshesheko kimye kyo ñingila nkito.”

Uno mukulumpe wa kampanyi waumvwine byo bamubujile kabiji waambile’mba kimye kimo naye walangulukilengapo pa bya kukwasha bantu. Kepo aambile’mba: “Na mambo a byo waamba, nakuswisha kwingila kimye kicheche. Pano abya wayuka’mba ukatambulanga mali acheche nyi?” Emeliya waambile’mba wayuka kabiji amba inge kyakonsheka ukapezhako bwikalo bwanji. Wanungilepo’mba: “Kikonkwanyi kyami kikatampe ke kuba kintu kyakonsha kukwasha bantu.” Mukulumpe wa kampanyi wamubujile’mba: “Nkomoka bingi boba bengijisha kimye kyabo kukwashishamo bantu.”

Kafwako nangwa umo pa yewa kampanyi ye baswishishepo kwingila kimye kicheche pa nkito ne. Luno Emeliya bamuswisha kwingila moba ana pa mulungu pa mulungu. Kintu kyamukumishe ke kya kuba’mba bamunungijileko mali, kabiji utambula onka o atambulanga saka bakyangye kumukepesheshako kimye kya kwingila. Waamba’mba: “Kintu kyo nakebeshenga kyaubiwa, kabiji nakonsha kutendeka jikwabo bupainiya bwa kimye kyonse!”

Inge mwajinga bapainiya nangwa mukyangye kwingilapo kala bupainiya, nanchi mwakilangulukapo pa kupimpulako bwikalo bwenu kuba’mba mwingileko bupainiya nyi?

[Mabulañano pa peja 32]

Mukulumpe wa kampanyi wamubujile’mba: “Nkomoka bingi boba bengijisha kimye kyabo kukwashishamo bantu”