Sawakya wa Kupwila kwa pa Mwaka

Kupwila Kwamwesheshe Lukwatankano ne Mitanchi Yawama

KUPWILA kwa pa mwaka pa mwaka kwa Watch Tower Bible and Tract Society of Pennsylvania, kuleta bingi lusekelo kimye kyonse. Byo byo kyajinga ne pa kupwila kwa pa mwaka kwa nambala 127, kwajingako pa Kibelushi, pa 1, October, 2011. Bonse bo baichile kutanwako bafumine mwaya ntanda yonse, bapwijile mu Nzubo ya Kupwilamo Kukatampe ya Bakamonyi ba kwa Yehoba mu Muzhi wa Jersey, ku New Jersey, mu U.S.A.

Mulongo Gerrit Lösch wa mu Jibumba Jitangijila watambwijile bonse baishile na kutanwako. Wabujile bantu bafumine mu byalo 85 kuba’mba Bakamonyi beyowa lukwatankano lwa ntanda yonse. Kukwatankana kwa uno mutundu kushimuna bukamonyi ne kutumbijika Yehoba. Lukwatankano kyo kyajinga kishina kya kuno kupwila.

SAWAKYA WAWAMA KUFUMA KU MEXICO

Lubaji lutanshi lwa mutanchi wa kupwila lwaambile pa lukwatankano luji pakachi ka bantu ba Yehoba. Mulongo Baltasar Perla wa pa musampi wa Mexico wisambile na balongo basatu ba pa Betele wa Mexico pa mambo a maofweshi a misampi atanu na umo a mu Central America o bavilwile ne kwiatwala ku musampi wa Mexico. Na mambo a luno lupimpu, kisemi kya Betele wa mu Mexico kiji na bantu bafuma mu byalo ne bisho byapusana pusana. Kino kyalengela bano balongo kwikosesha abo bene na bene. Kijitu nobe Lesa wazhimañanya mipaka iji pakachi ka byalo.

Lukatazho lumo lwajingapo na mambo a luno lupimpu, lwajinga lwa kukwasha basapwishi baji mu byalo mo bafumishe maofweshi a misampi kubula kumona’mba bebasankilapo ku jibumba ja Yehoba. Nangwa byonkabyo, uno musampi utuma makalata ku bipwilo byonse bya mu byobya byalo. Bipwilo nabyo binembela musampi bintu byonse byo bakeba kwibakwasha.

SAWAKYA WA KATATAKA KUFUMA KU JAPAN

Mulongo James Linton wa pa musampi wa mu Japan walumbulwile bintu byapichilemo balongo kimye kyaubiwe kitentanshi ne muyulo mu March 2011. Bakamonyi bavula bafwishishe balongo babo kabiji bipe byabo byaonaikile. Bakamonyi bajinga mu mapunzha mwabujile kupita kitentanshi banengezhezhe mazubo kukila pa 3,100 ne myotoka yavula bingi ya kukwasha bano balongo. Bamingilo batuminwe na Kavoto ka Bantungi ba Mpunzha, baingijilenga mute ne bufuku kuwamisha mazubo a balongo. Kukila pa bantu 1,700 bepaine kuya na kwingijila konse kwakebewenga bamingilo. Jibumba ja bamingilo bepana kufuma ku United States jakwashishe kuwamisha Mazubo a Bufumu, kabiji bamingilo 575 nabo baingijileko uno mwingilo.

Kintu kikatampe kyo batelepo muchima ke kutekenesha ne kukosesha lwitabilo lwa boba baponejile mu malwa. Bakulumpe mu kipwilo kukila pa 400 bayile na kukwasha basapwishi bakebewenga bukwasho. Jibumba Jitangijila jatumine bakalama bendela misampi babiji kufuma pa ofweshi mukatampe wa Bakamonyi kuya na kutundaika balongo baponejile mu malwa. Byambo bya lutekenesho byatuminenga Bakamonyi mwaya ntanda bibakoseshe bingi.

KUBINGA MU BIJE BYA MAMBO

Jibumba jaubiletu nzoo kimye mulongo Stephen Hardy wa pa musampi wa mu Britain kyo aambile pa byo babinga mambo mu bije byavula. Kyakumwenako, kafulumende wa France wakebelenga’mba Bakamonyi bapanenga mali a musonko a kina America afika ku 82 milyonyi. Luno lukatazho lwapwile kimye Kochi Mukatampe wa mu Europe Utala pa Lūsa lwa Bantu kyo abingishe Bakamonyi ne kwamba’mba Kafulumende wa kyalo kya France kechi walondejile Kibaba 9 kya mu mizhilo ya Kipamo Kitala pa Lūsa lwa Bantu kya mu Europe lwaamba pa kukasuluka mu bya bupopweshi ne. Byo bafuukwilepo byamwesheshe amba aa mambo kechi ajinga a kubula kupana mali ne, mambo kochi waambile amba: “Kukanya bantu kukasuluka mu bya bupopweshi, kulekesha bupopweshi ne kwambila bupopweshi bya mwenga, bino byonse ke kunyanchijila lūsa lwa bantu lwanembwa mu Kibaba 9 kya mu mizhilo ya Kipamo Kitala pa Lūsa lwa Bantu.”

Uno yenka Kochi Mukatampe wabingishe Bakamonyi mu mambo akwabo ajinga mu kyalo kya Armenia. Kutendeka mu 1965, uno Kochi waambile amba Kipamo Kitala pa Lūsa lwa Bantu kya mu Europe kechi kyazhikijile bantu bakananga kutwela bushilikale ne. Kije Kikatampe kya mu Kochi Mukatampe wa mu Europe kyafuukwilepo amba, Kipamo Kitala pa Lūsa lwa Bantu “kyafwainwa kupa lūsa bonse bakana kutwela bushilikale na mambo a bintu byo baitabilamo.” Na mambo a byafuukwilepo Kochi, kafulumende wa Armenia ne byalo bikwabo nabiji Azerbaijan ne Turkey byanemeka luno lūsa lwa bantu.

MWINGILO WA BUNTUNGI

Mulongo Guy Pierce wa mu Jibumba Jitangijila ye walondejilepo kabiji waambile’mba bonse bapwijile bakebelenga kuyuka bibena kwenda mwingilo wa buntungi mu kyalo kya New York. Watambishe vidyo wamwesheshenga bibena kubiwa ne bikobiwa ku Wallkill, Patterson ne mpunzha yetu ya katataka iji mu Warwick ne Tuxedo, mu New York. Babena kushimika kishimikwa kya kulaalamo kiji na bibamba 300 ku Wallkill, kikapwa mu 2014.

Kuji mitanchi ya kushimika bishimikwa bya katataka mu muzhi wa Warwick pa mpunzha yabaya maekita 100. Mulongo Pierce waambile’mba: “Nangwa kya kuba kechi twayuka kyaswa muchima wa Yehoba pa mambo a Warwick ne, twinengezha kutendeka kushimika pa ino mpunzha po tubena kukeba kuvilwila ofweshi mukatampe wa Bakamonyi ba kwa Yehoba.” Kuji mulanguluko wa kwingijisha maekita 20 a mpunzha yaikela palepa makilomita 10 ku buyeke bwa Warwick pa kubika minkinyi ne bintu bya kushimikilako. Mulongo Pierce wanungilepo amba: “Tukatendeka kushimika inge betupa lūsa kabiji twaketekela kupwisha uno mwingilo pa myaka ina. Kepo tukapotesha mpunzha yetu ya mu Brooklyn.”

Mulongo Pierce waipwizhe’mba: “Nanchi Jibumba Jitangijila jalubamo kuba’mba malwa akatampe afwenya pepi nyi?” Wabwelele wakumbula’mba: “Ine, umvwe malwa akatampe afika saka tukyangye kupwisha, ko kuba’mba kyakilapo ne kuwama.”

JIMUKAI NA BOKWE UBULUMA

Mulongo mukwabo wa mu Jibumba Jitangijila aye Stephen Lett, waambile pa kinembelo kya 1 Petelo 5:8, kyaamba’mba: “Tekanyainga, saka mulaba ne kukenkenta. Mambo mulwanyi wenu aye Diabola upitañana nobe bokwe ubuluma ubena kukeba wa kuja.” Mulongo Lett waambile’mba miteeto iji na bokwe yailamo bingi kuba’mba Petelo wiingijishe kulumbulwilamo byubilo bya kwa Diabola.

Na mambo a kuba’mba mabokwe aji na bulume bukatampe kabiji anyema kukila bantu, onkao mambo, kechi tuji na bulume bwa kunyema nangwa kulwa na Satana ne. Tukebewa bukwasho bwa Yehoba. (Isa. 40:31) Pa kuba’mba bokwe akwate nyama, umubenza. Onkao mambo, twafwainwa kuchinuzhuka kwikala mu mfishi ya ku mupashi Satana mo akonsha kwitukwachila. Byonkatu bokwe byo akwata sontwa nangwa mwana kingalika walaala, ne Satana naye kechi uji na lusa ne, kabiji ukeba’mba etwipaye. Umvwe bokwe wapwisha kuja, nyama ye abajenga umutabaula kya kuba kechi mwakonsha ne kumuyukatu ne. Mu jishinda jimotu, umvwe mwina Kilishitu bamulukuka kwi Satana, bwikalo bwanji ‘butama bingi kukila bo ajingamo patanshi.’ (2 Pe. 2:20) Onkao mambo, twafwainwa kumwimena saka twakosa ne kukwachisha ku mafunde a mu Baibolo o twafunda.—1 Pe. 5:9.

NEMEKAI KIFULO KYENU MU NZUBO YA YEHOBA

Ñambi walondejilepo wajinga mulongo Samuel Herd wa mu Jibumba Jitangijila. Waambile’mba: “Atweba bonse tuji na kifulo mu nzubo ya Yehoba.” Bena Kilishitu bonse baji na kifulo mu “nzubo” ya Lesa ya ku mupashi, ko kuba’mba lunengezho lwa kumupopwela kupichila mu kitapisho kya bukuzhi bwa Yesu. Kwikala na kifulo mu nzubo ya Lesa ke jishuko jikatampe jo twafwainwa kunemeka. Byonka byajinga Davida, tukeba ‘kwikala mu nzubo ya Yehoba moba onse a mweo wetu.’—Sala. 27:4.

Mulongo Herd waambile pa byambo biji mu Salamo 92:12-14 ne kwipuzha’mba: “Mu ñanyi jishinda Yehoba mo etukwashisha pa kuba’mba tubenga bulongo?” Wakumbwile’mba: “Mu paladisa wa ku mupashi, Lesa witulama bulongo, kwituzhikijila ne kwitupa mema awama a bukine. Twayai tumusanchilenga pa bino bintu byo etubila.” Kabiji watundaikile jibumba amba: “Twayai tutwajijile kwikala mu nzubo ya Yehoba myaka ne myaka.”

BENA KILISHITU BANEMEKA MAMBO A LESA

Mulongo David Splane wa mu Jibumba Jitangijila waambile mu jashi jalondejilepo kuba’mba bena Kilishitu ba kine banemeka Mambo a Lesa kimye kyonse. Mu myaka kitota kitanshi, baingijishe Mambo a Lesa pa kupwisha lukatazho lwa mukanda. (Byu. 15:16, 17) Pano bino, mu myaka kitota kya bubiji, aba betelanga’mba bena Kilishitu batendekele kunemeka bya buntemwamaana bwa Bangiliki byo bafunjile mu kifulo kya kwingijisha Binembelo. Mu kuya kwa kimye, bakwabo nabo batendekele kufunjisha milanguluko ya boba bo batelanga’mba ba Fwaza ba mu Machechi ne bamfumu ba bena Loma ne kusampanya mafunjisho a bubela.

Mulongo Splane waambile’mba mu kishimpi kimo, Yesu wamwesheshe kuba’mba kukekala bena Kilishitu ba kine bashingwa bakatwajijila na kuzhikijila bukine pano pa ntanda. (Mat. 13:24-30) Kechi twibayuka bulongo bano baambilepo Yesu ne. Nangwa byonkabyo, pa myaka yavula, bavula bakana mafunjisho ne byubilo byabula bya mu binembelo. Bamo ba mwi abo ke Bishopu aye Agobard wa ku Lyons wajingako mu myaka kitota kya bu 9, Peter wa ku Bruys, Henry wa ku Lausanne ne Waldo bajingako mu myaka kitota kya bu 12, John Wycliffe wajingako mu myaka kitota kya bu 14, William Tyndale wajingako mu myaka kitota kya bu 16, ba Henry Grew ne George Storrs bajingako mu myaka kitota kya bu 19. Lelo jino, Bakamonyi ba kwa Yehoba batwajijila na kunemeka mizhilo ya mu Binembelo kabiji bayuka’mba Baibolo bo bukine. O ene mambo Jibumba Jitangijila o jasajila kinembelo kya Yoano 17:17 kyaamba’mba: “Byambo byenu bo bukine,” kwikala kinembelo kya mwaka wa 2012.

LUPIMPU LWAWAMA LWA MASUKULU NE ÑINGIJILO

Mulongo Anthony Morris wa mu Jibumba Jitangijila wabijikile lupimpu lwaubiwa ku bamishonale ne bapainiya beikajila. Kutendeka mu September 2012, Sukulu wa Baibolo wa Bena Kilishitu Baji mu Masongola, ukobiwanga mu byalo bimo bimo. Kutatula mu October mwaka wapwa, Sukulu wa Gileada bamupimpwile. Aluno aba basa kutanwanga ku sukulu wa Gileada ke boba baji mu mwingilo wa kimye kyonse nabiji bamishonale babula kupita mu sukulu wa Gileada, bapainiya beikajila, bakalama benda nangwa ba mu kisemi kya Betele. Panyuma ya kupwisha uno sukulu, basa kwibatumanga kuya na kukosesha ne kutundaika bantu ba Lesa mu maofweshi a misampi nangwa mu mwingilo wa kwenda nangwa mu mapunzha muji bantu bavula na kukwasha bipwilo mu mwingilo wa kusapwila.

Babijikile ne kuba’mba kutendeka pa 1 January, 2012, bamo bakatanwanga ku Sukulu wa Baibolo wa Balongo Bakatanda ne Sukulu wa Baibolo wa Bena Kilishitu Baji mu Masongola, bakekalanga bapainiya beikajila pa kimye kicheche. Bakasapwilanga mu mapunzha muji basapwishi bacheche nangwa mwabula basapwishi. Bakekalanga bapainiya beikajila pa mwaka umo. Pano inge baingila myaka isatu, aba bakengilanga bulongo bakebatongolanga kutwajijila kwikala bapainiya beikajila.

Kimye kya kupwila kwa pa mwaka kwa mu 2011, kyajinga kimye kya lusekelo. Tubena kutala kwi Yehoba kupesha mitanchi yetu ya kubaishako mwingilo wa kusapwila ne kukosesha lukwatankano lwa bwana bwankazhi, bino byonse bikamuletela lukumo ne kumutumbijika.

[Kitenguluzha/Bipikichala pa peja 18, 19]

KWIBAYUKA BULONGO

Pa mutanchi pajinga ne lubaji lwa kwipuzha banabakazhi batanu pa banabakazhi bafwilwa batanu na bana basongolwe ku ba mu Jibumba Jitangijila. Banyenga Marina Sydlik, Edith Suiter, Melita Jaracz, Melba Barry, ne ba Sydney Barber bashimikizhe byo bafunjile bukine ne kutendeka mwingilo wa kimye kyonse. Bonse pa muntu pa muntu babujile luonde bintu byawama byo bavuluka, byubilo byawama byajinga na ba mwata wabo, ne bintu byawama byo baubijilenga pamo mu mwingilo wa Yehoba. Byo bapwishishe uno mwisambo, bonse baimbile lwimbo nambala 86, wa kuba’mba “Banyenga Bakishinka, ba Bwina Kilishitu.”

[Bipikichala]

(Peulu) Daniel ne Marina Sydlik; Grant ne Edith Suiter; Theodore ne Melita Jaracz

(Munshi) Lloyd ne Melba Barry; Carey ne Sydney Barber

[Mapu pa paja 16]

(Umvwe mukeba bine byambo, monai mu buku)

Misampi itanu ne umo beivilwile ne kwiitwala ku musampi wa mu Mexico

MEXICO

GUATEMALA

HONDURAS

EL SALVADOR

NICARAGUA

COSTA RICA

PANAMA

[Kipikichala pa peja 17]

Bikekala ofweshi mukatampe wa Bakamonyi ba kwa Yehoba mu muzhi wa Warwick, mu New York