Mukivuluka Nyi?

Nanchi mwamwenamo mu kutanga magazini a Kyamba kya Usopa a katataka nyi? Monai inge mwakonsha kukumbula ano mepuzho:

Twakonsha kuzhimya byepi mujilo wa ñambilo yabula kufwainwa?

Twafwainwa kupesa pesa muchima wetu. Mu kifulo kya kuzhachisha mulongo wetu, twafwainwa kulanguluka pa ene mambo o tubena kumuzhachishisha. Nanchi twafwainwa kumuzhachisha na mulanguluko wa kukeba kunema kukila aye nyi? Kuzhachisha bakwetu kwakonsha kulengela bintu kuya munsunya.—8/15, jipa 21.

Lesa ulekela byepi muntu mambo ne kulubako?

Yehoba walaya bo atala bulongo amba: “Amiwa nkebalekela bubi bwabo, ne kwiavuluka mambo abo jibiji ne.” (Yele. 31:34) Wakonsha kulekela mambo kupichila mu bukuzhi. Inge wauba bino, Lesa ulubako mu jishinda ja kuba’mba kechi ukavuluka oo mambo kuba’mba akebakambule ne.—10/1, jipa 32.

Ñanyi bintu bikamweka juba ja Yehoba saka jikyangye kufika?

Bantu bakabijika’mba “Mutende ne luzhikijilo!” Mikoka ya bantu ikalukuka Babilona Mukatampe ne kumonauna. Kabiji kukekala kulukuka bantu ba Lesa. Kepo nkondo ya Amagedonyi ikobiwa, apa bino Satana ne bandemona banji bakebataye mu kalengwa kabula kupela.—9/15, jipa 4.

Tumwenamo byepi mu kubula kuyuka kimye kikafika mpelo?

Kubula kuyuka juba nangwa kimye kikafika mpelo kwitulengela kusolola bintu biji mu michima yetu. Kabiji kwitulengela kuba bintu bisangajika Lesa. Kwitutundaika kwikala bwikalo bwa kwipana kabiji kwitukwasha ne kuketekela mwi Lesa na muchima wetu yense ne mu Mambo anji. Kunungapo, kulengela bya malwa byo tupitamo kukosesha lwitabilo lwetu.—9/15, mapa 24-25.

Lesa ukafumyapo byepi bintu byatama biya na mambo a buyanji bwa bantu?

Katatakatu Lesa akalete ntanda ipya ya bololoke. Aba bonka befuukwilapo abo bene kutemwa bakwabo ne kutemwa Lesa bo bakekalamo. (2 Pe. 3:13) Byo aji Mfumu wa mwiulu watongolwa na Lesa, Yesu ukafumyapo byatama byonse. (Isa. 33:24; Lum. 21:4)—10/1, jipa 13.

“Tubangabanga tutanu na tubiji” tuji mu kuboko kwa kwa Yesu kwa kilujo twatongolwa mu Lumwekesho 1:16, 20, twimenako bañanyi?

Tuno “tubangabanga” twimenako bakalama bashingwa na mupashi kuvwangako ne bakalama bonse baji mu bipwilo.—10/15, jipa 14.

Ñanyi mafunde amo a mu Baibolo etukwasha kuyuka Lesa byo amona kupepa fwanka?

Lesa ukeba’mba tunemekenga bumi. (Mpitu. 5:17) Ukeba atweba kumutemwa ne kutemwa bakwetu. (Mako 12:28-31) Kabiji ukeba’mba tuchinuzhukenga bubipisho. (2 Ko. 7:1)—10/1, jipa 15.

Yesu wamwesheshe byepi muchima wa kwipelula waambiwapo mu Isaya 50:4, 5?

Bino byepelo byaamba’mba awa uji na “lujimi wa bafunda” kechi ‘ukaluluka ne kumuvundamina ne.’ Yesu wipelwile ne kuta muchima ku byamufunjishenga Bashanji. Wakebeshenga bingi kufunda kwi Yehoba, kabiji wimwenejile kwipelula kwa Lesa ne lusa lo aubijile bantu bandengamambo.—11/15, jipa 11.

Tumwenamo byepi mu kubila bakwetu kifyele?

Kupichila mu kubila bakwetu kifyele, tumuyuka Lesa bulongo kabiji kino kituletela bingi lusekelo. (1 Yoa. 4:7; Mat. 5:7, 8) Kunungapo, kumwesha kifyele ku bakwetu kwanema bingi kwi Yehoba. (Mana 19:17)—10/1, jipa 20.