MUTWE WA PA NKUPIKO | MWAKONSHA KUMWENAMO BYEPI MU BUFUMU BWA LESA?

Ñanyi Bintu byo Mukamwenamo mu Bufumu bwa Lesa?

Byo mwatangilenga mitwe yafumako, mwamwene kuba’mba Bakamonyi ba kwa Yehoba banemeka bingi Bufumu bwa Lesa. Kampe mwaumvwine bingi bulongo pa kutanga pa mapesho a Bufumu bwa Lesa aji kulutwe. Pano bino, mwakonsha kuzhinauka inge ino milaye ya kine.

Kechi mwafwainwa kuketekela mu bintu byonse byo mumvwa ne. (Byambo bya Mana 14:15) Kubula kuketekela byonse byo mumvwa twakonsha kwikwesakanya na byaubile bena Beliya.a Byo baumvwinetu mambo awama a Bufumu, bena Beliya baitabijile, pano bino kechi bashiinwe kuba’mba byajinga bya kine ne. Bapesele pesele mu Binembelo amba bamone “kana bino bintu bya kine nangwa ne.” (Byubilo 17:11) Bena Beliya baesakenyenga mambo awama o baumvwine na byaambile Binembelo. Pa kupitapo kimye, bashiinwe kuba’mba mambo awama ajinga a kine kabiji afumine mu Mambo a Lesa.

Bakamonyi ba kwa Yehoba nabo bakeba amba mubenga byonka byaubile bena Beliya. Kupichila mu kufunda Baibolo kyatutu ne atweba, mukesakanya byaitabilamo Bakamonyi ba kwa Yehoba pa Bufumu bwa Lesa na bifunjisha Baibolo.

Kununga pa byo mukafunda pa Bufumu bwa Lesa, kufunda Baibolo kukemukwasha kutana mikumbu ku mepuzho anema mu bwikalo.

Kyanema ke kya kuba’mba kufunda Baibolo kukemukwasha ‘kufwenya kwipi ne Lesa.’ (Yakoba 4:8) Inge mwafwenya kwipi ne Lesa, popo mukayuka bintu byawama bikemubila Bufumu bwa Lesa pa kino kimye ne kulutwe. Yesu byo alombelenga kwi Shanji waambile’mba: “Pa kuba amba bakekale na bumi bwa myaka, bafwainwa kwimuyuka anweba Lesa yenka wakine ne Yesu Kilishitu ye mwatumine.”—Yoano 17:3.

Bakamonyi ba kwa Yehoba bakonsha kwi mufunjisha Baibolo kwingijisha uno buku.

Umvwe mubena kukeba kwikala na lufunjisho lwa Baibolo lwa pa bunke, ipuzhai Kamonyi wa Yehoba uji yense nangwa nembai fomu uji pa www.jw.org/kqn(Monai panembwa’mba LOMBAI LUFUNJISHO LWA BAIBOLO pa intaneti)

a Beliya wajinga muzhi mu Makedonya wajingako mu kimye kya kala.

Kyanemena Bufumu bwa Lesa kwi Aye

Panyuma papo, nsongwakazhi wa jizhina ja Folake bamwambijile ku sukulu kunemba kibaaba pa mutwe wa kuba’mba “Kintu kyo Natemwa Kukila Byonse.” Folake wafuukwilepo kunemba pa byo atemenwa kubulako bantu pa Bufumu bwa Lesa.

Folake walumbulwile amba “Bufumu bwa Lesa ke Kafulumende wa kine. Bino kechi bumweka ne kabiji nangwa mwavwala malole kechi mwakonsha kwibumona ne!”

Folake watendekele kunemba pa mapesho a Bufumu aji kulutwe o atengela. Wanembele pa makatazho amo Bufumu o bukapwisha amba,“Ñumvwa bingi bulanda inge namona bantu babula mazubo bekalatu mu mikwakwa kabiji ne banyike bafwa na mambo a kubula kajo mu byalo byapusana pusana.” Wanungilepo amba: “Pano bino inge natanga kinembelo kya Isaya 65:21, ngikala bingi na lusekelo.” Kino kyepelo kyaamba pa bantu bakalamwanga na Bufumu bwa Lesa amba: “Bakashimika mazubo abo ne kwikalamo; kabiji bakajimba majimi abo a miñanzañanza, ne kuja bipangwa byabyo.”

Kabiji Folake waambile’mba utonga kimye Lesa kyo akafumyapo bikola byonse kupichila mu Bufumu bwanji. Mu kibaaba kyo anembele wabikilemo ne byambo biji mu Lumwekesho 21:4 bya kuba’mba Lesa “ukebashimuna mipolo yonse ku meso abo, ne lufu, mabingo, kujila nangwa misongo kechi bikekalako jibiji ne.” Wapezhezheko na byambo bya kuba’mba ‘kwamba pe Yehoba ne pa Bufumu bwanji, kyo kintu kyo natemwa kukila byonse.’ Kwa kubula nangwa kuzhinaukatu ne, uno nsongwakazhi watemwa bingi Bufumu bwa Lesa!