MEPUZHO AKUMBULWA MU BAIBOLO

Nanchi tukekalapo na kafulumende umo wa ntanda yonse nyi?

Akilangulukai pa bintu kafulumende wa ntanda yonse byo akonsha kubila bantu. Lelo jino bantu bavula bayanda na mambo a kwikala bayanji, bakwabo banonshi bingi. Bino kafulumende wayuka bikeba bantu wakonsha kwibobila byonse byo bakeba. Nanchi mwalanguluka amba bantu bakonsha kuleta kafulumende wa uno mutundu nyi?—Tangai Yelemiya 10:23.

Kufumatu ne kala, makafulumende akankalwa kulama bangikazhi babo, kikatakata bayanji. Makafulumende amo akanama. (Musapwishi 4:1; 8:9) Bino Lesa wa Bulume Bonse walaya kuleta kafulumende ukafumyapo onse ajipo. Kalama wa uno kafulumende ukalamanga bulongo bantu.—Tangai Isaya 11:4; Danyela 2:44.

Ñanyi bintu bikoba Bufumu bwa Lesa?

Yehoba Lesa wasala mfumu wa ntanda yonse wawama aye Mwananji Yesu. (Luka 1:31-33) Byo ajinga pano pa ntanda, Yesu watemenwe bingi kukwasha bantu. Byo aji Mfumu, ukakwatankanya bantu ba mu mikoka yonse ne kupwisha buyanji.—Tangai Salamo 72:8, 12-14.

Nanchi bantu bonse bakatundaika Yesu kwikala Kalama wabo nyi? Ine. Bino Yehoba watekanya. (2 Petelo 3:9) Wapa bantu kimye pa kuba’mba Yesu ekale Kalama wabo. Katatakatu Yesu akavizhe bantu bonse batama kabiji ukaleta mutende ne luzhikijilo ntanda yonse.—Tangai Mika 4:3, 4.