MUTWE WA PA NKUPIKO | MAMBO KA O TWAFWAINWA KWIKELA BA KISHINKA?
Nanchi Bukishinka Bukingila Nyi?
Hitoshi waingijilanga mu ofweshi wa kulama mali mu kipamo kya mu Japan. Byo apitulukilenga mu sawakya wa mali na bakulumpe banji ba nkito, Hitoshi bamwambijile kunemba sawakya wa bubela. Hitoshi walumbulwile’mba jiwi janji ja mu muchima kechi jakonsha kumuswisha kubepa ne. Kabiji bakulumpe ba nkito baambijile Hitoshi amba basakumupanga nkito ne kumupanga bamupangile.
Bañondo balondejilepo, kyamulefwile bingi Hitoshi pa kuba’mba ataane nkito ikwabo. Kimye kyo bamutebawizhenga pa bya kutwela nkito, Hitoshi waambile’mba kechi wakonsha kutwela nkito ya kubepa bubela ne. Wamutebawizhenga waambile’mba, “Nkyangye kumonapo muntu ulanguluka bibye ne!” Ba mu kisemi kya kwa Hitoshi ne balunda nanji bamutundaikile kutwajijila kwikala wa kishinka, pano bino watendekele kuzhinauka. Waambile’mba, “Nazhinaukilenga’mba kana kijitu bulongo kwikala wa kishinka na mambo a lwitabilo lwami nangwa ne.”
Byapichilemo Hitoshi byamwesha’mba kechi bantu bonse banemeka bukishinka ne. Bamo bamba’mba kubula bukishinka kukebewa bingi kikatakata mu bya busulu. Mwanamukazhi umo mu South Africa, waambile’mba, “Ñingila na bantu babula bukishinka, kabiji bimye bimo nkeba kulondela byo boba.”
Kubula bukishinka kwakumbanamo lelo jino, ke bubela. Myaka imo yapitapo, Robert S. Feldman, shayuka wa pa Sukulu wa Massachusetts Amherst utala pa bilanguluka bantu, waambile’mba mu maminiti jikumi, bakulumpe bavula babepa umvwe babena kwisamba na bakwabo. Feldman waambile’mba, “Wakuminye bingi pa kutaana uno sawakya. Kechi twaketekejilenga’mba bantu bavula batemwa kubepa ne.” Bantu bavula kechi bakeba kwibabepa ne, bino bavula batemwa kubepa.
Mambo ka kubepa, kwiba ne bintutu bikwabo bimwesha kubula bukishinka o byavujila lelo jino? Kubula bukishinka kwatamisha byepi ntanda lelo jino? Pano twakonsha kuba byepi pa kuba’mba tubule kwivwanga mu byubilo bimwesha kubula bukishinka?