Mulongo Wanungwako Ku Jibumba Jitangijila

LUKELO pa Kisatu pa 24 January, 2018, babijikile ku bisemi bya Betele mu United States ne mu Canada kuba’mba Mulongo Kenneth Cook, Jr., wanungwako ku Jibumba Jitangijila ja Bakamonyi ba kwa Yehoba.

Mulongo Cook wasemekejilwe ne kukomena mu Pennsylvania, ku U.S.A. Wafunjile bukine ku mukwabo mo bafunjilanga sukulu byo kwashajiletu pacheche kupwisha sukulu kabiji wabatizhiwe pa 7 June, 1980. Watendekele bupainiya bwa kimye kyonse pa 1 September, 1982. Byo aingijileko bupainiya pa myaka ibiji, bamwichile kuya na kwingijila pa Betele, kabiji watendekele mwingilo wa pa Betele pa 12 October, 1984, ku Wallkill, New York.

Pa myaka 25 yalondejilepo, Mulongo Cook waingijile mingilo yapusana-pusana mu dipatimenti ipulinta mabuku ne madipatimenti akwabo. Ba Cook basongwele nyenga Jamie mu 1996, kabiji batendekele kwingijila pamo mwingilo wa pa Betele ku Wallkill. Mu December 2009, Mulongo ne Nyenga Cook bebatumine kuya na kwingijila pekela masukulu (Watchtower Educational Center) ku Patterson, New York, kabiji Mulongo Cook bamupele mwingilo wa kwingijila mu Kavoto Kakumbula Mepuzho. Mu April 2016, byo babweleleko pacheche ku Wallkill, Mulongo ne Nyenga Cook bebavilwijile ku Brooklyn, New York. Byo papichiletu bañondo batanu, bebavilwijile ku ofweshi mukatampe wa ntanda yonse ku Warwick, New York. Mu January 2017, Mulongo Cook bamutongwele kwikala nkwasho mu Kavoto ka Kunemba ka Jibumba Jitangijila.