Kusapwila Bakaili

¹ Tutambwila masawakya a mwingilo wawama ubena kwingila balongo wa kusapwila bakaili mu tuleya ne kukwasha bamo kwiya mu bwikalo bwa ku mupashi. Mu tuleya twavula mwikala ne kupwila, kabiji bakaili bamo bafunda bukine kufika ne pa kipimo kya kwipana ne kubatizwa. Umvwe bapimpula bwikalo bwabo bekala ba kumwenako ne bakwabo.

² Mu tuleya tumo, bakaili bakwashiwa na balongo bo benembela nabo makalata pa kimye kikatampe. Pano bino, pajiko lukatazho lumo lotukeba kwimujimunako. Bakaili bamo baswa’mba twinembelenga nabo makalata ne kumwesha lusekelo lwa bubela lwa kukeba kufunda bukine na mambo akukebatu mwa kutambwila bukwasho. Butemwe, kifyele ne bumpanyi bwa bantu ba Yehoba bo bulengela kuba’mba bakaili bobenga bya uno musango. Umvwe kwaikala kwinembela makalata na kaili, kechi kyawama kutatula kumutumina mali nangwa bintu bikwabo byo abena kulomba ne. Kintu kikatampe kyo mubena kwinembela naye makalata ke kumubula byambo bya ku mupashi ne kumukosesha kuba’mba alondelenga mizhilo ya mu Baibolo mu bwikalo bwanji.—Mana. 14:15.

³ Banyenga kechi bafwainwa kutwajijila na kwinembela makalata na bakaili babalume ne, uno mwingilo wafwainwa kubiwa na balongo bafikapo. Kabiji kechi kyawama balongo mu kipwilo kuya ku kaleya na kukayatu na bakaili ne.

⁴ Umvwe bakaili bamwesha lusekelo lwa kukeba kufunda bukine, mwafwainwa kupana mazhina ne keyala wabo ku kipwilo kiji kwipi na ko ko kaleya, pa kuba’mba balongo bayuka bulongo mwakuyila ku kaleya, bakayeko na kunengezha bya kutatula kwibafunjisha inge kyaswishiwa. Javula bano balongo ba uno mutundu bayuka bya kuba kabiji baswishiwa kufwakesha tuleya. Kiji kobaji bene bano balongo, umvwe bakeba kupwizhanga pamo bakaili kuba’mba bebafunjishenga pa kimyetu kimo nangwa ne. Kechi kyawama basapwishi kusalululapo bimye bimo bya kuya ku kaleya na kufwakeshatu bakaili kwakubula kyo baya na kubako ne. Twaketekela namba bakaili bakonsha kufunda byavula umvwe bakulumpe bakaleya baswisha’mba kwikalenga kupwila kwa mulungu ne mulungu. Onkao mambo, bakaili bepana nangwa bakeba kufunda bukine, bakatambwilanga kajo ka ku mupashi katambwilapo ne bantu ba Yehoba babula mu kaleya.

⁵ Kya kine tukeba kukwasha bantu bonse baji na nzala ne kilaka kya bukine, bino twafwainwa kujimuka pa kusapwila bakaili mambo bebakasa na mambo a kuba byatama.