Kabokoshi Kamepuzho

◼ Lujimuno ka lotwafwainwa kumvwina pa kusapwila bakaili?

Kuzhokoloka mwaya ntanda yonse, bakaili baji nobe ma milyonyi atanu na asatu. Kabiji bamo bamwesha lusekelo lwa kukeba kumvwa mambo awama. (1 Timo. 2:4) Ofweshi ya musampi imo itambwila makalata pepi na 1,400 pa ñondo pa ñondo kufuma ku bakaili ne bisemi byabo kuba’mba bebatuminenga mabuku nangwa kwibafwakesha. Lusekelo lwa bakaili bamo lwa kine, pakuba byubiwa javula bimwesha kuba’mba bakaili bamo bamwesha lusekelo lwa bubela lwa kukeba kufunda na mambo akukebatu mwa kutambwila bukwasho kufuma ku bantu ba Lesa. Na mambo akino, bonse twafwainwa kulondela lujimuno lwalondelapo pa kusapwila bakaili.

Javula bakaili bebasapwila mu makalata. Banyenga kechi bafwainwatu nangwa pacheche kwinembelanga makalata na bakaili babalume ne, nangwatu kyakuba baji na mulanguluko wa kukeba kukwashañana ku mupashi. Balongo bafikapo bo bafwainwa kuba kino. Kabiji banyenga bafikapo nabo bo bafwainwa kusapwila bakaili babakazhi bamwesha lusekelo lwa kine lwa kukeba kufunda bukine bwa mu Baibolo. Mali nangwa bya bupe kechi byafwainwa kutumwa ku bakaili ne, nangwatu kyakuba balomba byepi.

Umvwe kaili wamwesha lusekelo lwa kukeba kufunda, mwafwainwa kupana jizhina ne keyala wanji ku kipwilo kiji kwipi na kaleya ko ajimo. Balongo bafikapo ba ku kyokyo kipwilo javula bayuka bya kuba na bintu byapusana pusana byakonsha kumweka. Umvwe kipwilo kechi kyayukanyikwa ne, mwafwainwa kubula ofweshi ya musampi.

Kechi kyatama balongo bapewa mwingilo wa kusapwila bakaili kupwila pamo na bakaili kuba’mba bonse bafunjile pamo ne. Pano bino basapwishi kechi bafwainwa kuba sabetobwela pamo na bakaili ne. Kabiji kikwabo, kechi kyawama basapwishi kuya ku kaleya na kufwakesha bakaili na kupwañana nabo kwa kubula kunengezhezha jimo ne.

Twayai ‘twikale bajimuka pamo no miloolo, ne kukoka pamo no bankunda’ byotusapwila mambo awama ku bakaili.—Mat. 10:16.