Jishinda Japela Jotutambwishishamo Mabuku
1 Jishinda japela jotutambwishishamo mabuku kwakubula mutengo waimikwa jibaikaleko pano ke mwaka umo. Nanchi jino jishinda jibena kwingila bulongo nyi? Masawakya a mwingilo wa mu bujimi abena kumwesha kibelengelo kyabaya kya mabuku apusana-pusana abena kutambwishiwa. Kibena kumwesha kuba’mba bantu bavula babena ‘kwiya ... na kutambula mema a bumi a bupetu.’—Lum. 22:17.
2 Pano bino, mwingilo wetu kechi wa kupanatu mabuku kipane-pane ku muntu uji yense ne. Byonka byo twingijisha bulongo bipe byetu, musapwishi yense uji na mwingilo wa kumona kuba’mba ubena kwingijisha bulongo mabuku o atambula kufuma ku Sosaiti kwakubula mutengo waimikwa kupichila mu kipwilo kyo ajimo. Nangwa kya kuba Sosaiti ipana mabuku kwakubula mutengo waimikwa ku basapwishi, kechi kilumbulula’mba kafwako mali ataiwapo pa kwianemba ne pa kwiasampanya ne. Bonse bafwainwa kusanchila buneme bwa mabuku etu, mambo abena kukwasha bantu bakishinka bakeba maana alumbuluka a kuyuka Yehoba Lesa ne Mwananji Yesu Kilishitu.—Yoa. 17:3.
3 Sosaiti inengezha byepi kupana mabuku ku bonse kwakubula mutengo waimikwa? Mali alipilwa pa kwianemba ne pa kwiasampanya afuma mu bya bupe. Bakalume ba Yehoba bepana bobatanshi bapana bya bupe ku uno mwingilo. Bakamonyi ba kwa Yehoba kechi baya ku bantu na kulomba bukwasho bwa kukwashishamo uno mwingilo wakampala-kampala wa kusapwila Bufumu ne. Nangwatu lelo jino, kechi twaendapo kala na kulomba mali mu mvula-bantu ne. Nangwa kiji byonkabyo, tusanta bingi pa bupe bucheche bupana bantu bakishinka bo tutana mu mwingilo wa mu bujimi.
4 Bupe Bwetu byo Bwingila: Onkao mambo, ke kintu kyafwainwa kwikala benengezha kulumbulula bulongo bukiji-bukiji mwingilo wetu wa kufunjisha Baibolo mu ntanda yonse byo akwashiwa kupichila mu bampanyi ba kwitemenwa. Mali onse atambulwa engijishiwa kulipila byonse byalamata ku mwingilo wa kusapwila Bufumu mu ano moba. Kununga pa kunemba ne kusampanya mabuku mwaya ntanda yonse, Sosaiti ingijisha ano mali mu kulama bulongo maofweshi a misampi, ma Betele, masukulu a mwingilo ne a bamishonale, bapaina benda, mapunzha pafikila mabuku ne mingilotu ikwabo yalamata ku mwingilo mukatampe Yesu ye apaine ku baana banji ba bwanga.—Mat. 24:14; 28:19, 20.
5 Kuvujilako kwa bantu kubena kumweka mu bantu ba Yehoba kwalengela bavula kwipuzha mashinda o bakonsha kupainamo bukwasho. Bavula kechi bakonsha kukwasha mu kushimika misampi ipya ne Mazubo a Bufumu nangwa kuya mu byalo bingi bya kwalepa na kukwasha mu mwingilo wa kusapwila ne. Pa kuba’mba bengileko ino mingilo yawama kwesakana na papelela bulume bwabo, basapwishi bavula ne bisemi byabo kimye kyonse bapana bupe bwa kukwasha mwingilo wa ntanda yonse. (Esakanyai na 1 Kolinda 16:1, 2.) Mu jino jishinda, mingilo yonse ya Sosaiti ikwashiwa, kuvwangakotu ne kusampanya mabuku. Onkao mambo, muntu kechi wafwainwa kwikala na mweno ya kuba’mba bupe bwa kupana ku mwingilo wa ntanda yonse bukwashatu mu kunembwa kwa mabuku ne.
6 Pa kuya na kusapwila bantu pa mazubo abo nangwa kukwabotu, twafwainwa kwinengezha kwisamba nabo byambo bya mu Baibolo. Buku wa Ukupelulula Ukufuma mu Malembo uji na ntatwilo yawama yapusana-pusana, ne mitwe yafwainwa iji mu Baibolo. Kwesakana na nkumbwilo ya muntu ku buluwe bwa Bufumu, musapwishi wafwainwa kumona inge kyafwainwa kutambika buku nangwa ne. Umvwe mwamona’mba lusekelo ufwalo lwa kuba’mba mumushile buku, mushaitu mu mutende ne kuya pa nzubo ikwabo. Nangwa mwakonsha kumushila talakiti umvwe wimubula’mba usakutanga byambo bijimo. Monai kuba’mba mwanemba jizhina ja wamwesha lusekelo pa kuba’mba mukabweleko jibiji. Byobyo mwakonsha kuba ne ku muntu wabula kimye kya kwisamba nanji bulongo mu meso anteka wapayankana na bintu bikwabo nangwa kampe mwamwendela pa kimye kyabula kufwainwa.
7 Jishinda japela ja kutambwishishamo mabuku jibena kukwasha bantu kuyuka kuba’mba mwingilo wa lufunjisho lwa Baibolo kechi wa busulu ne. Jitukwasha ne atweba kuta maana kikonkwanyi kyetu kya kusapwila mambo awama a Bufumu ne kulenga baana ba bwanga ba kwa Yesu Kilishitu. Kupusanako na tubungwe twitumpa mu mukwekele wa “Kulomba-lomba mali,” Bakamonyi ba kwa Yehoba baji na lusekelo lwa kumona’mba mabuku ashiwa ku bonse kwakubula mutengo waimikwa. Kechi tupapachila bupe bwa mwingilo wa ntanda yonse ku babula lusekelo lwa kine ku buluwe bwetu ne. (Monai Kyamba kya Usopa kya mu Kibemba, December 1, 1990, mapeja 22 ne 23.) Bupe bonse bupanyiwa bwingijishiwa ku kukwasha uno mwingilo wa kufunjisha Baibolo ntanda yonse, mambo bengila uno mwingilo ke bantu bepanatu babula kufola baji mu jibumba. Twakonsha kwamba pa mambo a bupe bwa ntanda yonse ku betwipuzha nangwa ku bamwesha lusekelo mu mwingilo wetu.
8 Byo tubambakana mu kunungulula mwingilo wetu, ne kwingijisha bulongo mabuku etu anema a Sosaiti, Yehoba ukatwajijila kwituvuzha. Bantu ba michima yawama mwaya ntanda basanta bingi umvwe twibalumbulwila mwingilo byo aji, kabiji basekela ne kupana bukwasho bwabo kupichila mu bupe bwa kwitemenwa.