Nemekai Mabuku Etu
1 “Kunemba mabuku avula kechi kupela ne.” (Sapwi. 12:12) Mabuku avula atutu. Nangwa kikale byonkabyo, kechi byo kiji ku mabuku anembwa na Watchtower Society ne. Ao aji na munema mambo ke mabuku muji kajo ka ku mupashi kakapulusha bantu. Akwasha bantu baji na lusekelo lwa kukeba kufunda kuyuka Yehoba, kabiji akosesha lwitabilo lwa bakalume ba kwa Yehoba bepana kala.
2 Tusaka ne bakwetu nabo kutanga ano mabuku mambo twayuka kuba’mba bakonsha kumwenamo. Nangwa kya kuba’mba ano mabuku apanyiwatu kwa kubula kutongola mutengo, pataiwa mali pa kuba’mba apangwe ne kwiakumbanya mwaya ntanda. Onkao mambo, kechi twafwainwa kupanangatu mabuku kipane-pane ne. Umvwe tubena kuzhinauka lusekelo lwa mwesha mwina nzubo, twakonsha kumushilatu talakiti. Twafwainwa kubwelako jibiji ku muntu uji yense watambula buku, kabiji umvwe wamwesha lusekelo pa kyo kyo kimye, twakonsha kumupa buku mukwabo.
3 Bamo bakankazhama kubula bena nzubo kuba’mba uno mwingilo ukwashiwa na bupe bwa kwitemenwa, bino javula kyawama kwibabula bino. Mambo kino kyo kiyukisha bena nzubo kuba’mba mwingilo wetu kechi wa busulu ne. Kimwesha kuba’mba mwingilo wetu wanema ke wa kusapwila mambo awama a Bufumu ne kulenga bana ba bwanga. Kitukwasha kuyuka lusekelo lwa kine. Javula bantu bekala na mali akupotamotu bintu byatutu ne mabuku a ku kyalo. Umvwe mu bukishinka baikala na lusekelo mu byo mwibabula, bakakonsha kumona buneme bwa kupana bupe bwa kutundaika bwina Kilishitu bwa kine. Umvwe saka tulumbulula mwingilo wetu byo akwashiwa, abya tubena kunemeka mabuku. Tumwesha ne kuvuluka’mba pa kuba’mba ano mabuku apangwe, poso paji mali.
4 Umvwe mwalumbulula bulongo bupe bwa kwitemenwa byo buji, bena nzubo bavula bakekala na kizaku kya kukwasha mwingilo wetu wanema. Kwikala kimye kimo, mwalanguluka kuba’mba kechi kyafwainwa kutongola lunengezho lwa bupe ne, pano bino kyanema kutongola luno lunengezho kimye kitanshi mwina nzubo kyo akiji na lusekelo lwa kutanga buku ye mwamupa.