Kakitenguluzha Ka Mepuzho

◼ Twakonsha kuyuka byepi ye twafwainwa kushila mabuku etu?

Kintu kyanema ke kuyuka muntu watako muchima. Inge wamwesha lusekelo lwa kine, twafwainwa kumushila magazini abiji, buloshuwa, buku nangwa mabukutu akwabo o tubena kusha mu mwingilo. Twafwainwa kuba bino nangwatu kya kuba uji na kajali kacheche ka kubingulako ka kukwasha mwingilo wa ntanda yonse nangwa inge ufwao. (Yoba 34:19; Lum. 22:17) Pano bino, kechi twafwainwa kusha mabuku etu ku bantu babula kwianemeka ne.—Mat. 7:6.

Mwina nzubo wakonsha kumwesha byepi lusekelo? Kuswa kwisamba nanji kumwesha’mba watako muchima. Kuteleka inge tubena kwamba, ne kukumbula mepuzho, ne kwamba byo abena kulanguluka kumwesha’mba watako bingi muchima. Kabiji kulondelamo inge ke tutange Baibolo kumwesha’mba wanemeka Mambo a Lesa. Bino javula kyawama kumwipuzha inge ukatanga buku ye tukeba kumushila. Basapwishi bafwainwa kufunda bya kuyuka muntu wamwesha lusekelo. Nabiji pa kusapwila mu mukwakwa kechi kyakonsha kuwama kupa bantu bonsetu babena kukinsana mabuku, mabuloshuwa nangwa magazini etu ne. Inge twakankalwa kuyuka muntu watako muchima, kyakonsha kuwama kumushila mbila ya Bufumu nangwa talakiti.

Kyo kimotu ne na mabuku atambula basapwishi mu kipwilo, bafwainwa kutambulatu o bafwainwa kwingijisha mu mwingilo, kechi kusenda avujisha na mambotu a kuba’mba baji na mali a kubingulako ne. Mibingu kechi ipanwa ku mabuku ne, yakutundaikilamo mbaji yonse ya mwingilo wa ntanda yonse. Kikale tuji na mali avula nangwa ne, lusanchilo luketulengela kupana na muchima yense, kechi kupana nsubu ne, bino tukapana na mulanguluko wa kutundaika bintu bya Bufumu. (Mako 12:41-44; 2 Ko. 9:7) Kabiji luketulengelanga kusendatu mabuku o twafwainwa kwingijisha mu kifulo kya konauna mali a Lesa abingwilwe.

[Mabulañano pa peja 2]

Basapwishi bafwainwa kufunda bya kuyuka muntu wamwesha lusekelo