Ingijishainga Bulongo Mabuku Etu Alumbulula Baibolo
1, 2. Bantu bavula beumvwa byepi pa mabuku etu, kabiji kino kilengela kwipuzha ñanyi bwipuzho?
1 “Natendekele kutanga mabuku enu mu 1965. Umvwe mbena kutanga ngesakanya na Baibolo, kabiji byonse biji mu mabuku enu byakwatankana pamo na Baibolo. Kimye kyonse nkeba kuyuka bukine pe Lesa ne Yesu, kabiji kwakubula nangwa kubepa ne, mbena kutana bukine kupichila mu kutanga mabuku enu ne Baibolo.” Abino byambo byo byanembele mwanamulume umo ku ofweshi mukatampe wa Bakamonyi ba kwa Yehoba. Mu nkalata intutu imo, walombele ne lufunjisho lwa Baibolo.
2 Byonka byajinga uno mwanamulume wa lusanchilo, bantu bavula kuzhokoloka ntanda basanta bingi pa mabuku akwasha kufunda Baibolo anengezha ‘kalume wakishinka ne wa maana.’ (Mat. 24:45) Pa mwaka pa mwaka, mabuku avula anengezhiwa kukwasha bantu bakishinka ‘kuyukisha bya bukine.’ (1 Timo. 2:4) Twakonsha kwingijisha byepi bulongo mabuku etu alumbulula Baibolo?
3. Twakonsha kuba byepi pa kuba’mba tubulenga konauna mabuku?
3 Kange Monaunenga Ne: Umvwe papita moba, twakonsha kwikala na mabuku avula o tukabula kwingijisha. Twakonsha kuba byepi pa kuba’mba tubulenga konauna mabuku etu anema? Kikebewa kulangulukishapo bulongo kimye kyo tubena kutambula mabuku a kwingijisha mu mwingilo. Mu kifulo kya kutambula mabuku avula a kushajika, kyakonsha kuwama kutambulatu buku umo nangwa abiji ne kubwelako mu kusenda akwabo umvwe twashajika o twasendele. Kino kiketukwasha kubula kwikala na milumba ya mabuku mu mazubo etu. Mu jishinda jimotu, umvwe tuji na magazini avula o twabula kushajika, kyakonsha kuwama bingi kukepeshako kibelengelo kya magazini o tutambula.
4. Ki ka kyafwainwa kubiwa umvwe kipwilo kiji na mabuku atulama?
4 Mabuku Atulama: Umvwe pa kipwilo paji mabuku amo atulama, mukulumpe unengezha mabuku wakonsha kushikisha kipwilo kiji pepi umvwe kya kuba bakonsha kwingijisha mabuku ashalapo. Basapwishi bakonsha kupana mabuku akala ku balongo babo ba mu kisemi babula kwitabila, bafunda Baibolo ne bantutu bakwabo. Aba batendeka kupwila katataka bakonsha kutemwa kwikala na mabuku akala mu ma laibulale abo a teokalasi.
5. Twakonsha kumwesha byepi amba tunemeka mabuku etu?
5 Tukeba mabuku etu kwingila mwingilo wao, ko kuba’mba, kukwasha bantu bakishinka kufunda byavula pa nkebelo yawama ya Yehoba. Byonka byabujile Yesu konauna kajo kashajilepo panyuma ya kuba wajisha bantu bavula mu jishinda ja kukumya, ne atweba kikonkwanyi kyetu ke kya kwingijisha bulongo mabuku anema alumbulula Baibolo. (Yoa. 6:11-13) Mambo apana bumi aji mu mabuku etu konsha afika bantu ba kishinka pa michima yabo umvwe twialekela mu mashelufu etu nangwa mu byola byetu ne. Onkao mambo, twafwainwa kutako muchima kimye kyo tubena kutambula mabuku a mu mwingilo kabiji ne kwiengijisha bulongo kukwasha bantu.—Fili. 4:5.