Kushajika Mabuku mu Nyaunda Muji Bantu Bamba Milaka Ingi
1. Mambo ka bipwilo byavula o bikebewa kwikala na mabuku a mu mulaka ungi?
1 Mu mapunzha avula, mwatendeka kwikala bantu bafuma mu byalo bingi. Bavula mu bano bantu bafunda bingi bukiji bukine ne kumvwisha umvwe kebafunde mu mulaka wabo. Lunengezho ka lwanengezhewa kupa bantu baji na lusekelo lwa kukeba kufunda bukine mabuku alumbulula Baibolo mu mulaka ye bomvwisha?
2. Kukwatankana ka kukebewa ku bipwilo bibiji nangwa byavula byamba milaka yapusana pusana bingijila mu nyaunda imo?
2 Kimye kya Kushajika Mabuku: Umvwe bipwilo bibiji nangwa byavula byamba milaka yapusana pusana bingijila mu nyaunda imo, mabumba a bakulumpe ba mu byobyo bipwilo bafwainwa kwingijila pamo na bakulumpe batangijila mwingilo kuba’mba bomvwañane jishinda jawama ja kwingijilamo pakuba’mba bantu ba mu mulaka yense basapwilwe. Javula pa kusapwila ku nzubo ne nzubo, basapwishi kechi bashajika mabuku a mu mulaka wambiwa mu kipwilo nangwa bipwilo bingi ne. Bino umvwe basapwishi babena kwingila busapwishi bwa kushukilwa nangwa mu mapunzha a mvula bantu, bakonsha kutambika mabuku a mu milaka ya bobo bantu.—Monai Kabokoshi ka Mepuzho mu Mwingilo Wetu wa Bufumu wa October 1990, wa Kibemba.
3. Kimye ka kipwilo kyo kyafwainwa kuoda mabuku a mu mulaka ungi?
3 Kimye kya Kuoda Mabuku: Kika kyakonsha kubiwa umvwe mu mpunzha imo muji bantu bavula bamba mulaka ungi pano kafwamo kipwilo kyamba yewo mulaka ne? Umvwe kiji byobyo, bipwilo byakonsha kuoda mabuku aesakana akebewa ajiko anembwa mu yeo mulaka, nabiji matalakiti, buloshuwa wa Nanchi Lesa Ukebaka? ne Mwakonsha Kwikala Balunda Na Lesa! ne buku wa Kuyuka. Basapwishi bakonsha kutambika ano mabuku kimye kyonse kyo basambakana muntu utanga yewo mulaka.
4. Mabuku a mu mulaka abulwa kuodwa na kipwilo akonsha kutanyiwa byepi?
4 Bya Kuoda Mabuku: Umvwe kipwilo kechi kioda mabuku mu mulaka utanga muntu uji na lusekelo lwa kukeba kufunda ne, nga mabuku a mu yewo mulaka akonsha kutanyiwa byepi? Musapwishi wafwainwa kumona wa mwingilo utala pa mabuku kuba’mba ayuke mabuku ajiko mu yewo mulaka pakuba’mba ano mabuku abena kukebewa akaodelwe pamo na oda wa kipwilo ukalondelapo.
5. Kikonkwanyi ka kyo tuji nakyo kya kwingijisha mabuku a bwina Kilishitu?
5 Twayai atweba bonse twingijishe mabuku a bwina Kilishitu kukwasha “bantu bonse,” kikale bamba mulaka wa mutundu ka, kuba’mba ‘bekale na maana alumbuluka a bya bukine ne kupuluka.’—1 Timo. 2:3, 4.