Kabokoshi Ka Mepuzho

◼ Nanchi kimye kyonse kyo twamufwakesha mwina nzubo, twafwainwa kumubulanga’mba apanenga bupe bwa kukwasha mwingilo wa Sosaiti wa ntanda yonse nyi?

Ine. Mutwe wa kuba’mba “Beni Abashilimuka pa Kutambika Impapulo Shesu” mu Mwingilo Wetu wa Bufumu wa January 2000 wa Kibemba, waamba’mba: “Kimye kimo, kechi kyakonsha kuyilamo kwisamba pa bupe bwa kukwasha mwingilo wetu wa ntanda yonse ne.” Twafwainwa kulangulukishapo bulongo. Tukeba bantu kuyuka’mba mwingilo wetu ke wa kufunjisha Baibolo, kechi busulu ne. Kechi twenda na kulomba mali ne.

Pano bino, kyawama bingi kulumbulwila bantu kimye kitanshi kuba’mba mwingilo wetu ukwashiwa na bampanyi ba kwitemenwa. Umvwe satulabijila kuba’mba kanatu bantu bamwesha lusekelo lwa kukeba kufunda bukine nangwa baji na kizaku kya kutanga, bobonka bo twafwainwa kushila mabuku etu, tukebabulanga ne pa mambo a kupana bupe.

Bavula baji na lusekelo lwa kukeba kufunda bukine bapana bupe bwa kwitemenwa kwakubula nangwa kwibavululako pa kimye kyo twibafwakashisha. Bamo bepuzha mutengo wa buku. Twafwainwa kwibabula’mba mwingilo wetu kechi busulu ne, kabiji ne kwibalumbulwila’mba tupana mabuku etu ku bantu bakonsha kwiatanga kwakubula mutengo waimikwa. Twakonsha ne kwibabula’mba muntu yense ukeba kupana bupe bwa kukwasha mwingilo wa ntanda yonse wakonsha kupana monka moasakila aye mwine. Pa kimye ne pa kimye, umvwe twamona’mba muntu yetufwakesha kechi upanapo bupe bwa kukwasha mwingilo wa Sosaiti wa ntanda yonse ne, twakonsha kumuvululako.

Twafwainwa kuvulukanga’mba nangwa kyakuba tusha mabuku ku baji na lusekelo lwa kukeba kufunda bukine kwakubula kutongola mutengo waimikwa ne, pataiwa mali pa kwiapulinta ne kwiasampanya. Twaketekela kuba namba mupashi wa Lesa utundaikanga bakalume banji ne baji na lusekelo lwa kukeba kufunda bukine botutana mu bujimi kupana bupe bwa kwitemenwa bwa kulipilila mali ataiwa mu mbaji yonse ya mwingilo wa ntanda yonse.