Nanchi Muji na Bumvu Nyi?
1 Inge twamona mwanyike wafyama ku nyuma ya bainanji nangwa ya bashanji saka etusumbila kechi tukumya ne. Ke kintu kya kisemwa kwikala na bumvu ku bwanyike. Nangwatu mu bukulumpe, bavula mu kisemwa baji bingi na bumvu. Nanchi mwakonsha kuba byepi umvwe mubena kukankalwa kwingila bulongo mu butumwa na mambo a kumvwa bumvu?
2 Byakuba Umvwe Muji na Bumvu: Kyanema bingi kuta mana ku “muntu wafyamika wa mu muchima.” (1 Pe. 3:4) Koseshai kutemwa Lesa ne bakwenu. Shiinwai na muchima yense kuba’mba mwingilo wa kusapwila jo jishinda jimo jawamisha ja kumwesheshamo butemwe bwa kwipana. Ikalai na mutanchi wawama wa jisambijilo ja pa bunke kabiji tanwai ku kupwila. Kasa mulomba kimye kyonse, kikatakata kuba’mba Yehoba e mukwashe. Lwitabilo lwakosa ne luketekelo mwi aye lukemukosesha ne “kuchinchika kwamba mambo a Lesa na kubula moyo.”—Fili. 1:14.
3 Kange mwiumvwe bapelelwa ne. Timoti naye wiumvwinenga byonkabyo. Paulo wakoseshe Timoti amba “kechi uleke muntu akusule mambo a bwanyike bobe ne;” kabiji wamuvulwileko’mba “Lesa kechi witupele mupashi wa moyo ne; poso wa bulume.” (1 Timo. 4:12; 2 Timo. 1:7) Yehoba wa mwingijishe Timoti, kabiji wakonsha kwimwingijisha ne anweba umvwe mwaeseka kununguluka ne kuketekela mwi Aye na muchima yense.— Sala. 56:11.
4 Kulanguluka pa binembelo bya mu Baibolo nabiji Mateo 10:37 kwa kwashishe nyenga wajinga na moyo wa kuchina mwata wanji wamukainyenga kusapwila. Byo akoseleko, butumwa bwamupelejile, ne kyapeleleko mwata wanji, bainanji ne bankasanji bonse batambwijile bukine!
5 Kunengezha Kwanema Bingi: Luketekelo lwenu lukabailako umvwe mwanengezha bulongo kuya mu butumwa. Salululai ñambilo yapela ya mu buku wa Ukupelulula nangwa mu makope a kala a Butumwa Bwetu bwa Bufumu, kabiji pitulukaimo bulongo. Mu kifulo kya kupapala, langulukaipo bulongo. Mwakonsha kwikala bachinchika kupichila mu kwingila na bakwenu. Vulukai kuba’mba bavula bo mukatana pa mazubo baji na bumvu, byonka byo muji. Bonse bakeba mbila ya Bufumu.
6 Umvwe muji na bumvu, kange mwakamwe ne. Byo mwingila na ngovu Yehoba ukemukwasha kwikala musapwishi wa mambo awama upanga bipangwa. Kabiji mukekala na lusekelo mu butumwa.—Mana. 10:22.