Nanchi Musanchila Butekanye bwa kwa Yehoba Nyi?
1 Umvwe Yehoba kechi watekenye pa myaka 10, 20 nangwa pa myaka yavujilako, ne kubula kuswisha kimye kyabaya kya busapwishi ne, nanchi inge mwafunjile bukine nyi? Byo twasantapo kuba’mba waswisha bantu bavula ‘kulapila.’ Bino nangwa byonkabyo, juba jikatampe ja kwa Yehoba ja luzhachisho “jikeya nobe ngivi.” (2 Pe. 3:9, 10) Onkao mambo, butekanye bwa kwa Lesa kechi bwafwainwa kumonwa’mba wabanda kufumyapo buno bwikalo ne.—Ha. 2:3.
2 Ubilai Bantu Lusa: Butekanye bwa kwa Yehoba kechi twakonsha kwibumvwisha ne. Kabiji kange tuvulame nkebelo ya buno butekanye ne. (Yona 4:1-4, 11) Yehoba ubila bantu lusa na mambo a byubilo bya bulanda byo bajimo. Yesu naye byo byo eumvwa. Pa kubila lusa mabumba oa sapwijilenga, wakebele mwingilo wa kusapwila kubailako pa kuba’mba bavula bekale na jishuko ja kwikala na bumi bwa myaka ne myaka.—Mat. 9:35-38.
3 Inge pa mweka bya malwa ne mapuso, nanchi kechi tubila lusa bantu babula kuyuka bukine ne nyi? Lelo jino bantu baji nobe “mikoko yabula kafunga” byo babena kweseka kuchinchika ne kuyuka kuvulañana kuji mu ino ntanda yo tujimo. (Mako 6:34) Kupichila mu kusapwila mambo awama mu kubambakana tutekenesha baji na michima ikeba kuyuka bukine ne kumwesha lusanchilo kwi Yehoba na mambo a butekanye bwanji.—Byu. 13:48.
4 Mwingilo Wetu Ukebewa Kwingijiwa Bukiji-bukiji: Mwaka wapwa bantu 323,439 babatizhiwilwe kabiji bantu kukila pa 14,000,000 batainwe ku Kivuluko. Shenu paji luketekelo lwa kuba’mba bavula bakonsha kunyema lonaiko lubena kwishila pa buno bwikalo bubi! Kechi twayuka bikekala mpendwa ya “jibumba jikatampe” ne. (Lum. 7:9) Kabiji kechi twayuka bula bwa kimye kikengijiwamo mwingilo wetu wa kusapwila ne. Bino Yehoba mwine ye wayuka. Mambo awama akasapwilwa kufika pa kipimo mwine kyo akebelamo ‘apa bino mpelo ikeye.’—Mat. 24:14.
5 Kimye kyashalako kyakepeshiwa, kabiji ne juba ja kwa Lesa bukumotu jifike. (1 Ko. 7:29a; Hebe. 10:37) Kwakubula nangwa kuzhinaukatu ne “lupulukilo lwetu luji kwipi kechi luji kwalepa pamo ne byo twaitabile ne.” (Lo. 13:11) Kange tukankalwe kumvwisha nkebelo ya butekanye bwa bulesa ne. Mu kifulo kya byo byo twayai tusapwile bukiji-bukiji kuba’mba bavula babena kukebesha bololoke bobilwe lusa lukatampe kwi Yehoba.