Twafwainwa Kutekenya Bantu mu Mwingilo
1. Yehoba wamwesha byepi amba watekenya bantu?
1 Lesa utekenya bingi bantu banji. (Lupu. 34:6; Sala. 106:41-45; 2 Pe. 3:9) Kyakumwenako kyawama kimwesha Lesa byo atekenya bantu banji ke mwingilo wa ntanda yonse wa kusapwila Bufumu. Yehoba waingila na bantu pa myaka 2,000, kabiji wakitwajijila na kufwenya bantu bakeba kufunda bukine kwi aye mwine. (Yoa. 6:44) Mwingilo wetu wa kusapwila umwesha byepi butekanye bwa Yehoba?
2. Twakonsha kutekenya byepi bantu kimye kyo tubena kwingila mu nyaunda yetu?
2 Mwingilo wa ku Nzubo ku Nzubo: Tulondela butekanye bwa Yehoba kupichila mu kusapwila kwa ‘kubula kuleka’ mu nyaunda muji bantu bakyangye kumwesha muchima wa kukeba kufunda bukine. (Byu. 5:42) Mu butekanye, tutwajijila kusapwila bantu bamisula, betwendeleka ne boba betukanya kusapwila. (Mako 13:12, 13) Kabiji tumwesha butekanya bwetu kupichila mu kwibikishako kutekezha nkunwa ya bukine nangwa kya kuba kyakatazha kutana bantu bakeba kufunda bukine pa mazubo.
3. Mambo ka o kikebewa kutekenya bantu pa kubwelako ne pa kwibafunjisha bantu Baibolo?
3 Mafunjisho a Baibolo: Kukomesha kijimbwa kukebewa kwikitekenya. Twakonsha kwikilama bulongo, bino kechi twakonsha kwikikomesha bukiji ne. (Yako. 5:7) Kyo kimotu, Kukoma ku mupashi kubiwa pachepache kabiji mu bipungu bipungu. (Mako 4:28) Aba bo tufunda nabo kimye kimo kyakonsha kwibakatazha bingi kuleka mafunjisho a bubela a mu bupopweshi o baitabilamo nangwa bisho byabula bya mu Baibolo. Kechi twafwainwa kukomesha bukiji bukiji bo tufunjisha kupichila mu kwibakanjikizha’mba bapimpule bwikalo bwabo ne. Butekanye bukebewa pa kuba’mba muntu ye mufunjisha ekale na kimye kya kuleka mupashi wa Lesa kumukwasha kupimpula bwikalo bwanji.—1 Ko. 3:6, 7.
4. Butekanye bwakonsha kwitukwasha byepi kusapwila bulongo balongo betu babula kwitabila?
4 Bakilongo Babula Kwitabila: Nangwa kya kuba tukebesha balongo betu babula kwitabila kufunda bukine, tumwesha butekanye kupichila mu kupembelela kimye kyafwainwa kuba’mba twibabule byo twaitabilamo. Kabiji kechi twafwainwa kwibafunjisha bintu byavula pa kimye kimo ne. (Sapwi. 3:1, 7) Mu kuya kwa kimye, byubilo byetu byawama bibalengela kuyuka byo tuji kabiji na butekanye ne mushingi twibabula bintu byo twaitabilamo umvwe kekikebewe. (1 Pe. 3:1, 15) Kya kine kuba’mba, kutekenya bantu mu mwingilo wetu kuketulengela kwingila bulongo ne kutokesha Shetu wa mwiulu pa muchima.