‘Lwainga Bulwi Bwawama bwa Lwitabilo’
1 Mutumwa Paulo wakambizhe Timoti ‘kulwa bulwi bwawama bwa lwitabilo.’ (1 Timo. 6:12) Paulo aye mwine walwile bulwi bwawama. Byo akotele, waambile kwa kubula kupita mu mbaji kuba’mba walwile bulwi bwawama. (2 Timo. 4:6-8) Mu byonse, waingijile butumwa bwanji kwa kubula moyo kabiji wakosejilemo. Onkao mambo inge twalondela kya kumwenako kyanji, twafwainwa kushiinwa mu michima yetu kuba’mba tubena kwingila na bulume bonse mu bulwi bwetu bwa lwitabilo bwa Bwina Kilishitu.
2 Ingilai na Ngovu: Paulo waingijilenga na ngovu mu butumwa. (1 Ko. 15:10) Ne atweba twafwainwa kwingila na ngovu pa kukeba bantu bafwainwa mu nyaunda yetu yo twingijilamo. (Mat. 10:11) Pa kuba’mba tutanepo bantu bamo bafwainwa, kikebewa kukelela lukelokelo na kusapwila boba botusambakana mu mukwakwa. Nangwa kusapwila mu bimye bya mabanga nangwa mu bimye bya muntuwa-muntuwa pa kuba’mba tumonañane na bantu babena kubwela ku mazubo abo.
3 Kutanchika bulongo ne kwibikako kukebewa pa kuba’mba tufike mu kimye kyafwainwa pa mpunzha ya jisambijilo jetu ja buku umvwe kuji kusambakana kwa kuya mu mwingilo wa mu bujimi. Ku kya kumwenako, kila mpelo ya mulungu, binungwa bimo bya kisemi kya Betele benda miseke yalepa pa kubatu’mba batanwe ku kusambakana pamo kwa kuya mu butumwa na bipwilo byo batumwako. Nangwatu mu kipwilo kyetu umvwe muji bisemi bimo nangwa basapwishi bamo benda miseke yalepa bino bafika mu kimye kyafwainwa, twakonsha kwibasanchila. Kwikokozha kwa yenka uno mutundu kyo kya kumwenako kyawama bingi kyo twakonsha kulondela.
4 Twafwainwa kwikala na kijikila kya kubwelako jibiji ku bonse bamwesha lusekelo. Nangwatu kimye kyo tubena kutambika mabuku mu busapwishi bwa mu mukwakwa nangwa kimye kyo tusapwila busapwishi bwa kushukilwa, twafwainwa kweseka-eseka kutambula keyala nangwa nambala ya foni ya yewo muntu ye twisamba nanji ne kumufwakesha jibiji pa kuba’mba tunungulule lusekelo lwanji, kabiji twafwainwa kwimena pa kutendeka jisambijilo ja Baibolo.
5 Ikalai ba Kwingila mu Mwingilo Kimye Kyonse: Paulo wateleko bingi muchima kabiji wasapwijilenga bingi bulongo. (Lo. 15:19) Nanchi kiji byepi kwi anweba? Nanchi muya mu butumwa kimye kyonse nyi? Nanchi mwayamo kala mu mwingilo wa mu bujimi uno ñondo nyi? Batangijila Masambijilo a Buku pa Kipwilo bakekala na lusekelo lwa kumona kuba’mba bonse ba mu jibumba jabo baingilako butumwa mu uno ñondo wa August. Bakemukwasha byo mwakonsha kwingila.
6 Tukatwajijila ‘kulwa bulwi bwawama bwa lwitabilo,’ umvwe twalondela kya kumwenako kya kwa Paulo mu kutundaika mambo awama na muchima yense.